Kuenda Kudenga kana kuti kuHero Here?
“NDEDZIPI dziri bviro dzako dzokuenda kudenga kana kuti dzokuenda kuhero?”
Zvikurukuru, izvozvo zvakabvunzwa boka rinomirira vaAmerica mukunzvera kwemisi ichangobva kupfuura iyi. Princeton Religion Research Center yakabudisa miuyo yacho muReligion in America 1992-1993.
Waizodai wakapindura sei? Ndedzipi dziri bviro dzokuti mukwanyina wako kana kuti vamwe vadiwa vaende kudenga parufu? Unofunga kuti kunobvira here kuti iwe, kana kuti ivo, mungaenda kuhero pakupedzisira?
Nzvero yacho yakaratidza kuti 78 muzana yaifunga kuti bviro dzavo dzokuenda kudenga dzakanga dzakanaka kana kuti dzakaisvonaka, vanopfuura chiverengero chakapindura nenzira iyoyo anenge makore 40 akapfuura. Hero? Vanenge 77 muzana vakataura kuti bviro yokuenda ikoko yakanga iri duku.
Mhinduro dzavo dzakanga dzakavakirwa pazivo yakarurama yeBhaibheri here? Eya, vanenge vana mugumi vakabvuma kupinda minamato yorudzidziso kashomanene kupfuura zvavaiita makore mashanu akapfuura. Vane 28 muzana bedzi vakataura kuti vanogoverana mumapoka efundo yeBhaibheri uye vane 27 muzana mumakirasi edzidzo yorudzidziso.
Kana ukasanofunda Bhaibheri, uchawana maidi anoshamisa. Somuenzaniso, Bhaibheri rinotaura nenzira yakananga kuti parufu Jesu akaenda ku“hero,” sezvinoshandurwa mudzimwe shanduro dzeBhaibheri. (Mabasa 2:31, King James Version; “Hadhesi,” New World Translation) Shoko raMwari rinobvumikisawo kuti Mambo Dhavhidhi uyewo Johane Mubhapatidzi havana kuenda kudenga parufu. (Mateo 11:11; Mabasa 2:29) Iwayo maidi, kwete mifungowo zvayo yakabva mukunzvera kworudzidziso.
Mamwe maidi ayo angakutapura: Bhaibheri rinodzidzisa kuti vaapostora vaJesu nechiverengero chakaganhurirwa chavamwe chichaendeswa kudenga kuti vatonge naJesu. Zvisinei, voruzhinji vavanhu vakafa vakangoenda kuguva ravose rorudzi rwomunhu. Mwari achavamutsa, achivaunza kuupenyu pasi pano nekariro youpenyu hwakazara, hunofadza, husingagumi muparadhiso yapasi ichadzorerwa.
Zvapupu zvaJehovha zvingafadzwa kukubetsera kubvumikisa muBhaibheri rako umene hwaro hwakavimbika hwetariro iyoyo.