“Zvapupu zvaJehovha Here?”

MUBVUNZO uri pamusoro apa wakaoneka somusoro muBulletin of the University of Helsinki mumutauro weFinland. Pasi pomusoro wacho paiva netsamba yakanyorwa naPurofesa Jorma Palo, uye iyo yakati murutivi: “Ndakasanonzvera chitsikiso cheyunivhesiti yedu chakadhindwa pabutiro reBulletin. Pakati pehafu yapamusoro, ndakawana rugwaro rwechiHebheru revo yarwo ndakabvunza mushanyi wangu wechiJudha. Mukuwirirana neiyi nyanzvi, iyo inoziva chiHebheru, iri shoko ndi‘Jehovha’ muchiFinland.”

Kuvapo kwezita romunhu oga raMwari pachitsikiso cheiyi yunivhesiti yeFinland kwakashamisa vamwe. Kutaura idi, kunyanguvezvo, yunivhesiti yacho yagara makore 350, uye apo yakavambwa, zita rokuti Jehovha raizivikanwa zvakafara nokushandiswa zvakafara muEurope mose. Zita racho rinooneka pazvivako zvavose zvisingaverengeki, mari, uye zvitsikiso zvinovambira panhambo iyoyo.—Ona bhurocha rinonzi Zita raMwari Richagara Nokusingaperi.

Muzana redu ramakore, chiKristudhomu hachisati chichashandisa zita raMwari, uye fariro iya yapakuvamba mariri yakanganwika zvikuru. Boka rimwe bedzi rinoshandisa zita roumwari mukunamata uye rinorizivisa zvakafara, mutsinhirano nechikumbiro chokutanga chiri muMunyengetero waShe, unoti: “Baba vedu vari mumatenga, zita renyu ngaritsveneswe.” (Mateo 6:9, NW) Ndokusaka, apo zita racho rakaziviswa pachitsikiso cheyunivhesiti, vanhu vakakurumidza kufunga nezveZvapupu zvaJehovha.

[Vakatipa Mufananidzo uri papeji 32]

Yliopisto