Vamwarikadzi Voruzvaro uye Vehondo

MUKATI mebasa rokuchera matongo paEbla, Syria, chisaririra chinoratidzira Ishtar, mwarikadzi weBhabhironi weruzvaro nowehondo, chakawanwa. Wezvokuchera matongo Paolo Matthiae anochirondedzera se“chisimbiso chakatenderera chine chiono chokunamata chinoratidzira mupristakadzi akafukidzwa ari pamberi pemufananidzo mumwe woumwari . . . nomusoro wacho wakabatanidzwa nechitsigiso chirefu chakatetepa.”

Kuwanwa kwacho kunokosha, nokuti mufananidzo wacho ndowemusi unosvika kumavambo ezana ramakore rechi18 B.C.E. Maererano naMatthiae, ikoku kunopa “chibvumikiso chinopwisa” chokuti kunamatwa kwaIshtar kwakasvika makore 2 000.

Kunamatwa kwaIshtar kwakavamba muBhabhironi uye mumazana amakore akatevera kwakapararira muUmambo hwose hweRoma. Jehovha akaraira vaIsraeri kuparadza chisaririra chiri chose chorudzidziso rwenhema muNyika Yakapikirwa, asi nemhaka yokuti vakakundikana kuita saizvozvo, kunamatwa kwaAshtaroti (mubiyake wechiKanani waIshtar) kwakava musungo kwavari.—Dheuteronomio 7:2, 5; Vatongi 10:6.

Kunyange zvazvo Ishtar nomubiyake Ashtaroti vasati vachiripo, mavara avakamiririra—unzenza namasimba masimba—zvakapararira. Tingasanobvunza kana nzanga yazvino uno iri chaizvoizvo yakasiyana zvikuru kwazvo nepepuko idzodzo dzakare dzainamata ava vamwarikadzi voruzvaro uye vehondo.

[Mufananidzo uri papeji 20]

Vana vakabayirwawo kuna Tanit

[Kwazvakatorwa]

Ralph Crane/Bardo Museum