Mafoni Anogona Kukanganisa Sei Vana Vako?
Vanhu vakuru vanogona kuomerwa nekushandisa mafoni. Asi sezvo vana vakangoberekwa mafoni avako, zvinovaitira nyore chaizvo kuashandisa.
Zvakaonekwa kuti vana vanoita nguva yakawanda vachishandisa mafoni vanopedzisira . . .
vapindwa muropa nawo.
vava kushungurudzwa kana kushungurudza vamwe paIndaneti.
vava kuona zvinonyadzisira kunyange vasina kumbozvitsvaga.
ZVAUNOFANIRA KUZIVA
KUPINDWA MUROPA
Mamwe mapurogiramu epafoni uye magemhu akatogadzirwa nenzira inoita kuti apinde muropa. Bhuku rinonzi Reclaiming Conversation rinoti, “Maapplication ari pamafoni akagadzirwa nenzira inoita kuti zviome kurega kuashandisa.” Mabhizinesi ekushambadzira anoita mari patinoona zvinhu zvavanenge vachishambadzira, saka patinoita nguva yakawanda tichishandisa mapurogiramu anobudisa zvinhu zvavanoshambadzira, tinenge tichitovawanisa mari yakawanda.
ZVEKUFUNGA NEZVAZVO: Vana vako havagoni kugara vasina mafoni avo here? Ungavabatsira sei kuti vashandise nguva yavo zvakanaka?—VAEFESO 5:15, 16.
KUSHUNGURUDZWA
Vamwe pavanenge vari paIndaneti, havatauri nevamwe zvakanaka. Izvi zvinogona kuita kuti vapedzisire vava kuitira vamwe utsinye kana kuti kuvashungurudza.
Vamwe vanhu havatauri nevamwe zvakanaka pasocial media nekuti vanenge vachida kuzivikanwa kana kufarirwa nevanhu vakawanda. Vamwe vanogona kurwadziwa pavanoona kuti vakasiyiwa pane zvimwe zvinhu zvakadai sekukokwa kupati. Zvinogonawo kuita kuti vanzwe sekuti vari kuitirwa utsinye.
ZVEKUFUNGA NEZVAZVO: Vana vako vanotaura nevamwe zvakanaka here pamafoni? (VaEfeso 4:31) Vanorwadziwa here kana vakasiyiwa pane zvimwe zvinhu?
KUONA ZVINONYADZISIRA
Zviri nyore chaizvo kuona zvinhu zvinonyadzisira paIndaneti. Vabereki vanofanira kuziva kuti kunyange zvazvo paine masetting anoita kuti vana vasaona zvinhu zvinonyadzisira, masetting iwayo haakwanisi kuvhara zvese.
Mune dzimwe nyika kutumira kana kutumirwa mapikicha anonyadzisira hakusi pamutemo. Kunyange vari vana vari kutumira kana kutumirwa mapikicha acho, vanogona kutosungwa nemhosva yekuona zvinhu zvinonyadzisira.
ZVEKUFUNGA NEZVAZVO: Ungabatsira sei vana vako kuti vasaona kana kutumira mapikicha anonyadzisira pamafoni?—VAEFESO 5: 3, 4.
ZVAUNOGONA KUITA
DZIDZISA VANA VAKO
Kunyange zvazvo vana vachigona kushandisa mafoni, vanoda kubatsirwa. Bhuku rinonzi Indistractable rinoti kupa mwana foni iwe usina kumudzidzisa kuishandisa zvakanaka, “kwakangofanana nekumusiya achipinda mumvura iye asingagoni kutuhwina.”
ZVINOTAURWA NEBHAIBHERI: “Dzidzisa mwana nzira yaanofanira kufamba nayo; kunyange kana akwegura haazobvi mairi.”—ZVIREVO 22:6.
Pazvinhu zviri pasi apa, sarudza zvaunoda kuita kana kuti nyorawo zvimwe zvaunofunga.
Kurukura nemwana wako kuti ataure zvakanaka nevamwe pafoni
Batsira mwana wako kuti asanyanye kurwadziwa kana akasiyiwa pane zvimwe zvinhu
Ita zvese zvaunogona kuti mwana wako asaona zvinhu zvakashata pafoni
Gara uchitarisa foni yemwana wako
Muudze kuti anoshandisa foni yake kwenguva yakareba sei pazuva
Muudze kuti kana nguva yekurara yakwana, haafaniri kushandisa foni
Ivai nemutemo wekuti hapana anofanira kubata foni panguva yekudya