Ndivanaani Vari Nhume Chaidzoidzo Dzorugare?
PANA May 31, 1996, manyuko enhau akazivisa rakaratidzika kuva shoko rorugare. Pazuva rakatevera racho, kutaura kwehurumende kwakabudiswa kuchizivisa kuti Benjamin Netanyahu, uyo akanga odokuva mutungamiriri wehurumende yeIsrael, akanga aka“zvipira zvikuru kukupfuuridzirwa kwehurukuro dzorugare, rugare rune chengeteko, pakati penyika yeIsrael nevavakidzani vayo vose, kubatanidza vagari vePalestine.”
Kusarudzwa kwaNetanyahu kwakaziviswa zvikuru kwakaparira vazhinji kushamisika kana rugare muMiddle East rungava zvinopfuura chiroto chete. Kana rwakadaro, mamwe marudzi angagona here kutevedzera, achikanganwa misiyano yawo?
Chokwadika, kuri nyore zvikuru kuvimbisa rugare kupfuura zvakunoita kurwuwana. Vachiziva izvozvi, vazhinji vakanga vasina chokwadi. Seizvo mutori wenhau Hemi Shalev akatsanangura, “hafu yevanhu vari muIsrael zvino ine murangariro wokuti kudzorerwa kuri pedyo, uye imwe inodavira kuti iri parumananzombe pasi pano.” Mukupfupikisa, akati: “Vamwe vanofara; vamwe vanochema.”
Ndizvo zvinoitika nokuedza kwomunhu kuparira rugare. Kukunda kwemutungamiriri mumwe nevatsigiri vake kunoreva kukurirwa kweboka rinoshora. Kusagutsikana kunotungamirira kukuodzwa mwoyo, uye kuodzwa mwoyo, kunowanzotungamirira kukupandukira. Mungava muMiddle East, muLatin America, muEastern Europe, kana kuti kumwewo zvako—nhamburiko dzorudzi rwomunhu parugare dzinonyengera kwazvo.
Rugare Chairwoirwo Rwava Pedyo!
Mukati menguva iyo rugare muMiddle East rwakanga rwuri musoro wenhau unofadza zvikuru, rimwe shoko rorugare rakanzwika. Irori rakanga risiri kutaura kwezvematongerwe enyika kwakaziviswa zvikuru; uyewo kwakanga kusiri chibvumirano chorugare pakati pamarudzi. Panzvimbo pezvo, shoko irori rakazivisa rugare ruchaitika bedzi kupfurikidza noUmambo hwaMwari. Shoko irori rakanzwikwepi? PaKokorodzano Dzoruwa dze“Nhume Dzorugare rwaMwari” dzinopfuura 1 900 dzakaitwa neZvapupu zvaJehovha munyika yose mukati ma1996/7.
Pakokorodzano idzodzi pakajekeswa kuti hakuna hurumende yomunhu inogona kuunza rugare rwechokwadi nokuchengeteka. Nei? Nemhaka yokuti ikoku kungada kugumisa zvinhu zvinotibira rugare zuva nezuva. Rugare rwechokwadi runoreva kumuka mangwanani ari ose pasina tyisidziro yehondo kana kuti yamasimba masimba. Runoreva kuti hakuchinazve utsotsi, hakuchinazve kiyi pamasuo edu, hakuchinazve kutya kufamba mumigwagwa, hakuchinazve mhuri dzakaparadzaniswa. Ihurumende ipi iri pasi pano inogona kuita zvose izvozvo? Zvirokwazvo, ihurumende ipi iri pasi pano ingatombotsunge kurwuvimbisa?
Umambo hwaMwari, zvisinei, hunogona uye huchaparira zvinhu izvozvi. Bhaibheri rinovimbisa kuti: “Tarirai, tabhenakeri yaMwari iri pakati pavanhu, iye uchagara navo, ivo vachava vanhu vake; Mwari amene uchava navo, ave Mwari wavo. Uchapisika misodzi yose pameso avo; rufu haruchavipo, kana kuchema, kana kurira, kana kutambudzika hazvingavipo; nokuti zvokutanga zvapfuura.” (Zvakazarurwa 21:3, 4) Ikoko kuchaunza rusununguko rwakadini kurudzi rwomunhu rwuri kutambura!
Chipikirwa chaJehovha Mwari hachisi chenhema. Bhaibheri rinotivimbisa kuti: “Mwari haazi munhu, haangarevi nhema; kunyange mwanakomana womunhu, haangashanduki; chaakataura, haangachiiti kanhi?” (Numeri 23:19) Hungu, izvo Mwari akapikira zvichaitika—kukukomborerwa kwavose vanomutsigira.
Nhume dzaMwari Dzorugare
Zvapupu zvaJehovha zvinozivikanwa zvikuru nokuda kwokuparidza kwazvo kwokushingaira pamusoro poUmambo hwaMwari. Gore rimwe nerimwe, pamwe chete zvinopedza maawa anopfuura bhiriyoni zvichigoverana shoko reBhaibheri rinofadza navamwe. Ikoku kunozadzika mashoko aJesu okuti: “Evhangeri iyi youshe ichaparidzirwa munyika dzose, chive chapupu kumarudzi ose; ipapo kuguma kuchasvika.” (Mateo 24:14) Shoko iro Zvapupu zvinounza zvirokwazvo i“evhangeri,” nokuti rinozivisa Umambo hwaMwari hwokudenga setariro bedzi yorudzi rwomunhu. Uye iyoyo itariro yakasimba zvakadini yenguva yemberi!
Kunyange zvino Umambo hwaMwari huri kubudisa muvadzorwi vahwo chisungo chapachokwadi cherugare nerudo rweuhama. Jesu akati: “Vose vachaziva naizvozvi kuti muri vadzidzi vangu, kana mune rudo pakati penyu.” (Johane 13:35) Zvapupu zvaJehovha zvinoedza kurarama maererano neichi chinodikanwa chikuru chechiKristu chechokwadi. Somugumisiro, hwazvo uhama hunoshamisa hunobatanidza vaJudha navaArabhu, vaCroatia navaSerb, vaHutu navaTutsi. Urwu rugare urwo ruzhinji rwerudzi rwomunhu rwunogona bedzi kurota nezvarwo zvino rwune mamiriyoni eZvapupu zvaJehovha munyika yose.
Kurudziro yokupfuurira kurarama maererano nenheyo dzeBhaibheri uye kuramba zvichiparidza mashoko akanaka oUmambo hwaMwari yakasimbiswa papurogiramu yeKokorodzano yoRuwa ye“Nhume Dzorugare rwaMwari.” Tinokukumbira kurava mushumo unotevera wekokorodzano yainyandura yamazuva matatu iyo mamiriyoni ave achifarikanya.