Yamuro Nokuda Kwavanyajambwa Vasina Mhaka

NDIYO imwe yemhaka dzinosembura zvikurusa dzati dzaparwa nomunhu—chibayiro chavana chetsika. Vamwe havadaviri kuti muitiro wakakomba zvakadaro ungagona kuva wakaitika. Asi ichi chiratidzo chekunamata kweFenikia kwakatsigirwa nezviwanwa zvoruzivo rwokuchera matongo.

Vana vaibva mumhuri dzoumambo vaibairwa mumwoto kuvamwari vakadai saTanit naBaal-Hammon. MuCarthage vanyajambwa vaduku vaipiswa muchibayiro kuchifananidzo chebronze chaKronos. Diodorus Siculus, wezvenhau wezana ramakore rokutanga B.C.E., anotaura kuti hama dzokunyama dzomwana wacho dzaisabvumirwa kuchema. Zvichida kwaidavirwa kuti misodzi yenhamo yaizoderedza ukoshi hwechibayiro chacho.

Kwenguva yakati tsika yakafanana yaiitwa pedyo neJerusarema muTofeti yakare. Vanamati imomo vaitamba ndokurova makandira kuti kuchema kwemwana wacho kusanzwike sezvaaikandwa mudumbu rechoto raMoreki.—Jeremia 7:31.

Jehovha anotsamwira zvikuru avo nenzira isina tsitsi vanoramba kurangarira kurwadziwa kwavamwe. (Enzanisa naZvirevo 21:13.) SaMwari anoratidza tsitsi kuna vana, Jehovha zvirokwazvo achabatanidza vanyajambwa vakadaro vasina mhaka mu“kumuka kwavakafa kwavakarurama navasakarurama.”—Mabasa 24:15; Eksodho 22:22-24.