Basa “Rinoparira Kuremekedzwa Chaizvoizvo”

MUAPOSTORA Petro akarayira vaKristu biyake kuti: “Mufambire wenyu uve wakanaka pakati pavahedheni; kuti pavanokupomerai vachiti munoita zvakaipa, varumbidze Mwari . . . , kana vachiona mabasa enyu akanaka.” (1 Petro 2:12) Kwamakore akawanda Zvapupu zvaJehovha muItaly zvakaratidzira mufambiro wakanaka kudaro pachena. Nechimiro chendangariro chomurayiro waJesu woku‘paridzira . . . pamusoro pedzimba,’ zvinoita mibato yazvo yose yechiKristu pachena, vanhu vose vachiona. (Mateo 10:27; Johane 18:20) Somugumisiro, apo rimwe gweta reItaly nomupristi vakapomera Zvapupu zvaJehovha kuti “isekete rinotaura kuti nderorudzidziso” ndokuvabatanidza na“masangano apachivande anonyengera vanhu,” Zvapupu zvakasarudza kutora chiito chapamutemo nokuda kwokutaura kunokuvadza mukurumbira.

Mukutonga kwokutanga, dare rakagumisa kuti gweta nomupristi vakanga vasina kuputsa mutemo. Zvisinei, musi wa17 July 1997, Dare Rokukwirira reVenice rakachinja chisarudzo chedare rokutanga, richiwana vaipomerwa vose vari vaviri vaine mhaka. Dare Rokukwirira rakati: “Nhau dzakabudiswa dziri kutaurwa nezvadzo dzose dziri mbiri dzine kutaura namashoko anokwanisa zvechokwadi kukuvadza mukurumbira wavateveri vorudzidziso rwe‘Zvapupu zvaJehovha.’ Zvinoratidzika kuva zviri pachena kuti vavariro yenyaya dzacho ndeyokufumura vateveri varo kuti vazvidzwe navanhu vose.” Dare racho rakataura kuti nyaya dzacho “hadziumbi kushandiswa kwekodzero yapamutemo yokumhan’ara nokutsoropodza.” Dare racho rakaripisa vaviri vacho vakanga vazvidza uyewo rakavarayira kuti varipire ndyiko dzose dzedare, kubatanidza ndyiko dzapamutemo dzeZvapupu zvacho zvose nokuda kwenhau dzose dziri mbiri.

Muchisarudzo chayo chakanyorwa, Dare Rokukwirira reVenice rakatsinhira kuti: “Kudzivirira zvimiro zvokusashivirira nokunyanyisa mune zvorudzidzisi kunobvira kupfurikidza bedzi nokudzikamisa nokuchengetedza kodzero dzose dzinovimbiswa neBumbiro Remitemo re[Italy].” Chisarudzo chinobvuma kuti basa reZvapupu zvaJehovha harisi rapachivande kana kuti rinonyengera vanhu. “Kubatanidza Zvapupu pakati pamasangano apachivande,” rakatsinhira dare racho, “hakutomboremekedzi mutemo wechokwadi chenhau, sezvo runobvuma kuti rudzidziso rwuri mumaguta akawanda nebasa rokutendeutsa riri kuitwa nemitezo yaro, zvikurukuru pamisi yeSvondo namamwe mazororo, rinonyatsozivikanwa uye rinoparira kuremekedzwa nokuda kwenhamburiko dzinoitwa, pasinei zvapo nechingafungwa nomunhu nezvedzidziso iri kuparidzwa.” Nokudaro, chinyorwa chokuparidza nokushingaira nomufambiro womuenzaniso weZvapupu zvaJehovha muItaly zvakabatsira kubvisa kuvafungira zvakaipa.—Mateo 5:14-16; 1 Petro 2:15.