Takafanana Chaizvo Nemhashu

WATI wambovhakacha muuswa muzhezha ndokuona mhashu dzisingaverengeki dzichisvetuka dzichibva munzira yako here? Idzo dzakaratidzika kuva dziri munzvimbo iri yose, kunyange zvazvo ungave wakadzipa ngwariro shomanene. Pashure pokurangarira zvose, idzo dzinoratidzika kuva dzisingakuvadzi nedzisingakoshi.

Bva, kudokuva dzisingakoshi kwemhashu kunodziita chiratidzo chakakodzera chorudzi rwomunhu. Kunyange zvazvo vanhu vakatanhamara vangazvirangarira vamene kuva vanokosha zvikuru, Musiki wedu anofunga neimwe nzira. Muporofita wake Isaya akati: “Ndiye ugere kumusoro kwenyika yakaurungana, vanhu vagerepo vakaita semhashu.”—Isaya 40:22.

Ukuru, simba, uye uchenjeri zvaJehovha Mwari zvinomukwidza pamusoro zvikuru penzvimbo yavanhuvo zvavo, sezvo munhu ari mukuru zvikuru kumhashu muungwaru nesimba. Zvisinei, vara gurusa raMwari rudo. Uye rudo rwake rwusingaenzaniswi runomusunda kuticherechedza, kutibetsera, uye kutiponesa—kana tichimuda nokumuteerera. Jehovha anobata nesu nenzira yorudo, kunyange zvazvo takafanana nemhashu dzisingakoshi. Wezvamapisarema akati: “Ndianiko akafanana naJehovha Mwari wedu, iye unogara kumusoro, iye unozvidukupisa kuti aone zviri kudenga napasi? Unosimudza murombo abve muguruva.”—Pisarema 113:5-7.

Seizvo iri pisarema rinotsanangura, Jehovha anopa nenzira yorudo betsero kuvakaderera. Hungu, Iye anobetsera avo nokuzvininipisa ‘vanotsvaka Mwari kuti vagomuwana chaizvoizvo.’ (Mabasa 17:27) Avo vanowana Mwari—uye vanomubatira—vanotova vanokosha mumeso ake. (Enzanisa naIsaya 43:4, 10.) Mhashu inozvininipisa nokudaro inobatira kutiyeuchidza nezvokusakosha kwedu timene uye nezvorudo rwoMusiki wedu wamasimba ose, uyo anopa vanhu vanoteerera ushamwari hwake nomutsa usakafanirwa. Iwe unoratidza kuonga rudo rwaMwari here?