Kushandisa Rudzidziso Rwakachena Nokuda Kwokupukunyuka

“Rudzidziso rwakachena norwapachokwadi mukuona kwaMwari naBaba ruchazviratidza rumene kupfurikidza nezvinhu zvakadai . . . sokuzvichengeta umene usina kusvibiswa nenyika.”—JAKOBHO 1:27, Phillips.

1. Rudzidziso rwakarondedzerwa sei, uye nenzira ine mufungo ndiani ane maruramiro okusarudza musiano pakati porudzidziso rwenhema norwechokwadi?

RUDZIDZISO rwakarondedzerwa so“kuratidzirwa kwechitendero chomunhu noruremekedzo nokuda kwesimba rinopfuura rohunhu rinozivikanwa somusiki nomudzori wechisiko chapose pose.” Ndiani, ipapoka, nenzira ine mufungo ane maruramiro okusarudza musiano uri pakati porudzidziso rwechokwadi norudzidziso rwenhema? Zvirokwazvo anofanira kuva Uyo anodavirwa naanoremekedzwa, Musiki. Jehovha akaonesa zvakajeka muShoko rake murangariro wake parudzidziso rwechokwadi norwenhema.

Shoko Rokuti “Rudzidziso” muBhaibheri

2. Maduramashoko anotsanangura sei shoko rechiGiriki rapakuvamba rakashandurwa kuti “chimiro chokunamata” kana “rudzidziso,” uye kumarudzii okunamata kwarinogona kushandiswa?

² Shoko rechiGiriki rinoshandurwa kuti “chimiro chokunamata,” kana “rudzidziso,” ndithre·skeiʹa. A Greek-English Lexicon of the New Testament rinorondedzera iri shoko so“kunamatwa kwaMwari, rudzidziso, zvi[kurukuru] sezvarunozviratidzira rumene mubasa rorudzidziso kana kuti tsika yokunamata.” Theological Dictionary of the New Testament rinogovera humwe hudzame, richiti: “Mavambo acho anoitirwa nharo; . . . nyanzvi dzazvino uno dzinoda kubatana netherap- (‘kubatira’). . . . Kusianiswa kwerevo kungacherekedzwawo. Pfungwa yakanaka ndi‘shingairo yorudzidziso’ . . . , ‘kunamatwa kwaMwari,’ ‘rudzidziso.’ . . . Asi panewo pfungwa yakaipa, ndiko kuti, ‘kunyanyisa kworudzidziso,’ ‘kunamata kusina kururama.’” Nokudaro, thre·skeiʹa ringashandurwa kuti “rudzidziso” kana kuti “chimiro chokunamata,” chakanaka kana kuti chakaipa.

3. Muapostora Pauro akashandisa sei shoko rinoshandurwa kuti “chimiro chokunamata,” uye itsinhiroi inofadza inoitwa pashanduro yaVaKorose 2:18?

³ Iri shoko rinooneka kane kana bedzi muMagwaro echiKristu echiGiriki. Muapostora Pauro akarishandisa kaviri kuratidzira rudzidziso rwenhema. Pana Mabasa 26:5 (NW), iye anonyorwa saari kududza kuti asati ava muKristu, “mukuwirirana nesekete rorumano zvikurusa rechimiro chedu chokumanata [“rudzidziso,” Phillips] ndairarama somuFarise.” Mutsamba yake kuvaKorose, iye akanyevera, kuti: “Munhu ngaarege kuvapo unokutorerai mubairo namaune, nokuzvininipisa nokunamata [ngirozi, NW].” (VaKorose 2:18) Kunamata ngirozi kwakadaro sezviri pachena kwakanga kwakapararira muFirigia mumazuva iwayo, asi chakanga chiri chimiro chorudzidziso rwenhema.a Nenzira inofadza, nepo dzimwe shanduro dzeBhaibheri dzichishandura thre·skeiʹa so“rudzidziso,” pana VaKorose 2:18 zhinjisa dzinoshandisa shoko rokuti “kunamata.” New World Translation inoshandura nguva dzose thre·skeiʹa se“chimiro chokunamata,” mashoko omuzasi muReference Bible achidudza nguva imwe neimwe imwe shanduro yo“rudzidziso” inoshandiswa mushanduro dzechiLatin.

“Kwakachena Nokusina Kuzvibiswa” Mumurangariro waMwari

4, 5. (a) Mukuwirirana naJakobho, murangariro waani parudzidziso unokosha zvikurusa? (b) Chii chingagona kuita kuti chimiro chomunhu chokunamata chive chisina maturo, uye chii chinorehwa neshoko rinoshandurwa kuti “chisina maturo”?

⁴ Kumwe kuoneka kuviri kweshoko rokuti thre·skeiʹa kuri mutsamba yakanyorwa nomudzidzi Jakobho, mutezo womutumbi unodzora weungano yechiKristu yomuzana rokutanga ramakore. Iye akanyora, kuti: “Kana munhu achiti ndinonamata Mwari, [“kuva wo‘rudzidziso,’” Phillips] asingadzori rurimi rwake, asi achinyengera mwoyo wake, kutenda kwaiyeyo munhu [“rudzidziso,” Phillips] hakuna maturo. Kunamata, kwakarurama, [“rudzidziso,” Phillips] kusina mhosva pamberi paMwari wedu naBaba, ndiko kufambira nherera nechirikadzi pakutambudzika kwavo, nokuzvichengeta, kuti arege kusvibiswa nenyika.”—Jakobho 1:26, 27.

⁵ Hungu, kucherechedza murangariro waJehovha parudzidziso kunokosha kana tichida kuva netendero yake uye kupukunyuka ndokupinda munyika itsva yaakapikira. (2 Petro 3:13) Jakobho anoratidza kuti munhu angaratidzika kwaari amene kuva worudzidziso zvirokwazvo nepo chimiro chake chokunamata chingagona kuva chisina maturo. Shoko rechiGiriki rinoshandurwa pano kuti “chisina maturo” rinorevawo kuti “usimbe, kusava nechinhu, kusava nezvibereko, kusava namaturo, kusava nesimba, kushaiwa zvokwadi.” Ikoku kungagona kuva kwakadaro kana mumwe munhu anotaura kuva muKristu asina kudzora rurimi rwake ndokurushandisa kurumbidza Mwari nokuvaka maKristu biyake. Aizova “achitsausa mwoyo wake amene” uye asingashandisi “rudzidziso rwakachena norwapachokwadi mukuona kwaMwari.” (Phillips) Murangariro waJehovha ndiwo unokosha.

6. (a) Chii chiri musoro wetsamba yakanyorwa naJakobho? (b) Ndichinodikanwai nokuda kwokunamata kwakachena icho Jakobho akasimbisa, uye chii icho Mutumbi Unodzora womuzuva razvino uno wakataura muna ikoku?

⁶ Jakobho haadudzi zvinhu zvose izvo Jehovha anoda pamusoro pokunamata kwakachena. Mukuwirirana nomusoro mukuru wetsamba yake, uyo uri kutenda kunobvumikiswa namabasa nokudikanwa kwokuramba vakaparadzana noushamwari nenyika yaSatani, iye anosimbisa zvikwaniriso zviviri chete. Chimwe ndecho“kufambira nherera nechirikadzi pakutambudzika kwavo.” Ikoku kunobatanidza rudo rwechokwadi rwechiKristu. Jehovha nguva dzose akaratidza itiro hanya yorudo nokuda kwenherera nechirikadzi. (Dheuteronomio 10:17, 18; Maraki 3:5) Rimwe ramabasa okutanga omutumbi unodzora womuzana ramakore rokutanga weungano yechiKristu rakanga riri nokuda kwechirikadzi dzechiKristu. (Mabasa 6:1-6) Muapostora Pauro akapa mirairidzo ine udzame yokugovera tarisiro yorudo nokuda kwechirikadzi dzakura dzinoshaiwa idzo dzakanga dzazvibvumikisa dzimene kuva dzakatendeka mumakore akapfuura uye dzakanga dzisina mhuri yokudzibetsera. (1 Timotio 5:3-16) Mutumbi Unodzora womuzuva razvino uno weZvapupu zvaJehovha nenzira yakafanana wakapa mirairidzo yakajeka pa“Kutarisira Varombo,” uchiti: “Kunamata kwechokwadi kunobatanidza kutarisira vakatendeka navakavimbika vangave vachishaiwa betsero yokunyama.” (Ona bhuku raTakarongwa Kupedza Hushumiri Hwedu, mapeji 122-3.) Mitumbi yavakuru kana kuti maKristu mamwe namamwe avo vanozviratidza vamene vachiregeredza muna ikoku vari kurega rutivi runokosha rwechimiro chokunamata kwakachena nokusina kusvibiswa mumurangariro waMwari wedu naBaba.

“Asina Ruvara Runobva Munyika”

7, 8. (a) Ndichinodikanwai chechipiri chorudzidziso rwechokwadi icho Jakobho akadudza? (b) Vakuru vakuru vorudzidziso navaprista vanosvitsa ichi chinodikanwa here? (c) Chii chinogona kutaurwa nezveZvapupu zvaJehovha?

⁷ Chinodikanwa chechipiri nokuda kworudzidziso rwechokwadi chakadudzwa naJakobho chakanga chiri “kuzvichengeta usina ruvara runobva munyika.” (NW) Jesu akati: “Umambo hwangu hahusati huri rutivi rwenyika ino”; nenzira inowirirana, vateveri vake vechokwadi vaizova “vasati vari rutivi rwenyika.” (Johane 15:19, 18:36, NW) Ikoku kunogona kutaurwa nezvavafundisi navaprista vorupi norupi rwamarudzidziso enyika ino here? Vanotsigira Chibatanwa chaMarudzi. Vazhinji vavatungamiriri vavo vakagamuchira kokero yapapa yokusangana muAssisi, Italy, muna October 1986 kuzobatanidza minyengetero yavo nokuda kwokubudirira kwe“Gore Ramarudzi Ose Rorugare” rinotsigirwa neCM. Zvisinei, nhamburiko dzavo dzakava pasina, tichirangarira namamirioni akaurawa muhondo dzegore iroro nomumakore chibviro chaipapo. Vafundisi kazhinji kazhinji vanoshamwaridzana nebato rinotonga rezvamatongerwe enyika, apo vanenge vachiva nebatano dzapachivande nenzira yokunyengera nechishoro kuti ani naani anotonga agovarangarira se“shamwari.”—Jakobho 4:4.

⁸ Zvapupu zvaJehovha zvakazviitira zvimene mukurumbira samaKristu anoramba asingatori rutivi mune zvamatongerwe enyika nebonderano dzenyika ino. Zvinochengeta ichi chimiro munyika dzose nomumarudzi ose, sezvinopupurirwa nemishumo yepepanhau nezvinyorwa zvazvino uno zvenhau mumativi ose enyika. Zvirokwazvo “havana ruvara runobva munyika.” Rwavo “rudzidziso rwakachena norwapachokwadi mukuona kwaMwari.”—Jakobho 1:27, Phillips.

Zvimwe Zviratidzo Zvorudzidziso Rwechokwadi

9. Ndichinodikanwai chechitatu chorudzidziso rwechokwadi, uye nei?

⁹ Kana rudzidziso rwuri “ruremekedzo nokuda kwesimba rinopfuura rohunhu rinozivikanwa somusiki nomudzori wechisiko chapose pose,” zvirokwazvo rudzidziso rwechokwadi runofanira kunangidzira kunamata kuna Mwari bedzi wechokwadi, Jehovha. Hakufaniri kuvhiringidza kunzwisisa kwavanhu Mwari kupfurikidza nokudzidzisa mifungo yechihedheni yakadai samwari woutatu umo Baba anogoverana uchangamire hwake, mbiri, uye kusaguma navamwe vanhu vaviri muUtatu hwakavanzika. (Dheuteronomio 6:4; 1 VaKorinte 8:6) Kunofanirawo kuzivisa zita risingaenzaniswi raMwari, Jehovha, uye kukudza zita iroro, kutakura zita iroro zvirokwazvo savanhu vakarongeka. (Pisarema 83:18; Mabasa 15:14) Muna ikoku vashandisi vako vanofanira kutevera muenzaniso waKristu Jesu. (Johane 17:6) Vanhui nhasi vanosvitsa ichi chinodikanwa kunze kweZvapupu zvechiKristu zvaJehovha?

10. Kuti rudzidziso rugovere kupukunyuka ndokupinda munyika itsva yaMwari, chii charunofanira kuita, uye nei?

¹⁰ Muapostora Petro akataura, kuti: “Hakuna kuponeswa kuno mumwe; nokuti hakuna rimwe zita [Jesu Kristu] pasi pedenga, rakapiwa pakati pavanhu, ratingasunungurwa naro.” (Mabasa 4:8-12) Rudzidziso rwechokwadi urwo ruchapa kupukunyuka ndokupinda munyika itsva yaMwari runofanira, naizvozvo, kuisa kutenda muna Kristu nomuukoshi hwechibairo chorudzikinuro. (Johane 3:16, 36; 17:3; VaEfeso 1:7) Uyezve, runofanira kubetsera vanamati vechokwadi kuzviisa pasi paKristu saMambo anotonga waJehovha noMuprista Mukuru akazodzwa.—Pisarema 2:6-8; VaFiripi 2:9-11; VaHebheru 4:14, 15.

11. Rudzidziso rwechokwadi runofanira kuvakirwa pachii, uye chii chiri chimiro cheZvapupu zvaJehovha muna ikoku?

¹¹ Rudzidziso rwakachena runofanira kuvakirwa pakuda kwakaziviswa kwaMwari mumwe wechokwadi uye kwete pamagamuchidzanwa akaitwa navanhu kana kuti uzivi. Taisazoziva chinhu nezvaJehovha namadonzo ake anoshamisa, kana kuti nezvaJesu nechibairo chorudzikinuro, kudai kwakanga kusiri nokuda kweBhaibheri. Zvapupu zvaJehovha zvinoisa muvanhu chivimbo chisingazununguki muBhaibheri. Zvinobvumikisawo nokurarama kwazvo kwezuva nezuva kuti zvinobvumirana nokutaura kwomuapostora Pauro, kunoti: “Rugwaro rwose rwakafuridzirwa naMwari uye runobetsera nokuda kwokudzidzisa, nokuda kwokutsiura, nokuda kwokururamisa zvinhu, . . . kuti munhu waMwari agokwaniswa zvizere, akashongedzerwa chose chose nokuda kwebasa riri rose rakanaka.”—2 Timotio 3:16, 17, NW.

Rudzidziso Rwechokwadi—Nzira Youpenyu

12. Mukuwedzera kukutenda, chii chiri madikanwa kuti kunamata kuve kwechokwadi, uye rudzidziso rwechokwadi inzira youpenyu mumativii?

¹² Jesu akazivisa, kuti: “Mwari Mudzimu, uye avo vanomunamata vanofanira kunamata nomudzimu nezvokwadi.” (Johane 4:24, NW) Rudzidziso rwechokwadi, kana kuti chimiro chokunamata, harusati ruri, naizvozvo, ratidzirwo yomuitiro, yetsika, yokunze youmwari. Kunamata kwakachena ndokwomudzimu, kwakavakirwa pakutenda. (VaHebheru 11:6) Kutenda ikoko kunofanira, zvisinei, kutsigirwa namabasa. (Jakobho 2:17) Rudzidziso rwechokwadi runoramba miitiro yakakurumbira. Runoomerera kumipimo yeBhaibheri yetsika nokutaura kwakachena. (1 VaKorinte 6:9, 10; VaEfeso 5:3-5) Vashandisi varwo vanotamburira zvapachokwadi kubereka zvibereko zvomudzimu waMwari muupenyu hwavo hwemhuri, pabasa ravo rokunyika, muchikoro, uye kunyange muvaraidzo yavo. (VaGaratia 5:22, 23) Zvapupu zvaJehovha zvinoedza kusatongokanganwa zano romuapostora Pauro, rinoti: “Naizvozvo, kana muchidya kana kuti muchinwa kana kuti kuita chinhu chipi nechipiwo zvacho, itai zvinhu zvose nokuda kwembiri yaMwari.” (1 VaKorinte 10:31, NW) Rudzidziso rwazvo harusati ruri muitirowo zvawo; inzira youpenyu.

13. Kunamata kwechokwadi kunobatanidzei, uye nei kuchigona kutaurwa kuti Zvapupu zvaJehovha vanhu vorudzidziso zvirokwazvo?

¹³ Chokwadika, rudzidziso rwechokwadi runobatanidza mibato yomudzimu. Iyoyi inobatanidza munyengetero womunhu oga nowemhuri, fundo yenguva dzose yeShoko raMwari nebetsero dzefundo yeBhaibheri, uye kupinda misangano yeungano yechiKristu chechokwadi. Iyi yapashure inozarurwa nokupfigwa nenziyo dzerumbidzo kuna Jehovha uye neminyengetero. (Mateo 26:30; VaEfeso 5:19) Nyaya dzinovaka mumudzimu dzinonzverwa kupfurikidza nehurukuro nekurukurirano dzemibvunzo nemhinduro dzamashoko akatsikirirwa anowanika kuvose. Misangano yakadaro kazhinji kazhinji inoitirwa muHoro dzoUmambo dzakachena asi dzisiri dzamaoresa, idzo dzinoshandiswa chose chose nokuda kwamadonzo orudzidziso: misangano yenguva dzose, michato, zvirangaridzo. Zvapupu zvaJehovha zvinoremekedza Horo dzoUmambo dzazvo neHoro huru dzaMagungano senzvimbo dzakatsaurirwa kukunamata Jehovha. Kusafanana namachechi mazhinji echiKristudhomu, Horo dzoUmambo hadzisi makirabhu omunzanga.

14. Kunamata kwairevei kuna vanhu vanotaura chiHebheru, uye mubatoi unosianisa Zvapupu zvaJehovha nhasi?

¹⁴ Taona pakuvamba kuti nyanzvi dzinobatanidza shoko rechiGiriki rinoshandurwa kuti “chimiro chokunamata” kana kuti “rudzidziso” neshoko rechiito rokuti “kubatira.” Nenzira inofadza, rinowirirana nerechiHebheru, ‛avo·dhahʹ, rinogona kushandurwa kuti “basa” kana kuti “kunamata.” (Enzanisa mashoko omuzasi ari pana Eksodho 3:12 na 10:26.) KuvaHebheru, kunamata kwaireva basa. Uye ikoku ndiko kwakunoreva nokuda kwavanamati vechokwadi nhasi. Vara rinokosha zvikuru, rinosianisa rorudzidziso rwechokwadi nderokuti vose vanorushandisa vanogoverana mubasa roumwari rokuparidzira “aya mashoko akanaka oumambo . . . mupasi rose rinogarwa nokuda kwouchapupu kumarudzi ose.” (Mateo 24:14, NW; Mabasa 1:8; 5:42) Rudzidzisoi runozivikanwa munyika yose nokuda kwokupupurira kwarwo pachena kuUmambo hwaMwari setariro bedzi yorudzi rwomunhu?

Simba Rakanaka, Rinobatanidza

15. Chii chiri vara rakatanhamara rorudzidziso rwechokwadi?

¹⁵ Rudzidziso rwenhema runokamuranisa. Rwakaparira, uye ruchiri kuparira, ruvengo nokudeura ropa. Mukupesana, rudzidziso rwechokwadi runobatanidza. Jesu akati: “Kupfurikidza naikoku vose vachaziva kuti muri vadzidzi vangu, kana mune rudo pakati penyu mumene.” (Johane 13:35, NW) Rudo urwo runobatanidza Zvapupu zvaJehovha runopfuura miganhu yorudzi, yenzanga, yezvemari, uye yedzinza iyo inokamuranisa vasara vose vorudzi rwomunhu. Zvapupu “zvakamira zvakasimba mumudzimu mumwe, nomweya mumwe zvichitamburira pamwe chete nokuda kwokutenda kwamashoko akanaka.”—VaFiripi 1:27, NW.

16. (a) “Mashoko akanaka” akadini ayo Zvapupu zvaJehovha zvinoparidzira? (b) Mauporofitai ari kuzadzikwa pavanhu vaJehovha, uye zvikomboreroi zvakatevera?

¹⁶ “Mashoko akanaka” azvinoparidzira ndookuti nokukurumidza donzo risingachinji raMwari richaitwa. Kuda kwake kuchaitwa, “panyika sezvakunoitwa kudenga.” (Mateo 6:10) Zita rine mbiri raJehovha richatsveneswa, uye pasi richava paradhiso, umo vanamati vechokwadi vachakwanisa kugara nokusingaperi. (Pisarema 37:29) Mamirioni chaiwoiwo avanhu munyika dzose ari kusonganirana neZvapupu zvaJehovha, achiti, muzadziko youporofita hweBhaibheri: “Tichaenda nemi imi vanhu, nokuti takanzwa kuti Mwari anemi vanhu.” (Zekaria 8:23, NW) Jehovha ari kukomborera vanhu vake. “Muduku” azova zvirokwazvo “rudzi rune simba,” ungano yenyika yose yakabatana chose chose murutivi ruri rwose—mumufungo, mubasa, mukunamata. (Isaya 60:22) Ichochi ndichimwe chinhu rudzidziso rwenhema rusina kutongokwanisa kuita.

Rukundo Rworudzidziso Rwakachena

17. Chii chakachengeterwa Bhabhironi Guru, uye ikoku kuchaitwa sei?

¹⁷ Shoko raMwari rakadeya kutaura ruparadziko rwoumambo hwenyika hworudzidziso rwenhema, nenzira yokufananidzira runonzi “Bhabhironi Guru.” Bhaibheri rinoratidzirawo “madzimambo,” kana kuti vatongi vezvamatongerwe enyika, vapasi kupfurikidza nechiratidzo chenyanga dzechikara. Rinotiudza kuti Mwari achaisa mumwoyo yaava vatongi donzo rokupidigura ndokuparadza chose chose iri sangano rakafanana nemhombwe raSatani Dhiabhorosi.—Ona Zvakazarurwa 17:1, 2, 5, 6, 12, 13, 15-18.b

18. Chikonzeroi chinokosha icho Bhaibheri rinopa nokuda kwokuparadza Bhabhironi Guru, uye rudzidziso rwenhema rwakatanga rini munzira iyi inotyisa?

¹⁸ Neiko Bhabhironi Guru richifanirwa noruparadziko? Bhaibheri rinopindura, kuti: “Mukati maro makawanikwa ropa ravaporofita neravatsvene, neravose vakaurawa panyika.” (Zvakazarurwa 18:24) Achiratidza kuti iyi mhaka yeropa yakawanwa norudzidziso rwenhema inodzokera shure kunyange kupfuura kuvambwa kweBhabhironi, Jesu akashurikidza vatungamiriri vorudzidziso vechiJudha, icho chakanga chazvibatanidza chimene neBhabhironi Guru, paakati: “Imi nyoka, imi vana venyoka! Muchatiza seiko kutonga kweGehena? . . . Kuti ropa rose ravakarurama, rakateurirwa panyika, ri[cha]uya pamusoro penyu, kubva paropa raAbheri wakanga akarurama.” (Mateo 23:33-35) Hungu, rudzidziso rwenhema, urwo rwakavamba pasi pano panguva yorupandukiro muEdheni, runofanira kupindura nokuda kwemhaka yarwo yeropa inotyisa yakaipisisa.

19, 20. (a) Vanamati vechokwadi vachaitei pashure pokunge rutongeso rwaitwa paBhabhironi Guru? (b) Chii chichaitika ipapo, uye ikariroi ichazaruka pamberi pavanamati vose vechokwadi?

¹⁹ Pashure poruparadziko rweBhabhironi Guru, vanamati vechokwadi pasi pano vachabatanidza manzwi avo nekwaya yokudenga iyo inoimba, kuti: “Rumbidzai Jah, imi vanhu! . . . Nokuti iye aita rutongeso pamhombwe huru . . . , uye akatsiva ropa ravaranda vake paruoko rwayo. . . . Uye utsi hunobva pairi hunoramba huchikwira nokusingaperi-peri.”—Zvakazarurwa 19:1-3, NW.

²⁰ Ipapo mamwe mativi anoumba sangano rinooneka raSatani achaparadzwa. (Zvakazarurwa 19:17-21) Pashure paikoku, Satani, muvambi worudzidziso rwose rwenhema, uye madhemoni ake vachapinzwa mugomba rakadzika-dzika. Havasati vachizovazve vakasununguka kutambudza vanamati vechokwadi vaJehovha. (Zvakazarurwa 20:1-3) Rudzidziso rwakachena ruchave rwakunda rwenhema. Varume vakatendeka navakadzi avo vanoteerera nyevero youmwari yokutiza zvino muBhabhironi Guru vachava nebanza rokupukunyuka ndokupinda munyika itsva yaMwari. Imomo, vachakwanisa kushandisa rudzidziso rwechokwadi ndokubatira Jehovha nenzira yokunamata nokusingaperi.

[Mashoko Omuzasi]

Edza Kuyeuka Kwako

◻ Murangariro waani parudzidziso unokosha zvikurusa, uye nei?

◻ Ndizvinodikanwai zviviri zvorudzidziso rwechokwadi izvo Jakobho akasimbisa?

◻ Zvii zviri zvimwe zvinodikanwa zvokunamata kwakachena?

◻ “Mashoko akanaka” akadini ayo Zvapupu zvaJehovha zviri kuparidzira?

◻ Rudzidziso rwechokwadi ruchakunda sei rudzidziso rwenhema?

[Mufananidzo uri papeji 17]

Vatungamiriri vorudzidziso vakaungana muAssisi, Italy, muna October 1986

[Mufananidzo uri papeji 19]

Rudzidziso rwechokwadi runobatanidza kusangana pamwe chete nokuda kwokunamata