Kudzidza Mumhosho Dzakapfuura

MITEMO yoMusiki wedu yetsika haigumi uye haichinjiki. Nokuda kwechikonzero ichi nheyo inowanwa pana VaGaratia 6:7 inoshanda nhasi: “Izvo zvinodyara munhu, ndizvo zvaanochekazve.” Chokwadi, munhu angaramba kuzvidavirira kuna Mwari, asi mutemo waMwari unoramba uripo nguva dzose. Pakupedzisira, hapana munhu anodzivirirwa pamigumisiro yezviito zvake.

Zvakadini nomunhu anorarama upenyu husina kutwasuka ipapo ndokuchinja, achiva mubatiri waMwari? Angava achiri kufanira kurarama nemigumisiro yamararamiro ake omunguva yakapfuura. Zvisinei, izvi hazvirevi kuti Mwari haana kumukanganwira. Upombwe hwaMambo Dhavhidhi naBhati-shebha hwakaunza ngwavaira huru muupenyu hwake. Aisagona kuzvinzvenga. Asi akapfidza, uye akagamuchira kukanganwira kwaMwari.—2 Samueri 12:13-19; 13:1-31.

Wakambonzwa waodzwa mwoyo paunotambura migumisiro yemhosho dzakawakaita here? Kana kukarangarirwa nenzira yakarurama, kuzvidemba kunogona kushanda sechiyeuchidzo kwatiri ‘kuti tingwarire kuti hatiiti zvinokuvadza.’ (Jobho 36:21) Hungu, kuzvidemba kunogona kutibetsera kudzivisa kudzokorora chakaipa. Zvakatonaka zvikuru, Dhavhidhi akashandisa ruzivo rwokuzviwanira rwaakawana pachivi chaakaita kuti azvibetsere kwete bedzi iye asi vamwewo. Akati: “Ndichadzidzisa vadariki nzira dzenyu; uye vatadzi vachatendeukira kwamuri.”—Pisarema 51:13.

[Mifananidzo iri papeji 7]

Dhavhidhi akadzidza muchivi chake naBhati-shebha