Zvokudya Inhau Yokuitira Hanya

“ENDA zvako, udye zvokudya zvako nomufaro,” rinodaro Bhaibheri pana Muparidzi 9:7. Kudya, zvirokwazvo, hakusi chinodikanwa bedzi asiwo chimwe chezvinofadza zvikurusa muupenyu.

Rangarira Thomas ane makore 34 okukura. Anofarira nyama zvikuru. Uye anoidya zuva riri rose—kazhinji kazhinji kanoverengeka pazuva. Chisvusvuro chake kazhinji chinobatanidza mukaka, mazai anoverengeka, chingwa kana kuti tositi yakazodzwa bhata, uye sochisi kana kuti bhekoni. Panzvimbo dzinobikwa zvokudya nokukurumidza, anohodha macheeseburger, machipisi, uye mamilk shake. Apo anenge achidyira kumwe, anosarudza munyepfu wemombe sechokudya chaanofarira. Resitorendi yaanoda zvikuru inogovera munyepfu unorema magiramu 680 nembatatisi yakabhekwa yakatutirwa ruomba runovavira, nenzira yaanoda chaiyo. Keke rechokoreti rakaiswa aizikirimu yechokoreti pamusoro ndiwo museredzero waanoda zvikuru.

Thomas akareba masendimita 178 uye anorema makirogiramu 89; anorema zvinopfuura mwero nemakirogiramu 9, maererano nenhungamiro dzehurumende pamusoro pezvokudya dza1995 dzeUnited States. “Handisi kunetseka nouremu hwangu,” anodaro Thomas. “Utano hwangu hwakaisvonaka. Handisati ndarovha basa zuva rimwe mumakore 12 apfuura. Nguva zhizhinjisa, ndinonzwa zvakanaka uye ndine simba—kunze, chokwadika, kwepashure pokudya munyepfu unorema magiramu 680.”

Zvokudya zvaThomas, zvisinei, zvingagona kuva zviri kumukuvadza zvikuru here, zvishoma nezvishoma zvichimuita kuti agone kuzotambura nokurega kushanda kwemwoyo? Mubhuku rake rinonzi How We Die, Dr. Sherwin Nuland anotaura nezve‘mararamiro okuzviuraya’ uye anobatanidza maari zvokudya zvinoti ‘nyama, nhindi huru dzebhekoni, uye bhata.’

Zvokudya zvakati zvinotungamirira sei kuhosha yemwoyo muvazhinji? Chii chiri mazviri chinoparira ngozi? Tisati takurukura mibvunzo iyi, ngatinzveresesei ngozi kuutano dzokurema zvinopfuura mwero.

[Mufananidzo uri papeji 21]

Neiko zvokudya zvakadai zviri nhau yokuitira hanya?