Vazivisi voUmambo Vanoshuma
Kusvika Misha Iri Kure yeGreenland
KWAMAKUMI akawanda amakore Zvapupu zvaJehovha zvakashandisa magazini eNharireyomurindi neMukai! mukuparidzwa kwamashoko akanaka. Magazini aya anorumbidza uchenjeri hwaJehovha sezvinotaurwa muShoko rake, Bhaibheri. Anoramba achitarira zviitiko zvenyika zvine chokuita nouporofita hweBhaibheri, uye anoshandisa zano rine mufungo reBhaibheri kuzvinetso zvapanguva imwe cheteyo.—Jakobho 3:17.
Muna 1994, Zvapupu muGreenland zvakaita nhamburiko chaiyo yokugovera Nharireyomurindi neMukai! kuvanhu vakawanda savanobvira. Mukati mezhizha, vakaita gadziriro dzokushanyira mimwe yemisha iri kure zvikurusa muGreenland. Boka ravazivisi voUmambo rakafamba neigwa anopfuura makiromita 4 000 kukwira mhenderekedzo yegungwa yokumadokero kuenda kuQaanaaq (Thule), richisvika dzimwe dzenzanga dzokuchamhembe zvikurusa panyika. Rwendo rwavo rwakatora vhiki nomwe. Pamhenderekedzo yegungwa yokumabvazuva, zvimwe Zvapupu zvakaroorana zvakasvika musha uri muIttoqqortoormiit uye kwenguva yokutanga vakaifukidza nenzira ine nhevedzano namashoko akanaka.
Pakuvamba gore iroro, mukati memwedzi waApril, makopi 7 513 eNharireyomurindi neMukai! akagoverwa kuvanhu veGreenland. Ikoko kunoreva kuti, paavhareji, mumwe nomumwe wavaparidzi voUmambo 127 akagovera magazini 59. Magazini—1 nokuda kwavagari 7 vari vose. Mwedzi iwowo, Mukai! yakaburitsa nhevedzano yenyaya pasi pomusoro webutiro unoti “Kenza Yamazamu—Rutyo Rwomukadzi Ari Wose.” Chimwe Chapupu, icho chakagovera magazini 140, chakasiya makopi eMukai! iyoyo nemutori wenhau weterevhizheni. Mazuva mashoma gare gare, imwe purogiramu yeterevhizheni yenhau yakaburitsa nyaya pamusoro pekenza yamazamu. Mutori wenhau akaratidzira magazini yacho paterevhizheni, achiratidza mapeji anoverengeka kunaka kweshanduro yeGreenland. Akasimbisawo zvikarakadzo zvinoshanda zvakapiwa neMukai! setarisirwo youtano inodzivirira.
Chapupu chakagovera pakuvamba magazini acho kumutori wenhau chakabvunzurudzwa papurogiramu imwe cheteyo yeTV. Chakapindura mibvunzo yakati pamusoro peZvapupu zvaJehovha uye chakataura nezvekuparadzirwa kukuru kwamagazini mwedzi iwowo. Chakatsinhirawo pamusoro pouchenjeri hunoshanda hunowanika muBhaibheri ndokuonesa kuti zano rine mufungo rakadaro rinogona kutibetsera kugonana nezvinetso zvanhasi.
Purogiramu yacho yakaguma nekubvunzurudzwa kwapurezidhendi weGreenlandic Cancer Society. Akataura kuti akanga asina kutongoona mashoko akaisvonaka naanorayiridza akadaro panhau iyi mumutauro wake. Ipapo akakumbira vose vaifarira nhau yekenza yamazamu kurava nyaya dzeMukai!. Akataura kuti pakanga pane chikonzero chakanaka chokuonga Zvapupu zvaJehovha nokuda kwokutanga kwazvo.
SomuGreenland, Zvapupu zvaJehovha kupota nyika zvinopfuurira kuparidza mashoko akanaka mu“zvisikwa zvose pasi pokudenga.” (VaKorose 1:23; Mabasa 1:8) Nokushandiswa kwemabhuku eBhaibheri, kubatanidza Nharireyomurindi neMukai!, zvinobatsira vanhu vamarudzi ose kugonana nezvinetso zvomuzuva razvino pamwe chete nokuvapa tariro yenguva yemberi iri nani.
[Mepu iri papeji 8]
(Kana uchida mashoko azere, ona bhuku racho)
Qaanaaq (Thule)
Ittoqqortoormiit
Nuuk (Godthåb)