Jesu Anouya saMambo

CHINGUVANA pashure pokuporesa mapofu mairi anopemha, Jesu anosvika kukamusha kari pedyo neJerusarema. Anoudza vairi vavadzidzi vake kuti: ʼEndai mumusha uye muchawana mhuru yembongoro. Isunungurei mugouya nayo kwandiri.ʼ

Apo mbongoro inounzwa kwaari, Jesu anoitasva. Tevere anoenda Jerusarema daro pfupi. Paanosvika pedyo neguta, boka guru ravanhu rinobuda kuzosongana naye. Uzhinji hwavo hunobvisa mabhachi avo ndokuawadza pamugwagwa. Vamwe vanocheka matavi emichindwi pamichindwi. Vanoaisawo pamugwagwa, vachidanidzira kuti: ʼMwari komborerai mambo anouya muzita raJehovha!ʼ

Kare kare muna Israeri madzimambo matsva aizopinda muJerusarema akatasva mhuru yembongoro kuzviratidzira vamene kuna vanhu. Ndozviri kuita Jesu. Uye vanhu ava vari kuratidzira kuti vanoda Jesu kuva mambo wavo. Asika handi vanhu vose vanomuda. Tingaona izvi pane chinoitika apo Jesu anoenda kutembere.

Kutembere Jesu anoporesa vanhu vari mapofu nezvirema. Apo vana vaduku vanoona izvi, vanodaidzira rumbidzo kuna Jesu. Asika ikoku kunotsamwisa vaprista, uye vanoudza Jesu kuti: ʼUnonzwa zvinotaurwa navana here?ʼ

ʼHungu,ʼ Jesu anopindura. ʼHamuna kutongorava muBhaibheri here panoti: “Mwari uchabudisa rumbidzo mumiromo yavana vaduku?ʼ” Nokudaro vana vanopfuurira kurumbidza mambo waMwari.

Tinoda kuva savana ivavo, hatidi here? Vamwe vanhu vangaedza kutidzivisa kutaura pamsoro poumambo hwaMwari. Asi tichapfuurira kuudza vamwe pamsoro pezvinhu zvinoshamisa zvichaitirwa vanhu naJesu.

Yakanga isiri nguva yokuti Jesu avambe kubata ushe samambo paaiveri pasi pano. Ichasvika riini nguva iyi? Vadzidzi vaJesu vanoda kuziva. Tichadzidza pamsoro pakwo gare gare.