Chidzidzo 8

Upenyu Hwemhuri Hunofadza Mwari

Ndeipi iri nzvimbo yomurume mumhuri? (1)

Murume anofanira kubata sei mudzimai wake? (2)

Mitoroi iyo baba vanayo? (3)

Nderipi riri basa romudzimai mumhuri? (4)

Mwari anodei kuvabereki nokuvana? (5)

Ndoupi uri murangariro weBhaibheri wokuparadzana newokuchatanura? (6, 7)

1. Bhaibheri rinotaura kuti murume ndiye musoro wemhuri. (1 VaKorinte 11:3) Murume anofanira kuva nomudzimai mumwe bedzi. Vanofanira kuva vakaroorana zvakarurama mukuwirirana nomutemo.—1 Timotio 3:2; Tito 3:1.

2. Murume anofanira kuda mudzimai wake kungofanana nokuzvida kwaanozviita. Anofanira kumubata nenzira iyo Jesu anobata nayo vateveri vake. (VaEfeso 5:25, 28, 29) Haatongofaniri kurova mudzimai wake kana kuti kumubata zvisina kufanira munzira ipi neipi. Panzvimbo pezvo, anofanira kumuratidzira rukudzo noruremekedzo.—VaKorose 3:19; 1 Petro 3:7.

3. Baba vanofanira kushanda zvakasimba kuti vatarisire mhuri yavo. Vanofanira kugovera zvokudya, zvokupfeka, uye pokugara nokuda kwomudzimai navana. Baba vanofanira kugoverawo zvinodikanwa zvokumudzimu zvemhuri yavo. (1 Timotio 5:8) Vanotungamirira mukubetsera mhuri yavo kudzidza pamusoro paMwari nezvinangwa Zvake.—Dheuteronomio 6:4-9; VaEfeso 6:4.

4. Mudzimai anofanira kuva mubetseri akanaka womurume wake. (Genesi 2:18) Anofanira kubetsera murume wake mukudzidzisa nokurovedza vana vavo. (Zvirevo 1:8) Jehovha anoda kuti mudzimai atarisire mhuri yake norudo. (Zvirevo 31:10, 15, 26, 27; Tito 2:4, 5) Anofanira kuva noruremekedzo rukuru nokuda kwomurume wake.—VaEfeso 5:22, 23, 33.

5. Mwari anoda kuti vana vateerere vabereki vavo. (VaEfeso 6:1-3) Anokarira vabereki kurayiridza nokururamisa vana vavo. Vabereki vanofanira kupedza nguva navana vavo ndokufunda Bhaibheri navo, vachitarisira zvinodikanwa zvavo zvokumudzimu nezvemirangariro. (Dheuteronomio 11:18, 19; Zvirevo 22:6, 15) Vabereki havatongofaniri kuranga vana vavo munzira yokukasharara kana kuti youtsinye.—VaKorose 3:21.

6. Apo vakwanyina veroorano vanenge vane zvinetso zvokusawirirana, vanofanira kuedza kushandisa zano reBhaibheri. Bhaibheri rinotikurudzira kuratidza rudo nokuva vanokanganwira. (VaKorose 3:12-14) Shoko raMwari harikurudziri kuparadzana senzira yokupedza nayo zvinetso zviduku. Asi mudzimai angasarudza kusiya murume wake kana (1) achiramba nenzira yokusindimara kutsigira mhuri yake, (2) aine masimba masimba zvikuru zvokuti utano hwake noupenyu zviri mungozi, kana kuti (3) chishoro chake chakanyanyisa chichikuita kuti kuve kusingamubviriri kunamata Jehovha.—1 VaKorinte 7:12, 13.

7. Vakwanyina veroorano vanofanira kuva vakatendeka kune mumwe nomumwe. Upombwe chivi kuna Mwari uye kune mukwanyina womunhu. (VaHebheru 13:4) Vatano kunze kweroorano ndicho chikonzero bedzi chapaMagwaro chechatanuro chinobvumira kuroorazve. (Mateo 19:6-9; VaRoma 7:2, 3) Jehovha anokuvenga apo vanhu vanochatanura pasina zvikonzero zvapaMagwaro ndokuroora mumwe munhuwo zvake.—Maraki 2:14-16.

[Mifananidzo iri papeji 16, 17]

Mwari anokarira vabereki kurayiridza vana vavo nokuvaruramisa

[Mufananidzo uri papeji 17]

Baba vane rudo vanogovera mhuri yavo munyama nomumudzimu