Ganhuro 11
Tsinhirano Yose yeBhaibheri
Fungidzira hako mupakwa wamabhuku 66 akanyorwa navanhu vakasiana-siana vanenge 40 kwenhambo yamakore anopfuura 1 600. Mitauro mitatu yakashandiswa navanyori vaigara muchiverengero chakati chenyika. Vanyori vose vakanga vane hunhu hwakasiana, mano, uye migariro. Asi apo mabhuku avakanyora akaunganidzwa pamwe chete pakupedzisira, kwakaitika kuti, zvamazvirokwazvo, akaita bhuku guru rimwe bedzi rinotevera musoro mumwe mukuru kubvira pamavambo kusvikira kumugumo. Ikoko kwakaoma kukufungidzira, hakusati here? Bva, Bhaibheri rinongova mupakwa bedzi wakadaro.
1. (Batanidza sumo.) Itsinhiranoi inokatyamadza inopupurira idi rokuti Bhaibheri rakafuridzirwa naMwari?
HAKUNA mudzidzi akatendeseka anogona kukundikana kuva anoororwa neidi rokuti Bhaibheri, kunyange zvazvo riri muunganidzwa wamabhuku akasiana, chinhu chimwe chakabatana. Rakabatana mukuti, kubvira pamavambo kusvikira kumugumo, rinosimudzira kunamatwa kwaMwari mumwe bedzi ane mavara asingatongochinji, uye mabhuku aro ose anokudziridza musoro mumwe wakatanhamara. Iyi tsinhirano yose ufakazi hune simba hwokuti Bhaibheri, zvamazvirokwazvo, iShoko raMwari.
2, 3. Uporofitai hwakataurwa muEdheni hwakapa hwaro hwetariro, uye migariroi yakaparira kutaurwa kwouporofita ihwohwo?
2 Musoro mukuru weBhaibheri unosumwa mumaganhuro apakutangisisa ebhuku raro rimene rokutanga, Genesi. Imomo, tinorava kuti vabereki vedu vokutanga, Adhama naEvha, vakasikwa vakakwana ndokuiswa mubindu reparadhiso, Edheni. Zvisinei, Evha akasvikwa nenyoka yakashora ururami hwemitemo yaMwari ndokumukwezva nenhema dzamanomano kupinda munzira yechivi. Adhama akamutevera ndokusateererawo Mwari. Chii chakava muuyo? Vose vari vaviri vakadzingwa muEdheni uye vakashurikidzirwa kurufu. Isu nhasi tinotambura miuyo yokupanduka ikoko kwokutanga. Tose tinogara nhaka chivi norufu kuna vabereki vedu vokutanga.—Genesi 3:1-7, 19, 24; VaRoma 5:12.
3 Zvisinei, panguva iyeyo yengwavaira, Mwari akataura uporofita hwakapa hwaro hwetariro. Uporofita hwacho hwakataurwa kunyoka, asi hwakataurwa Adhama naEvha vachinzwa kuti ivo vagone kuhuudza vana vavo. Hezvino izvo Mwari akataura: “Uye ini ndichaisa ruvengo pakati pako nomukadzi napakati pembeu yako nembeu yake. Iye achakupwanya mumusoro uye iwe uchamupwanya muchitsitsinho.”—Genesi 3:15; VaRoma 8:20, 21.
4. Zvisikwai zvakaparadzana zvinodudzwa muuporofita hwaJehovha muEdheni, uye zvaizoitirana sei mukati mamazana amakore?
4 Cherekedza zvisikwa zvina zvakaparadzana zvinodudzwa mune iyi ndima yomusoro uri kukurukurwa: nyoka nembeu yayo uyewo mukadzi nembeu yake. Izvi zvisikwa zvakaparadzana zvaizova vatambi vakatanhamara mune zvinoitika kwezviuru zvamakore aizouya. Ruvengo runopfuurira rwaizovapo pakati pomukadzi nembeu yake kune rumwe rutivi uye nyoka nembeu yayo kune rumwe rwacho. Urwu ruvengo rwaizobatanidza rwisano inopfuurira pakati pokunamata kwechokwadi nokwenhema, mufambiro wakarurama nouipi. Pane imwe nhano, nyoka yaizowana chinoratidzika kuva betsero payaipwanya chitsitsinho chembeu yomukadzi. Pakupedzisira, kunyange zvazvo zvakadaro, mbeu yomukadzi yaizopwanya musoro wenyoka, uye Mwari amene aizorevererwa apo zvisaririra zvose zvokupanduka kwapakuvamba ikoko zvakanga zvabviswa.
5. Tinoziva sei kuti Evha akanga asati ari mukadzi wouporofita?
5 Ko mukadzi uye nyoka ndivanaani? Uye ndivanani vari mbeu dzavo? Apo Evha akava nomwanakomana wake wedangwe, Kaini, iye akadanidzira, achiti: “Ndabereka munhu kupfurikidza neyamuro yaJehovha.” (Genesi 4:1) Zvimwe iye akarangarira kuti iye akanga ari mukadzi wouporofita uye kuti uyu mwanakomana aizobvumikisa kuva mbeu. Zvisinei, Kaini akanga ane mudzimu wakaipa wakafanana nowowo wenyoka. Iye akava mhondi, achiuraya munin’ina wake amene Abheri. (Genesi 4:8) Nomutoo wakajeka, uporofita hwacho hwakava nerevo yakadzama zvikuru, yokufananidzira iyo Mwari bedzi aigona kutsanangura. Uye ikoku akakuita, zvishoma panguva. Mabhuku ose 66 eBhaibheri anobetsera munzira dzakasiana-siana mukuwadzanyurwa kwerevo yaihwohwu, uporofita hwokutanga muBhaibheri.
Ndianiko Nyoka?
6-8. Mashokoi aJesu anotibetsera kuziva simba raitsigira nyoka? Tsanangura.
6 Kutanga, ndianiko nyoka inotaurwa nezvayo muna Genesi 3:15? Nhauro inoti nyoka chaiyoiyo yakasvika Evha muEdheni, asi nyoka chaidzoidzo hadzigoni kutaura. Panofanira kuve pave pane simba rakati kuti raitsigira nyoka iyoyo, richiiparira kuita zvayakaita. Chii chakanga chiri simba iroro? Kuzivikanwa kwesimba iroro nomutoo wakajeka hakuna kuwadzanyurwa kutozosvikira muzana ramakore rokutanga reNguva yedu yaVose, apo Jesu akanga achiita ushumiri hwake pasi pano.
7 Pane imwe nhambo, Jesu akanga achitaura navatungamiriri vorudzidziso vechiJudha vanozviruramisa vaiganza kuti ivo vaiva vanakomana vaAbrahama. Bva, vakanga vashora zvakasimba zvokwadi yakaparidzirwa naJesu. Naizvozvo Jesu akati kwavari: “Imi munobva kuna baba venyu Dhiabhorosi, uye munoshuva kuita zvishuvo zvababa venyu. Iyeyo akanga ari muurayi apo iye akavamba, uye iye haana kutsiga muzvokwadi, nokuti zvokwadi haisati iri maari. Apo iye anotaura nhema, anotaura mukuwirirana nomurangariro wake amene, nokuti iye murevi wenhema nababa venhema.”—Johane 8:44.
8 Mashoko aJesu akanga akasimba uye akananga pfundo. Iye akarondedzera Dhiabhorosi so“muurayi” uye “baba venhema.” Zvino, nhema dzimene dzakatanga kunyorwa dzakanga dziri idzo dzakataurwa nenyoka muEdheni. Upi kana upi akataura nhema idzodzo zvamazvirokwazvo akanga ari “baba venhema.” Zvakare, nhema idzodzo dzakaguma norufu rwaAdhama naEvha, dzichiita murevi wenhema iyeyo wekare mhondi. Sezviri pachena, ipapoka, simba raitsigira nyoka muEdheni rakanga riri Satani Dhiabhorosi, uye Jehovha akanga achitaura chaizvoizvo kuna Satani muuporofita ihwohwo hwekare.
9. Ko Satani akavapo sei?
9 Vamwe vakabvunza, kuti: Kana Mwari akanaka, akasikirei chisikwa chakadai saDhiabhorosi? Mashoko aJesu anotibetserawo kupindura mubvunzo iwoyo. Jesu akati nezvaSatani: “[Iye] akanga ari muurayi apo iye akavamba.” Naizvozvo apo Satani akareva nhema kuna Evha, ndipo apo akavamba kuva Satani—kubva mushoko rechiHebheru rinoreva kuti “mudzivisi.” Mwari haana kusika Satani. Yaichimbova ngirozi yakatendeka yakabvumira chishuvo chakashata kutanga mumwoyo mayo zvokuti yakava Satani.—Dheuteronomio 32:4; enzanisa naJobho 1:6-12; 2:1-10; Jakobho 1:13-15.
Mbeu Yenyoka
10, 11. Ko Jesu nomuapostora Johane vanotibetsera sei kuziva mbeu yeNyoka?
10 Kunyange zvazvo zvakadaro, zvakadiniko ne‘mbeu [kana kuti mwana] yenyoka’? Mashoko aJesu anotibetserawo kuwana mhinduro yeurwu rutivi rwomubvunzo wacho. Iye akati kuvatungamiriri vorudzidziso vechiJudha: “Imi munobva kuna baba venyu Dhiabhorosi, uye munoshuva kuita zvishuvo zvababa venyu.” Ava vaJudha vaiva vazukuru vaAbrahama, sokuganza kwavaiita. Asi mufambiro wavo wakaipa wakavaita vana vomudzimu vaSatani, muvambi wechivi.
11 Muapostora Johane, achinyora mukupera kwezana ramakore rokutanga, anotsanangura zvakajeka avo vari vembeu yeNyoka, Satani. Iye anonyora, kuti: “Iye anopfuuridzira chivi anobva kuna Dhiabhorosi, nokuti Dhiabhorosi ave achiita chivi kubvira pamavambo. . . . Vana vaMwari navana vaDhiabhorosi vanoonwa kupfurikidza neiri idi: Munhu ari wose asingapfuuridziri kururama haasati achibva kuna Mwari, uyewo iye usingadi hama yake.” (1 Johane 3:8, 10) Sezviri pachena, mbeu yeNyoka yave ichishingaira zvikuru munhau yose yavanhu!
Mbeu Yomukadzi Ndiani?
12, 13. (a) Ko Jehovha akazivisa sei Abrahama kuti mbeu yomukadzi yaizooneka pakati pavazukuru vake? (b) Ndiani akagara nhaka yechipikirwa pamusoro peMbeu?
12 Ko zvino, ndiani ‘mbeu [kana kuti mwana] yomukadzi’? Uyu ndimumwe wemibvunzo inokosha zvikurusa yati yambobvunzwa, nokuti ndiyo mbeu yomukadzi ichapwanya musoro waSatani pakupedzisira ndokubvisa tapuro dzakashata dzorupanduko rwapakuvamba. Shure muzana ramakore rechi 20 P.N.V., Mwari akawadzanyura nhungamiro huru kumhinduro pakuzivikanwa kwaiyeyu kumurume akatendeka Abrahama. Nemhaka yokutenda kukuru kwaAbrahama, Mwari akaita nhevedzano yezvipikirwa kwaari pamusoro pomwana waaizobereka. Imwe yeidzodzi yakajekesa kuti ‘mbeu yomukadzi’ yaizo‘pwanya musoro wenyoka’ yaizooneka pakati pavana vaAbrahama. Mwari akamuudza, kuti: “Mbeu yako ichava muridzi wesuo ravavengi vayo. Uye kupfurikidza nembeu yako marudzi ose apasi zvamazvirokwazvo achazvikomborera amene nokuda kweidi rokuti iwe wakateerera inzwi rangu.”—Genesi 22:17, 18.
13 Makore zvaakapfuura, chipikirwa chaJehovha kuna Abrahama chakadzokororwa kumwanakomana waAbrahama Isaka nokumuzukuru wake Jakobho. (Genesi 26:3-5; 28:10-15) Pakupedzisira, vazukuru vaJakobho vakava ndudzi 12, uye imwe yendudzi idzodzo, Judha, yakagamuchira chipikirwa chaicho, chinoti: “Tsvimbo haisati ichizobva kuna Judha, uyewo mudonzvo womudzori hausati uchizobva pakati petsoka dzake, kusvikira Shiro asvika; uye marudzi ose achamuteerera.” (Genesi 49:10) Sezviri pachena, Mbeu yaizooneka mundudzi yaJudha.
14. Rudzii rwakanga rwakarongwa kuti rugadzirire kuuya kweMbeu?
14 Pakupera kwezana ramakore rechi 16 P.N.V., ndudzi 12 dzaIsraeri dzakarongwa kuva rudzi savanhu chaivo vaMwari. Nedonzo irori, Mwari akaita sungano yakakomba navo ndokuvapa bumbiro romutemo. Chikonzero chikuru chaikoku chakanga chiri chokugadzirira rudzi nokuda kwokuuya kweMbeu. (Eksodho 19:5, 6; VaGaratia 3:24) Kubvira ipapo zvichienda mberi, ruvengo rwaSatani kuMbeu yomukadzi rwakaoneka muutsinye hwamarudzi kuvanhu vakasarudzwa vaMwari.
15. Imhungamiroi yokupedzisira kumhinduro yakapiwa pamusoro pokuti imhuri ipi pakati pavazukuru vaAbrahama yaizobereka Mbeu?
15 Mhungamiro yokupedzisira kumhinduro pamusoro pokuti imhuri ipi yaizobereka Mbeu yakapiwa muzana ramakore rechi 11 P.N.V. Panguva iyoyo, Mwari akataura namambo wechipiri waIsraeri, Dhavhidhi, ndokupikira kuti Mbeu yaizobva mumutsara wake uye kuti chigaro choumambo chaIyeyu chaizo“tsigiswa zvakasimba kusvikira kunguva isingazivikanwi.” (2 Samueri 7:11-16) Kubvira nhambo iyoyo zvichienda mberi, Mbeu yaigona kunongedzerwa kwairi somwanakomana waDhavhidhi.—Mateo 22:42-45.
16, 17. Ko Isaya akarondedzera sei zvikomborero zvaizounzwa neMbeu?
16 Mumakore akatevera, Mwari akamutsa vaporofita kuti vape mamwe mashoko akafuridzirwa pamusoro peMbeu inouya. Somuenzaniso, muzana ramakore rechisere P.N.V., Isaya akanyora, kuti: “Kune mwana watakaberekerwa, kune mwanakomana watakapiwa; uye ubati ushe hwouchinda huchava papfudzi rake. Uye zita rake richanzi Mupi Zano Unoshamisa, Mwari Une Simba, Baba Vokusingagumi, Muchinda Worugare. Hapasati pachizova nomugumo paukuru hwoubati ushe hwouchinda naparugare, pachigaro choumambo chaDhavhidhi napaumambo hwake.”—Isaya 9:6, 7.
17 Isaya akaporofitazve pamusoro peiyi Mbeu, achiti: “Iye anofanira kutonga vakaderera nokururama, uye iye anofanira kutsiura nokururama nokuda kwavanyoro vapasi. . . . Uye bere richagara chaizvoizvo negwaianarume kwechinguvana, uye ingwe ichavata pasi nembudzana, uye mhuru neshumba yava nezenze nemhuka inosanodyiswa zvose pamwe chete . . . Hazvisati zvichizoita kuvadziko ipi neipi kana kuti kuparira ruparadziko rupi norupi mugomo rangu rose dzvene; nokuti pasi richazadzwa zvamazvirokwazvo nokuziva Jehovha sokufukidza kunoita mvura gungwa rimene.” (Isaya 11:4-9) Haiwa zvikomborero zvikuru zvakadini zvaizounzwa neiyi mbeu!
18. Mashokoi mamwe pamusoro peMbeu akanyorwa naDhanieri?
18 Muzana ramakore rechitanhatu pamberi peNguva yedu yaVose, Dhanieri akanyora humwezve uporofita pamusoro peMbeu. Akadeya kutaura nguva apo mumwe akafanana nomwanakomana womunhu aizooneka mudenga uye akataura kuti “akapiwa ubati ushe nechiremera noumambo, kuti vanhu, mapoka amarudzi nemitauro vose vagofanira kubatira kunyange iye.” (Dhanieri 7:13, 14) Naizvozvo Mbeu inouya yaizogara nhaka umambo hwokudenga, uye chiremera chake choumambo chaizotambanukira pamusoro papasi rose.
Chisinganzwisisiki Chinowadzanyurwa
19. Rutivii, sorunoziviswa nengirozi, rwaizoitwa naMaria mukuuya kweMbeu?
19 Kuzivikanwa kweMbeu pakupedzisira kwakafukurwa pakutanga kweNguva yedu yaVose. Mugore ra 2 P.N.V., ngirozi yakaoneka kumusikana muduku wechiJudha ainzi Maria, uyo akanga ari muzukuru waDhavhidhi. Ngirozi yakamuudza kuti iye aizobereka rushiye runokosha chaizvo ndokuti: “Iyeyu achava mukuru uye achanzi Mwanakomana woWokumusorosoro; uye Jehovha Mwari achamupa chigaro choumambo chaDhavhidhi baba vake, uye iye achabata ushe samambo pamusoro peimba yaJakobho nokusingaperi, uye hakusati kuchizova nomugumo woumambo hwake.” (Ruka 1:32, 33) Naizvozvo kumirira kwenguva refu “mbeu” pakupedzisira kwakanga kuchisvika kumugumo.
20. Ndiani Mbeu yakapikirwa, uye ishokoi rayakaparidza muna Israeri?
20 Mugore ra 29 N.V. (musi wakanongedzerwa kwauri pachine nguva refu naDhanieri), Jesu akabhapatidzwa. Mudzimu mutsvene ipapo wakaburukira paari, uye Mwari akamubvuma soMwanakomana wake. (Dhanieri 9:24-27; Mateo 3:16, 17) Kwamakore matatu nehafu pashure pacho, Jesu akapupurira kuvaJudha, achizivisa, kuti: “Umambo hwamatenga hwaswedera pedyo.” (Mateo 4:17) Mukati menguva iyoyo, iye akazadzika mauporofita mazhinji zvikuru muMagwaro echiHebheru zvokuti pakanga pasina nzvimbo yepanikiro yokuti iye akanga ari Mbeu yakapikirwa zvamazvirokwazvo.
21. Ko maKristu apakuvamba akanzwisisei pamusoro pokuzivikanwa kweMbeu?
21 MaKristu apakuvamba akasanonzwisisa ikoku. Pauro akatsanangurira maKristu omuGaratia, kuti: “Zvino zvipikirwa zvakataurwa kuna Abrahama nokumbeu yake. Hazviti: ‘Uye kumbeu zhinji,’ somuchinoitika chezhinji dzakadaro, asi somuchinoitika cheimwe: ‘Uye kumbeu yako,’ iyo iri Kristu.” (VaGaratia 3:16) Jesu aizova “Muchinda woRugare” akadeya kuziviswa naIsaya. Pashure pokunge iye pakupedzisira apinda muUmambo hwake, ruramisiro nokururama zvaizogadzwa munyika yose.
Ko Zvino, Mukadzi Ndiani?
22. Ndianiko mukadzi anotaurwa nezvake muuporofita hwaJehovha muEdheni?
22 Kana Jesu ari Mbeu, ndiani mukadzi uyo akanongedzerwa kwaari shure ikoko muEdheni? Sezvo simba raitsigira nyoka rakanga riri chisikwa chomudzimu, hatisati tichifanira kukatyamadzwa kuti mukadziwo ndowomudzimu uye kwete wohunhu. Muapostora Pauro akataura pamusoro po“mukadzi” wokudenga apo iye akati: “Asi Jerusarema riri kumusoro rakasununguka, uye iro ndivo amai vedu.” (VaGaratia 4:26) Mamwe magwaro anoratidzira kuti iri “Jerusarema riri kumusoro” rakanga richitovapo kwamamiriyeniyumu. Iro isangano rokudenga raJehovha rezvisikwa zvomudzimu, iro Jesu akaburuka mariri kuzoita basa re‘mbeu yomukadzi.’ Rudzi irworwu bedzi rwo“mukadzi” womudzimu rwaigona kutsungirira ruvengo rwe“nyoka yapakuvamba” kwamamiriyeniyumu.—Zvakazarurwa 12:9; Isaya 54:1, 13; 62:2-6.
23. Neiko kuwadzanyurwa kunofambira mberi kwerevo youporofita hwaJehovha hwomuEdheni kuchikosha zvikuru?
23 Ichi chiono chipfupi chine udzame chokufambira mberi kwouporofita ihwohwo hwekare huri muna Genesi 3:15 chipupuriro chine simba chetsinhirano huru yeBhaibheri. Kunokosha zvirokwazvo kuti uporofita hunogona kunzwisiswa bedzi apo tinobatanidza zvinoitika namashoko zvinovambira mumazana amakore rechi 20, rechi 11, rechi 8, uye rechi 6 P.N.V. pamwe chete namashoko nezvinoitika zvinovambira muzana rokutanga ramakore reNguva yedu yaVose. Ikoku hakwaigona kungoerekana kwaitika. Panofanira kuve pave pane simba rinotungamirira rinotsigira ikoku kwose.—Isaya 46:9, 10.
Revo Nokuda Kwedu
24. Ko kuzivikanwa kweMbeu kunorevei kwatiri?
24 Ko ikoku kwose kunorevei kwatiri? Eya, Jesu ndiye ‘mbeu yomukadzi’ huru. Uporofita ihwohwo hwekare huri muna Genesi 3:15 hwakadeya kuzivisa kuti chitsitsinho chake chaizo‘pwanywa’ neNyoka, uye ikoku kwakaitika apo Jesu akafira padanda rokutambudzira. Ronda harisati richigara narini. Nokudaro, runoratidzika kuva rubudiriro rwenyoka rwakakurumidza kushandurwa kuva kukurirwa apo Jesu akamutswa. (Sezvatakaona muGanhuro 6, pane ufakazi hukuru hwokuti ikoko kwakaitika chaizvoizvo.) Rufu rwaJesu rwakava hwaro nokuda kworuponeso rworudzi rwomunhu rune mwoyo wakarurama, naizvozvo Mbeu yakavamba kuva chikomborero, seizvo Mwari akanga apikira Abrahama. Asi zvakadiniko namauporofita okuti Jesu aizobata ushe ari muumambo hwokudenga pamusoro penzvimbo yake yose yapasi?
25, 26. Inhaui yakabatanidzwa muruvengo pakati pe‘mbeu yomukadzi’ neNyoka, sezvinorondedzerwa muna Zvakazarurwa?
25 Muchiono chakajeka chouporofita chakanyorwa muna Zvakazarurwa ganhuro 12, mavambo ouhu Umambo anofananidzirwa sokuberekwa kwomwanarume mudenga. Muuhu Umambo, Mbeu yakapikirwa inotora simba muzita rechiratidziro rokuti Mikaeri, kureva kuti “Ndianiko Akafanana naMwari?” Anoratidzira kuti hakuna munhu anogona kudenha nomutoo wakafanira uchangamire hwaJehovha, apo iye anobudisa “nyoka yapakuvamba” mudenga kwenguva yose. Tinorava, kuti: “Naizvozvo dragoni huru yakakandirwa pasi, nyoka yapakuvamba, iyo inonzi Dhiabhorosi naSatani, uyo ari kutsausa pasi rose rinogarwa; iye akakandirwa kupasi.”—Zvakazarurwa 12:7-9.
26 Muuyo wacho rusununguko nokuda kwamatenga asi nhamo nokuda kwapasi. “Zvino ruponeso rwazosvika nesimba noumambo hwaMwari wedu nechiremera chaKristu wake,” kwakava kudanidzira kworukundo. Kupfuurirazve, tinorava, kuti: “Nokuda kwaikoku farai, imi matenga nemi munogara maari! Nhamo nokuda kwapasi uye nokuda kwegungwa, nokuti Dhiabhorosi aburukira kwamuri, akatsamwa zvikuru, zvaanoziva kuti iye ane nhambo pfupi yenguva.”—Zvakazarurwa 12:10, 12.
27. Ko uporofita pamusoro pokuva kwaSatani anobudiswa mudenga hwakazadzika rini? Tinoziva seiko?
27 Tingagona here kutaura apo uhu uporofita hwaizova hunozadzika? Zvamazvirokwazvo, iwoyu wakanga uri mubvunzo wakamutswa navadzidzi apo ivo vakabvunza Jesu pamusoro pe‘chiratidzo chokuvapo kwake nechemhedziso yetsika yezvinhu’—sezvatakurukura muGanhuro 10. (Mateo 24:3) Sezvatakaona, ufakazi hwacho hukuru hwokuti kuvapo kwaJesu musimba roUmambo hwokudenga kwakavamba muna 1914. Chifo chenguva iyeyo, takaona “nhamo nokuda kwapasi” zvamazvirokwazvo!
28, 29. Ichinjoi huru pamusoro papasi dzichiri mberi, uye tinoziva sei kuti dzichaitika nokukurumidza?
28 Asi cherekedza, kuti: Kudanidzira ikoko kwokudenga kwakazivisa kuti Satani anongova bedzi ne“nhambo pfupi yenguva.” Naizvozvo uporofita huya hwapakuvamba hwomuna Genesi 3:15 huri kuswedera kumugumo wahwo usingakanganisi. Nyoka, mbeu yayo, mukadzi, nembeu yake zvose zvaziviswa. Mbeu ‘yakapwanywa muchitsitsinho,’ asi yakanaya. Nokukurumidza, kupwanywa kwaSatani (uye mbeu yake) kuchavamba mukudzora kwaMambo zvino anotonga waMwari, Kristu Jesu.
29 Ikoku kuchabatanidza chinjo huru pamusoro papasi. Pamwe chete naSatani, avo vanozvibvumikisa vamene kuva mbeu yake vachabviswa. Sokuporofita kwakaita wezvamapisarema, kuti: “Kwangosara chinguva chiduku bedzi, uye wakaipa haachazovipozve; uye iwe uchacherekedza chaizvoizvo nzvimbo yake, uye iye haasati achizovapo.” (Pisarema 37:10) Haiwa iyoyi ichava chinjo huru yakadini! Ipapo, mamwe mashoko owezvamapisarema achazadzika, anoti: “Asi vanyoro vamene ndivo vachava varidzi vapasi, uye ivo vachawana zvamazvirokwazvo mufaro wavo mukuru mukukura kworugare.”—Pisarema 37:11.
30. Neiko vapanikiri vanopanikira kufuridzirwa kweBhaibheri uye kunyange kuvapo kwaMwari vari venhema?
30 Neiyi nzira, “Muchinda woRugare” pakupedzisira achaunza rugare kurudzi rwomunhu. Ichi ndicho chipikirwa cheBhaibheri, sezvatacherekedza pana Isaya 9:6, 7. Muzera rino rokupanikira, vazhinji vanowana chipikirwa chakadaro kuva chenhema. Asi ndechipi chimwe icho munhu anopa? Hapana! Kune rumwe rutivi, ichi chipikirwa chinotaurwa zvakajeka muBhaibheri, uye Bhaibheri iShoko risingakundikani raMwari. Chaizvoizvo ndivo vapanikiri vari venhema. (Isaya 55:8, 11) Vanofuratira Mwari, uyo akafuridzira Bhaibheri uye uyo ari munhu mukurusa kupinda vose.
[Mufananidzo uri papeji 151]
Uporofita hwokutanga hweBhaibheri hwakapa vanhu vanoita chivi hwaro hwetariro
[Mufananidzo uri papeji 154]
Muzana ramakore rechi 20 P.N.V., Jehovha akaudza Abrahama kuti Mbeu yakapikirwa yaizobva pakati pavazukuru vake
[Mufananidzo uri papeji 155]
Muzana ramakore rechi 11 P.N.V., Mambo Dhavhidhi akaziva kuti Mbeu yaizobva mumutsara wake woumambo
[Mufananidzo uri papeji 156]
Muzana ramakore rechisere P.N.V., Isaya akadeya kutaura zvikomborero zvaizounzwa neMbeu
[Mufananidzo uri papeji 157]
Muzana ramakore rechitanhatu P.N.V., Dhanieri akadeya kutaura kuti Mbeu yaizobata ushe muumambo hwokudenga
[Mufananidzo uri papeji 159]
Pedyo namavambo ezana ramakore rokutanga N.V., Maria akaziva kuti Jesu, rushiye rwaaizobereka, rwaizokura kuva Mbeu