“Ibasa raJehovha”

Iwoyo wakanga uri musoro weimwe nyaya yomuEl Norte, pepanhau reMonterrey City, Mexico. Nyaya yacho yakanga iri pamusoro peHoro itsva Yamagungano yeZvapupu zvaJehovha.

Monterrey iguta rine chiverengero chavagari 2 300 000 (kubatanidza masabhabhu) murutivi rwokuchamhembe kweMexico, uye rine vaparidzi voUmambo 19 200. Kwerinenge gore nehafu, Zvapupu zvakabatanidza nhamburiko dzazvo dzokuvaka Horo Yamagungano yakaisvonaka uye inoshanda ine zvigaro zvakanaka 3 000 uye zvokudzikamisa tembiricha. Zvapupu zvomunzvimbomo zvakafara apo mumwe mutezo woMutumbi Unodzora weZvapupu zvaJehovha wakapa hurukuro yetsauriro. Purogiramu yacho yakabatanidza nhau pfupi yebasa muMonterrey, uye pakanga pane bvunzurudzo neavo vakaita rutivi mukuvaka. Ipapo vane 4 500 vaipinda musangano wacho vakafarikanya hurukuro yetsauriro.

Iyi ndiyo yechitatu yeHoro Dzamagungano dzemisi ichangobva kupfuura iyi dzakavakwa muMexico muchakarondedzerwa senhimbe ye“Horo dzoUmambo neDzamagungano Dzakawanda, Dzakakura, uye Dziri Nani.”

Nevanopfuura vaparidzi 443 000 muMexico, uye nevapindi vane 1 492 500 paChirangaridzo muna 1995, Horo Dzamagungano itsva, dzakadai seiyo iri muMonterrey, zvirokwazvo dzichabatira chinangwa choumwari.