‘Woꞌmanka Woyite Hagiidhe!’ Yaannoha 2020ha Qoqqowu Gambooshshe Tira

Maaja 2020 hanafe, alamete doyichora noohu roduuwu maamari mite yee qoqqowu gambooshshe mitte taaera laꞌꞌanno. Kuni ikkanno gede, qoqqowu gambooshshi pirogiraame 500 saꞌꞌanno afiinni tira hasiissanno. Roore woyite, qoqqowu gambooshshi pirogiraame qineessate hattono viidiyubba kayisatenna tirate mitto diro saꞌanno yanna hasiissanno. Ikkollana Koroonu fayya qarrissino daafira tirote looso loossannori ‘Woꞌmanka Woyite Hagiidhe!’ yaannoha 2020ha Qoqqowu Gambooshshe shoole agana ikkitannokki yanna giddo loose guda hasiissinonsa.

Yihowa Farciꞌraasinete Qara Biirora noohu Tirote Looso Qineessanno Golinna Alamete Doyichohu Uduunne Hiranno Goli, konne jawa looso kaaꞌlame loosino. Tirote Looso Qineessanno Goli, tirote looso loossannote batinye gaamora lowo uduunni lawishshaho dancha maykirafoone hasiissannota huwatino. Alamete Doyichohu Uduunne Hiranno Goli kayinni, 1,000 maykirafoone hirre 200 meddi yaanno bayicho sonkanni gede assino.

Fulanno woxe gatisate, maykirafoone coccolo hirantenni batinye mitteenni hirre mitto mereerima bayicho worroonni; hakkiinni addi addi bayicho nootera tirote gaamora sonkoonni. Batinye maykirafoone mitteenni hirroonni daafira, mitte mittente maykirafoone waagi hodhishshunku ledo mereerimunni 170 Ameeriku doolaare ikkino; tini coccolunni hirroommero fulanno woxe 20 anga gatissino.

Alamete Doyichohu Uduunne Hiranno Goli, konne uduunne Dotteessunna Onkoleessu 2020 giddo hire soya hasiissinonsa; hattee aganna giddo Koroonu dhibbinni kainohunni lowoti daddalu dirijjitta cufante no. Ikkirono Onkoleessu agani jeefora, xeertonniti tirote biiro, sinu biironna wole tirote bayicho loossanno roduuwi hasiisannonsa uduunne afidhino.

Alamete Doyichohu Uduunne Hiranno Golira aliidi laꞌꞌaanchi Jeyi Siwiinii togo yiino: “Konne looso loonsi yannara addi addihu Beeteelete goli uduunne shiqishshanno dirijjitta ledo buusame loosino.” Isi lede togo yiino: “Konne looso shiima yanna giddo, fushshotenni afiꞌnoonni woxe danchu garinni horoonsiꞌne loosa dandiinoommohu Yihowa ayyaani kaaꞌlino daafira callaati.”

Tirote Looso Qineessanno Golira soqqamannohu Nikolaasi Alaadisi togo yiino: “Koroonu dhibbinni kainohunni mininni fula dandiitannokkiri tirote looso loossanno roduuwi konne uduunne afidhe lowo geeshsha hagiidhitino. Kuri roduuwi ledonsa tirote looso loossanno miillansa ledo xaaddannokkiha ikkirono, 500 saꞌꞌanno afiinni qoqqowu gambooshshi lallawo, diraamanna faarso mitteenni kaaꞌlante loosa dandiitanno.”

‘Woꞌmanka Woyite Hagiidhe!’ yaannoha 2020ha qoqqowu gambooshshe qineessate loonsoonnihu batinyu loosi giddo kuni mittoholla. Shaqqillunni donate.jw.org widoonninna wole doogganni fushshitinoonni woxi konne hasiisanno uduunne hirate kaaꞌlino.