Icho chiKristudhomu Chakadyara muAfrica
MUNA 1867, Charles Lavigerie, muKaturike weFrance, akauya kuAfrica sabhishopi mukuru akanga achangobva kugadzwa weAlgiers. “Mwari akasarudza France,” iye akadaro, “kuita Algeria mavambo orudzi rukuru norwechiKristu.”
Chiroto chaLavigerie chakapfuura Algeria. Kutaura idi, iye akatumira vafundisi mhiri kwerenje ane nharidzano yo“kubatanidza Central neNorthern Africa noupenyu hwavose hwechiKristudhomu.”
Munguvayo, mumativi okumadokero, okumaodzanyemba, uye okumabvazuva enyika yacho, vafundisi vePurotesitendi vakanga vachitoshanda. Ivo vakatsungirira nhamo dzakawanda, zvakadai sedenho dzinoitika dzaitikazve dzemararia, nezviratidzo zvayo zvokubvunda, kudikitira, uye kurasa pfungwa. Vaneteswa nokukurumidza nezvirwere zvomumativi apasi anopisa, vazhinji vakafa nokukurumidza pashure pokusvika. Asi vamwe vakaramba vachiuya. “Munhu upi noupi anofamba muAfrica,” akadaro Adlai Stevenson, “anoyeuchidzwa nguva dzose nezvoumhare hwavafundisi. . . . Ivo vakarwisa yellow fever, rupanzo, hosha inoparirwa nezvinorarama nezvimwe uye . . . ndakaona . . . mabwe apamakuva avo—muAfrica yose.”
Chibereko Choufundisi
Sezvo vafundisi vakapinda muAfrica, vakawana kuti marudzi akawanda zvikurusa akanga asingagoni kurava kana kuti kunyora. “Pamitauro [yeAfrica] inenge mazana masere,” anotsanangura kudaro Ram Desai mubhuku rake Christianity in Africa as Seen by Africans, “mina bedzi yainyorwa pamberi pokuuya kwavafundisi.” Naizvozvo vafundisi vakavamba nzira yokunyora nayo iyi mitauro isinganyorwi. Ipapo ivo vakaita mabhuku anofundwa ndokutanga kudzidzisa vanhu kurava. Nedonzo iroro vakavaka zvikoro muAfrica mose.
Vafundisi vakavakawo zvipatara. “Hakuna rimwe sangano rinogona kuwirirana nechinyorwa chavo chebasa romutsa,” anobvuma kudaro Ram Desai. Kunze kwetarisiro yokurapwa, vaAfrica vakatsvaka zvinhu zvokunyama zveEurope. Vafundisi vakatanga nzvimbo dzokutengesera, sezvo vaidavira kuti ikoku kwaizokwezva vatendeuki. Somuenzaniso, Basel Mission yakabva Switzerland yakatanga kambani yokutengesa muGhana. Ivo vakawana kuti miti yemicacao yaikura zvakanaka imomo, uye nhasi Ghana mugadziri mukurusa wechitatu wenyika wecocoa.
Chiitwa chakatanhamara chavafundisi vechiKristudhomu kwakanga kuri kushandura kwavo Bhaibheri. Bva kuparadzira shoko reBhaibheri kune mumwe mutoro wakakomba. Muapostora wechiKristu Pauro akaratidza iwoyu kupfurikidza nokubvunza, kuti: “Iwe, . . . unodzidzisa mumwe munhuwo zvake, hauzvidzidzisi umene here? Iwe, unoparidzira kuti ‘Usaba,’ unoba here?” Bhaibheri rinonyevera kuti avo vanodzidzisa chiKristu vanofanira ivo vamene kurarama mukuwirirana nenheyo dzakaisvonaka dzinooneswa muShoko raMwari.—VaRoma 2:21, 24, NW.
Zvakadiniko nebasa rechiKristudhomu kuAfrica? Ko icho chakakudza here Mwari weBhaibheri, kana kuti chakakwenengera dzidziso dzechiKristu?