Nei Zvichizviita?

GORE rimwe nerimwe Zvapupu zvaJehovha munyika yose zvinoungana zviri zviuru pakokorodzano. Ipapo, zvinofarikanya kushamwaridzana uye zvinonzwa purogiramu yakaisvonaka yomurayiridzo weBhaibheri. Vamwe vanoita nhamburiko huru kuti vapinde kokorodzano idzi. Gore rapera, somuenzaniso, muMalawi vamwe varoorani vava namakore ari muma60, pamwe chete nomwanakomana wavo nomudzimai wake nomwana, vakafamba makiromita 80 nebhasikoro kuti vapinde kokorodzano. Vakabva pamusha pavo na6:00 mangwanani ndokusvika panhandare yekokorodzano maawa 15 gare gare.

MuMozambique, rimwe boka rakafamba mazuva matatu nebhasikoro kuti risvike kukokorodzano. Humwe usiku, sezvavakanga vakarara mumusasa, vakanzwa shumba dzichidzvova pedyo. Kunyange zvazvo vakakandira huni kwaibva mhuka dzacho, shumba dzacho dzakaramba dziripo kusvikira pamambakwedza. Chimwe chapupu chaienda kukokorodzano imwe cheteyo chakasanganidzana neshumba mumugwagwa. Akamira akanyarara asingafambi kusvikira shumba yaenda. Pakokorodzano izvi Zvapupu zvakataura zvichifara nzira yazvakanga zva“rwirwa [nayo] pamuromo weshumba.”—2 Timotio 4:17.

Zvapupu zvaJehovha zvakawanda zvinoita nhamburiko huru kuti zvipinde kokorodzano kana kuti kunyange misangano yeungano yevhiki nevhiki nokuda kwokunamata. Nei? Nyaya dzinotevera dzichakubetsera kunzwisisa chikonzero nei kuungana pamwe chete kuchikosha kwazvo.