‘Woꞌmanka Woyite Hagiidhe!’ Yaannohu 2020hu Qoqqowu Gambooshshira Viidiyo Qixxeessa

Qoqqowu gambooshshiwa shiqqanno viidiyubba loosoho kakkayissannonke, hattono Qullaawa Borro albinni roore huwanteemmo gede kaaꞌlitannonke. ‘Woꞌmanka Woyite Hagiidhe!’ yaannohu 2020hu qoqqowu gambooshshiwa 114 viidiyo shiqqino; kuri giddo Aliidi Bisi miillanna kaaꞌlaanonsa shiqishshinoti 43 lallawo no. Tenne viidiyubba qixxeessate mageeshshi looso loonsoonnironna mageeshshi woxi fulinoro affinoonni?

Addi addi gobbara noori 900 meddi yitannori meyanna labbaa roduuwinke yannansanna dandoonsa horoonsidhe konne looso kaaꞌlitino. Kuri roduuwi xaphoomunni, lame diro saꞌanno yanna giddo 100,000 meddi yitanno saate konne looso loossino. Tenne giddo 70,000 saate, Nehimiya: Yihowa Aannonke Hagiirri Wolqankeeti yaannoha 76 daqiiqiha Qullaawu Maxaafi diraama qixxeessinoonnite.

Uminsa qiniite agurte soqqantannore kore roduuwa towaatate, teknikete kaaꞌlo kaaꞌlate, hasiisanno uduunne wonshatenna viidiyo kayisate hasiisanno bayicho qixxeessate lowo woxi hasiisannoti egennantinote.

Qoonqotenna Viidiyote Golira soqqamannohu Jeeredi Gosmaani togo yiino: “Aliidi Bisiti Rosu Komite, viidiyubbanke giddo babbaxxino budenna qooxeessa leellinshara hasidhanno. Tini, roduuwu maamarinke mitte gobbaha ikkikkinni alamete doyichoha ikkinota leellishshanno.” Isi lede togo yiino: “Kuni ikkanno gede, 11 gobbara nooti 24 gaamo konne looso mitteenni loossino. Konni garinni loosate lowo woxi, balanxe seekkine qixxaawanna qinaawino garinni loosa hasiissanno.”

Batinye viidiyubbanke qixxeessate addi uduunninna bayichi hasiisanno. Lawishshaho, Nehimiya: Yihowa Aannonke Hagiirri Wolqankeeti yaanno diraamira hasiisanno bayicho qixxeessinoonnihu Ameerikaho, Niwu Yoorkete, Paatersenira noote Maawunt Ibo istuudiyo giddooti. Roduuwu fushshotenni afiꞌnoonni woxi doogimale fulara hasidhannokkiha ikkirono, diraamu giddo leellinshanni coyibba hundi xagge ledo sumuu yitannota ikkitara hasidhino; hakko daafira, hundi Yerusaalameha kinchu huxxa lawannore seekkitino. Mitto mittonka “kinchu huxxa,” hojja lee meetire ikkanno haqqira kincho labbanno gede assine buurroonni foome dimbe seekkinoonni. Tenne “huxxuwa” bayichunni bayicho sayinsanni diraamu giddo addi addi coye leellishate horoonsiꞌnoonni; konni garinni looso shiima basera loonse guda dandiinoonni. Ikkirono, diraamaho hasiisanno bayicho qixxeessate calla, 100,000 Ameeriku doolaare meddi yaanno woxi fulino.a

Tenne afanke, tayixeha qoqqowu gambooshshe roore naandeemmo gede assitannonke. Konne qoqqowu gambooshshe qixxeessate loonsoonni loosi, alamete deerrinni Yihowa ayirranno gede assannota dihuluullammeemmo. Shaqqillunni donate.jw.org widoonninna wole doogganni fushshitinanni fushshora galanteemmoꞌne.