“Vakaramba Vachizadzwa Nemufaro Nemweya Mutsvene”

1, 2. Chii chakaita kuti rwendo rwaBhanabhasi naSauro rwusiyane nedzimwe, uye basa ravo raizozadzisa sei Mabasa 1:8?

UNGANO yeAndiyoki iri kufara chaizvo musi uyu. Pane vaprofita nevadzidzisi vakati wandei, uye pakati pavo Bhanabhasi naSauro ndivo vanosarudzwa nemweya mutsvene kuti vaparidze mashoko akanaka kunzvimbo dziri kure.a (Mab. 13:1, 2) Hakasi hako kekutanga kuti patumirwe vanhu vanokodzera kuti vanoparidza kune dzimwe nzvimbo. Kungoti munguva yakapfuura, mamishinari aitumwa aiendeswa kunzvimbo dzaitova nechiKristu nechekare. (Mab. 8:14; 11:22) Panguva ino Bhanabhasi naSauro, pamwe chete naJohani Mako, uyo achange achivashumira, vachatumwa kunzvimbo dzine vanhu vakawanda vasati vambonzwa mashoko akanaka.

² Jesu akanga ambotaura kuvateveri vake makore 14 akanga adarika kuti: “Muchava zvapupu zvangu muJerusarema, muJudhiya mese nemuSamariya, uye kusvikira kunzvimbo dziri kure dzenyika.” (Mab. 1:8) Kusarudzwa kwaBhanabhasi naSauro kuti vashande semamishinari kwaizobatsira kuti zvakanga zvaprofitwa naJesu zviitike!b

Vakasarudzwa Kuti “Vaite Basa” (Mabasa 13:1-12)

3. Chii chaiita kuti nzendo dziome makore akatanga chiKristu?

³ Mazuva ano vanhu vanogona kufamba vachisvika kure kure munguva pfupi pfupi nekuti kwava nezvekufambisa zvakadai semotokari nendege. Asi zvakanga zvisina kudaro makore akatanga chiKristu. Kakawanda vanhu vaiwanzofamba netsoka, uye kazhinji kwaiva kusina migwagwa yakanaka. Pamwe pazuva rimwe chete munhu aigona kufamba kwemakiromita 30, asi aizosvika aneta!c Saka kunyange zvazvo Bhanabhasi naSauro vaifarira basa ravo ravakanga vapiwa, vaiziva kuti ibasa raitoda kuzvipira.—Mat. 16:24.

4. (a) Bhanabhasi naSauro vakasarudzwa sei, uye vamwe vakatsigira sei zvakanga zvasarudzwa? (b) Tingatsigira sei vaya vanenge vapiwa mamwe mabasa muungano yechiKristu?

⁴ Asi nei mweya mutsvene wakanyatsotaura Bhanabhasi naSauro nemazita uchiti vasarudzwe kuti “vaite basa”? (Mab. 13:2) Bhaibheri haripi chikonzero chacho. Tinoziva kuti mweya mutsvene ndiwo wakatungamirira pakusarudzwa kwevarume ava. Hapana chinoratidza kuti vaprofita nevadzidzisi vekuAndiyoki vakapokana nazvo. Vakatotsigira zvakanga zvasarudzwa. Fungidzira kuti Bhanabhasi naSauro vakanzwa sei vachiona kuti hama dzavo hadzisi kutombovaitira godo. Vaprofita ava nevadzidzisi vakatotsanya ndokuvanyengeterera vachiisa “maoko avo pavari, vakaita kuti vaende.” (Mab. 13:3) Isuwo tinofanira kutsigira vaya vanenge vapiwa mamwe mabasa muungano yechiKristu, kusanganisira vaya vanenge vagadzwa sevatariri. Tinofanira kupa vakadaro “rukudzo rukuru murudo nekuda kwebasa ravo,” kwete kuvaitira godo.—1 VaT. 5:13.

5. Tsanangura kuti Bhanabhasi naSauro vakafamba sei pachitsuwa cheSaipurasi vachiparidza.

⁵ Pavakasvika netsoka kuSerukiya, chiteshi chezvikepe chiri pedyo neAndiyoki, Bhanabhasi naSauro vakakwira chikepe vakananga kuchitsuwa cheSaipurasi, rwendo rwemakiromita angasvika 200.d Sezvo kuSaipurasi kuri iko kumusha kwake, Bhanabhasi anofanira kunge akafara chaizvo kuunza mashoko akanaka kundima iyi. Pavakasvika kuSaramisi, guta riri pachitsuwa chacho pamahombekombe ekumabvazuva, varume ava vakabva vatotanga basa. “Vakatanga kuzivisa shoko raMwari mumasinagogi evaJudha.”e (Mab. 13:5) Bhanabhasi naSauro vakabvongodza Saipurasi yese, zvichida vachipfuura vachiparidza mumaguta makuru. Mamishinari aya anogona kunge akafamba makiromita 160 netsoka, zvichienderena nekuti vakashandisa nzira ipi!

6, 7. (a) Ndiani ainzi Segiyo Paurosi, uye nei Bha-Jesu akaedza kumuita kuti asateerere mashoko akanaka? (b) Sauro akaita sei kuti Bha-Jesu asamutadzisa kuparidza?

⁶ Saipurasi makore iwayo yakanga yakanyura muchitendero chenhema. Izvi zvakabuda pachena pakasvika Bhanabhasi naSauro kuPafosi, kumahombekombe ari nechekumavirira. Ikoko vakasangana nemumwe murume ainzi Bha-Jesu, “n’anga, uye muprofita wenhema.” Murume uyu “aiva pamwe chete nagavhuna weruwa rwacho, Segiyo Paurosi, murume aiva nepfungwa dzakapinza.”f Kare ikako vaRoma vakawanda, kunyange varume vasvinu vakadai saSegiyo Paurosi vaiva “nepfungwa dzakapinza,” vaiwanzoti kana vachida kuita zvisarudzo zvinokosha vanoenda kun’anga kana kuvanhu vanofembera vachishandisa nyeredzi. Kunyange zvakadaro, Segiyo Paurosi akabayiwa mwoyo neshoko reUmambo uye “aiva nechido chekunzwa shoko raMwari.” Izvi hazvina kufadza Bha-Jesu, uyo aizivikanwa nezita rake rebasa rekuti Erimasi, rinoreva kuti “N’anga.”—Mab. 13:6-8.

⁷ Bha-Jesu aipikisa shoko reUmambo. Kuti arambe aine simba pana Segiyo Paurosi akaedza “kuita kuti gavhuna wacho asatenda.” (Mab. 13:8) Asi Sauro aisazosiya Segiyo Paurosi achitadziswa kunzwa shoko raMwari nen’anga. Saka Sauro akaita sei? Nyaya yacho inoti: “Sauro, anonziwo Pauro, akazadzwa nemweya mutsvene, akaramba akamutarisa, akati: ‘Iwe murume azere nekubiridzira kwemarudzi ese neunyengeri hwemarudzi ese, iwe mwanakomana waDhiyabhorosi, iwe muvengi wezvinhu zvese zvakarurama, nei uri kukanganisa nzira dzakarurama dzaJehovha? Iye zvino chiona! Jehovha aisa ruoko rwake pamusoro pako, uye uchava bofu, wombotadza kuona zuva.’ Pakarepo akafukidzwa nezimhute nerima, akatanga kutenderera achiedza kutsvaga munhu angamutungamirira akamubata ruoko.”g Pamusana pechiitiko ichi chinoshamisa, gavhuna wacho weruwa, “akabva ava mutendi, nekuti akanga ashamiswa nekudzidzisa kwaJehovha.”—Mab. 13:9-12.

8. Tingatevedzerawo sei ushingi hwaiva naPauro mazuva ano?

⁸ Pauro akaramba kutyisidzirwa naBha-Jesu. Isuwo hatifaniri kutya vanhu vanotipikisa pavanoedza kuita kuti shoko redu reUmambo risafarirwa. Kunyange zvedu tichifanira kutaura mashoko anoratidza “mutsa, akarungwa nemunyu,” hatizosiyi vanhu vanofarira vachikanganiswa tichingotyira kuti tingazoita nharo. (VaK. 4:6) Hatidiwo kutya kufumura dzidziso dzenhema idzo dzinoramba dzichikanganisa “nzira dzakarurama dzaJehovha” sezvaiitwa naBha-Jesu. (Mab. 13:10) Ngatizivise chokwadi sezvaiita Pauro, tiite kuti vanhu vane mwoyo yakatendeka vafarire. Uye kunyange kutsigirwa kwatinoitwa naMwari kungasava pachena sezvazvaiva pana Pauro, tinoziva kuti Jehovha achashandisa mweya wake mutsvene kuti vanhu vanofarira vauye kuchokwadi.—Joh. 6:44.

“Mashoko Ekukurudzira” (Mabasa 13:13-43)

9. Vaya vanotungamirira muungano nhasi vangatevedzera sei Pauro naBhanabhasi?

⁹ Kunenge kuti zvinhu zvakabva zvachinja pakasimuka varume ava vachibva kuPafosi nechikepe ndokunanga kuPega, iri pamahombekombe eAsia Minor, anenge makiromita 250 nemugungwa. Pana Mabasa 13:13, boka racho rinotaurwa richinzi “Pauro nevamwe vake.” Mashoko acho anoratidza kuti Pauro ndiye akanga ava kutungamirira pane zvavaiita. Asi hapana chinoratidza kuti Bhanabhasi akaitira Pauro godo. Varume vaviri ava vakatoramba vachishanda pamwe chete kuti vaite kuda kwaMwari. Zvakaitwa naPauro naBhanabhasi zvinofanira kutevedzerwa nevaya vari kutungamirira ungano mazuva ano. Panzvimbo pekurwira zvinzvimbo, vaKristu vanofanira kuyeuka mashoko aJesu ekuti: “Imi mese muri hama.” Akawedzera kuti: “Munhu wese anozvikwidziridza achaninipiswa, uye munhu wese anozvininipisa achakwidziridzwa.”—Mat. 23:8, 12.

10. Rwendo rwekubva kuPega kuenda kuAndiyoki yekuPisidhiya rwakanga rwakamira sei?

¹⁰ Pavakasvika kuPega, Johani Mako akavasiya, ndokudzokera kuJerusarema. Hazvinyatsozivikanwa kuti akadzokererei. Asi Pauro naBhanabhasi vakaenderera mberi nerwendo kubva kuPega vakasvika kuAndiyoki yekuPisidhiya, guta riri munharaunda yeGaratiya. Rwendo urwu rwakanga rwusiri nyore sezvo guta reAndiyoki yekuPisidhiya riri panzvimbo yakakwirira nemamita 1 100. Nzira dzacho dzinopinda nepakati pemakomo dzaizivikanwa nekuwanda matsotsi. Chaitowedzera kuomesa rwendo rwacho ndechekuti utano hwaPauro panguva iyoyo hwakanga husina kumira zvakanaka.h

11, 12. Pauro akaita sei kuti vanhu vaaitaura navo vafarire paaiva kuAndiyoki yekuPisidhiya?

¹¹ MuAndiyoki yekuPisidhiya, Pauro naBhanabhasi vakapinda musinagogi paSabata. Nyaya yacho inoti: “Mutemo neVaprofita pazvakanga zvaverengerwa vanhu vese, vakuru vaitungamirira sinagogi vakatumira shoko kwavari, vachiti: ‘Varume, hama, kana muine mashoko ekukurudzira vanhu, ataurei.’” (Mab. 13:15) Pauro akasimuka kuti ataure.

¹² Pauro akatanga nekuti: “Varume, vaIsraeri, nemi vamwe vanotya Mwari.” (Mab. 13:16) Vanhu vakanga vakateerera vaisanganisira vaJudha nevamwe vakatendeukira kuchiJudha. Pauro akaita sei kuti vateereri vake ivavo vakanga vasingazivi basa raJesu muchinangwa chaMwari vafarire? Akatanga nekutaura muchidimbu nhoroondo yevaJudha. Akatsanangura kuti Jehovha “akakwidziridza vanhu vacho pavaigara munyika yeIjipiti vari vatorwa” uye kuti pashure pekununurwa kwavo Mwari “akavaitira mwoyo murefu vari murenje” kwemakore 40. Pauro akarondedzerawo kuti vaIsraeri vakakwanisa sei kutorera mamwe marudzi Nyika Yakapikirwa uye kuti Jehovha akagova sei “nyika yawo kuti ive nhaka yavo.” (Mab. 13:17-19) Vamwe vanoti Pauro anogona kunge akakurukura achitsanangura mamwe magwaro akanga averengwa musi iwoyo sezvaigaroitwa paSabata. Kana zviri izvo zvaakaita, uyu ndiwo mumwe muenzaniso waakaratidza kuti aiziva kuva “zvinhu zvese kuvanhu vakasiyana-siyana.”—1 VaK. 9:22.

13. Tingaita sei kuti vanhu vatinenge tichitaura navo vafarire zvatinenge tichitaura?

¹³ Isuwo tinofanira kuedza kutaura zvinoita kuti vanhu vatiri kuparidzira vade kuteerera. Kana tikaziva kuti munhu anotenda dzidziso dzipi dzechitendero, tinobva tasarudza nyaya inoita kuti anyatsofarira. Tinogonawo kushandisa mavhesi eBhaibheri atinoziva kuti munhu wacho anogona kunge achitoziva. Kazhinji zvakanaka kuti tiite kuti munhu averenge muBhaibheri rake pachake. Tsvaga nzira dzekuita kuti vanhu vauri kutaura navo vade kuteerera.

14. (a) Pauro akatanga sei kutaura mashoko akanaka pamusoro paJesu, uye akayambira vateereri vake kutii? (b) Vanhu vakaita sei pavakanzwa zvakataurwa naPauro?

¹⁴ Pauro akazotaura nezvekuti dzinza remadzimambo eIsraeri rakazosvika sei ‘kumuponesi, iye Jesu,’ uyo akavhurirwa nzira naJohani Mubhabhatidzi. Pauro akazotsanangura kuti Jesu akaurayiwa sei ndokumutswa kubva kuvakafa. (Mab. 13:20-37) Pauro akati, “Saka hama, zivai kuti muri kuziviswa nezvekuregererwa kwezvivi kunouya nekwaari . . . Munhu wese anotenda achanzi haana mhosva kuburikidza naiyeye.” Muapostora akabva apa vateereri vake yambiro iyi: “Saka ngwarirai kuti zvakataurwa neVaprofita hazviitiki kwamuri, zvekuti: ‘Tarisai, imi vaseki, mushamiswe nazvo, muparare, nekuti ndiri kuita basa mumazuva enyu, basa ramusingazombobvumi kunyange munhu akakuudzai zvese nezvaro.’” Kufarira kwakaita vanhu paakataura mashoko aya kunoshamisa. Bhaibheri rinoti, “Vanhu vakavakumbira kuti vazotaura nyaya iyoyi paSabata raitevera.” Uyezve pashure pemusangano uyu wepasinagogi, “vaJudha vakawanda nevanhu vakatendeukira kuchiJudha vainamata Mwari vakatevera Pauro naBhanabhasi.”—Mab. 13:38-43.

“Tava Kutendeukira Kune Mamwe Marudzi” (Mabasa 13:44-52)

15. Vamwe vanhu vakaita sei pakataura Pauro paSabata?

¹⁵ PaSabata rakazotevera, “rinenge guta rese” rakaungana kuti riteerere Pauro. Izvi hazvina kufadza vamwe vaJudha, zvekuti “vakatanga kumhura vachipikisa zvaitaurwa naPauro.” Iye naBhanabhasi vakavaudza neushingi kuti: “Zvakanga zvakakodzera kuti shoko raMwari ritange kutaurwa kwamuri. Asi sezvo muri kuriramba uye mazviti hamuna kukodzera upenyu husingaperi, iye zvino tava kutendeukira kune mamwe marudzi. Nekuti Jehovha akatiudza mashoko aya: ‘Ndakakugadzai sechiedza chemamwe marudzi, kuti imi muve ruponeso kusvikira kumigumo yenyika.’”—Mab. 13:44-47; Isa. 49:6.

16. VaJudha vakaita sei pavakaparidzirwa nemamishinari, uye Pauro naBhanabhasi vakaita sei pavakapikiswa?

¹⁶ Vamwe vasiri vaJudha vakanga vakateerera vakafara uye “vese vaiva nechido chekuwana upenyu husingaperi vakava vatendi.” (Mab. 13:48) Pasina nguva shoko raJehovha rakapararira muPisidhiya yese. Asi vaJudha havana kurifarira saizvozvo. Ndosaka mamishinari acho akavaudza kuti kunyange vakanga vari ivo vekutanga kutaurirwa shoko raMwari, vakasarudza kuramba Mesiya, saka vakanga vakakodzera kuzotongwa naMwari. VaJudha vakafurira vakadzi vakakurumbira nevarume vakuru vemuguta racho, “vakaita kuti Pauro naBhanabhasi vatambudzwe, ndokuvadzingira kunze kwemiganhu yavo.” Pauro naBhanabhasi vakaita sei nazvo? “Vakavazunzira guruva raiva patsoka dzavo, vakaenda kuIkoniyumu.” Saka ndiko kwakava kuguma kwechiKristu muAndiyoki yekuPisidhiya here? Kana! Vadzidzi vakanga vasara “vakaramba vachizadzwa nemufaro nemweya mutsvene.”—Mab. 13:50-52.

17-19. Tingatevedzera sei zvakaitwa naPauro naBhanabhasi, uye izvozvo zvichaita sei kuti tifare?

¹⁷ Tinowana chidzidzo chinokosha pane zvakaitwa nevaKristu vakatendeka pavaipikiswa. Hatiregi kuparidza, kunyange kana vanhu vakakurumbira venyika vakada kutirambidza kuzivisa mashoko akanaka. Uyewo yeuka kuti Pauro naBhanabhasi vakaita sei pavakaona vanhu vekuAndiyoki vachiramba kuparidzirwa. “Vakavazunzira guruva raiva patsoka dzavo,” kwete nekuti vakanga vakatsamwa asi vairatidza kuti vakanga vasina mhosva. Mamishinari aya aiziva kuti akanga asina simba pamapinduriro aizoitwa nevanhu kana vavaparidzira. Chavaiva nesimba pachiri kuramba vachiparidza. Uye ndizvo zvavakaita pavakaenda kuIkoniyumu!

¹⁸ Ko vadzidzi vakasara kuAndiyoki zvakavafambira sei? Kunyange zvazvo vaiparidza mundima ine vanhu vaipikisa, mufaro wavo wakanga usingabvi pakuteerera kwevanhu. Jesu akati: “Vanofara ndevaya vanonzwa shoko raMwari vorichengeta!” (Ruka 11:28) Uye ndizvo chaizvo zvakaitwa nevadzidzi vaiva kuAndiyoki yekuPisidhiya.

¹⁹ Nesuwo ngatigarei tichiyeuka kuti basa redu guru nderekuparidza, tichitevedzera zvakaitwa naPauro naBhanabhasi. Zviri kuvanhu vatinenge tichiparidzira kuti voteerera here kana kuti kwete. Kana vaya vatinoparidzira vachiita sevasiri kuteerera, tinogona kudzidza pane zvakaitwa nevadzidzi vepanguva yakatanga chiKristu. Kana tichikoshesa chokwadi uye tichibvuma kutungamirirwa nemweya mutsvene, isuwo tinogona kufara, kunyange patinenge tichipikiswa.—VaG. 5:18, 22.