‘Taura Shoko raMwari Noushingi’

JEHOVHA Mwari anogona kusimbaradza vabatiri vake kuti ‘vataure Shoko raMwari noushingi.’ (Mabasa 4:31) Kunyange avo vari vaduku munzira dzezvokwadi yeBhaibheri navasina ruzivo rwokuzviwanira mumubato wokuparidzira evhangeri havafaniri kuzengurira kutaura mashoko akanaka noushingi. MuCôte d’Ivoire, vaparidzi vaviri vamashoko akanaka vakanga vakabatikana muushumiri hwapasuo nesuo apo vakasangana napurofesa wokuyunivhesiti. Chapupu chiduku, Seriki, chichinzwa chisina kukwaniriswa kutaura kumurume akadzidza akadaro, chakarega chimwe chapupu chichitaura.

Purofesa akanetswa nokufungira mano akaipa kworudzi ndokushora Mwari nokuda kwezvinetso zvamarudzi zviripo, achirangarira kuti ndiye akasika marudzi akasiana-siana. Pashure pekurukurirano refu iyo yakaratidzika kuva isina kwayakaenda, Seriki pakupedzisira akawana ushingi hwokutaura, uye iye akadzongonyedza kurukurirano norupfave. (1 VaTesaronika 2:2) Achicherechedza kuti imba yapurofesa yakanga yakanyerenyetedzwa sei nechisarudzo chakanaka chamavara, Seriki akabvunza purofesa kuti, “Neiko musina kuita kuti imba yenyu yose ive noruvara rumwe cheterwo?”

“Unofanira kufunga kuti ndinopenga!” akakurumidza kupindura purofesa. Seriki akapindura, kuti: “Aiwa, asi tinofanirireiko kukarira Mwari kuita chinhu chiri chose uye munhu ari wose ane ruvara rumwe cheterwo?” Pfundo rakanga rakajeka. Muenzanisiro iwoyo wakapfava wakabvumikisa kuva unobudirira, uye uchapupu hwakanaka hwakapiwa naSeriki aichimbova anotya.