Jeremiya
34 Iri ndiro shoko rakauya kuna Jeremiya richibva kuna Jehovha, Mambo Nebhukadhinezari* weBhabhironi neuto rake rese neumambo hwese hwenyika hwaiva pasi pake nemarudzi ese pavakanga vachirwisa Jerusarema nemaguta aro ese:+
2 “Zvanzi naJehovha Mwari waIsraeri, ‘Enda unotaura naMambo Zedhekiya+ weJudha, uti kwaari: “Zvanzi naJehovha, ‘Ndiri kuisa guta rino muruoko rwamambo weBhabhironi, uye acharipisa nemoto.+ 3 Iwe hauzopukunyuki paruoko rwake, nekuti uchatobatwa woiswa muruoko rwake.+ Uchaonana namambo weBhabhironi chiso nechiso uye achataura newe makatarisana, uye uchaenda kuBhabhironi.’+ 4 Asi inzwa shoko raJehovha, haiwa iwe Zedhekiya mambo weJudha, ‘Zvanzi naJehovha pamusoro pako: “Hauzourayiwi nebakatwa. 5 Uchafa murugare,+ uye vachakupisira moto wekukukudza sezvavakaitira madzibaba ako, iwo madzimambo ekare akakutangira, uye vachakuchema vachiti, ‘Maiwee tenzi kani!’ nekuti ‘ini ndataura shoko racho,’ ndizvo zvinotaurwa naJehovha.”’”’”
6 Muprofita Jeremiya akabva audza Mambo Zedhekiya weJudha mashoko aya ese muJerusarema, 7 mauto amambo weBhabhironi paakanga achirwisa Jerusarema nemaguta ese eJudha akanga asiyiwa,+ neRakishi+ neAzeka;+ nekuti ndiwo chete maguta ainge akakomberedzwa nemasvingo akanga asara pamaguta eJudha.
8 Iri ndiro shoko rakauya kuna Jeremiya richibva kuna Jehovha pashure pekunge Mambo Zedhekiya aita sungano nevanhu vese vaiva muJerusarema kuti avazivise nezvekusunungurwa,+ 9 kuti mumwe nemumwe asunungure varanda vake vechiHebheru, varume nevakadzi, kuti parege kuva nemunhu anoramba achiita muranda hama yake yechiJudha. 10 Saka machinda ese nevanhu vese vakateerera. Vakanga vaita sungano yekuti munhu wese asunungure varandarume vake nevarandakadzi vake uye kuti arege kuvaita varanda zvakare. Vakateerera, vakavarega vachienda. 11 Asi nekufamba kwenguva, vakadzosa varandarume vacho nevarandakadzi vacho vavakanga vasunungura, uye vakatangazve kuvamanikidza kuva varanda. 12 Saka shoko raJehovha rakauya kuna Jeremiya richibva kuna Jehovha, richiti:
13 “Zvanzi naJehovha Mwari waIsraeri, ‘Ndakaita sungano nemadzitateguru enyu+ pazuva randakavabudisa munyika yeIjipiti, muimba yeuranda,+ ndichiti: 14 “Panopera makore manomwe, mumwe nemumwe wenyu ngaasunungure hama yake yechiHebheru, yaakatengeserwa uye yakamushandira kwemakore 6; munofanira kuisunungura.”+ Asi madzitateguru enyu haana kuteerera kana kurereka nzeve dzawo kwandiri. 15 Uye munguva ichangopfuura,* imi makatendeuka mukaita zvakarurama pamberi pangu kuburikidza nekuzivisa kusunungurwa kuhama dzenyu, uye makaita sungano pamberi pangu muimba ine zita rangu. 16 Asi makabva machinja, mukasvibisa zita rangu+ pamakadzosa varandarume nevarandakadzi venyu, vamakanga masunungura zvichienderana nezvavaida,* uye makavamanikidza kudzokera muuranda.’
17 “Saka zvanzi naJehovha: ‘Hamuna kunditeerera panyaya yekuti mumwe nemumwe wenyu azivise nezverusununguko kuhama yake uye kumunhu wekwake.+ Saka iye zvino ndava kukuzivisai nezvekusunungurwa kwenyu,’ ndizvo zvinotaurwa naJehovha, ‘kuti muiswe kubakatwa, kudenda,* nekunzara,+ uye ndichaita kuti muve chinhu chinotyisa kuumambo hwese hwenyika.+ 18 Uye izvi ndizvo zvichaitika kuvarume vakaputsa sungano yangu pavakarega kuita mashoko ari musungano yavakaita pamberi pangu panguva yavakacheka mhuru nepakati vakapfuura nepakati pezvidimbu zvayo,+ 19 iwo machinda eJudha, nemachinda eJerusarema, vakuru vemumuzinda, vapristi, nevanhu vese vemunyika yacho, avo vakapfuura nepakati pezvidimbu zviviri zvemhuru yacho: 20 Ndichavaisa mumaoko evavengi vavo nemumaoko evaya vari kutsvaga kuvauraya,* uye zvitunha zvavo zvichadyiwa neshiri dzedenga nemhuka dzepanyika.+ 21 Uye ndichaisa Mambo Zedhekiya weJudha nemachinda ake mumaoko evavengi vavo nemumaoko evaya vari kutsvaga kuvauraya* nemumaoko emauto amambo weBhabhironi,+ avo vava kurega kukurwisai.’+
22 “‘Ndichapa murayiro,’ ndizvo zvinotaurwa naJehovha, ‘uye ndichavadzosa kuguta rino, uye vacharirwisa, voritora, voripisa nemoto;+ uye ndichaita kuti maguta eJudha ave matongo asina anogaramo.’”+