Ammanate Roduuwinke Ledo Noonke Jaaloomi Baꞌꞌannokki Gede Assiꞌra Dandiineemmo Gara

1. Addu jaalla afiꞌra dandiineemmohu hiikkiinniiti?

KUNI goofimarchu diri lowo geeshsha yaachishannoho. Hakko iso addu jaalla noonkekkiha ikkiro roore qarrammammora dandiineemmo. Yihowa tenne afino daafira mannisi giddonni addu jaalla uynonke! (Fa. 119:63) Ninke Yihowa magansidhannotenna mimmito baxxanno maate widooti.

2. Ammanate roduuwinkera hiittoo jaalla ikka hasiꞌneemmo?

² Ammanate roduuwinkera mulla suꞌmi jaalla ikka dihasiꞌneemmo. Hatteentenni insara ammanammoommorenna muli jaalla ikka hasiꞌneemmo. Ninke Yihowa magansidhanno maate widooti; qoleno Yihowaranna Yesuusira noonke baxilli mittoonsinonke. (Yoh. 13:35) Roduuwinke ledo togoo jaaloomi heeꞌrinonkehu mulla kae diꞌꞌikkino. Togoo jaalooma kalaqiꞌrate sharrama hasiissannonke. Kayinni guuntete xeꞌne noonkere ikkinoommohura jaaloomanke hunannori tuncu yaankera dandaanno.

3. Jaaloominke baꞌꞌannokki gede assiꞌra shota ikkitinokkihu mayraati?

³ Mito manna wolunni roore muli jaala assiꞌra hasiꞌneemmo. Mayra? Togoo manni ledo mittu gari hasatto woy akatta noonkeha ikkara dandaanno. Kayinni wolu ammanate roduuwinke ledo jaalla ikkine heeꞌra qarra ikkitankera dandiitanno. Mito woyte mimmitu ledo sumuu yaa hoongammoranna tini mereeronke noo baxille huntara dandiitanno. Akatinke babbaxxanno daafira, mittoonsannonkeri dino yine wolootunniwa gambo gimbeemmoha ikkara dandaanno. Mito woyte ammanate roduuwinke buuto dhiwantanno woyte woy yaaddo amaddannonsa woyte jaalla ikkine heeꞌre qarra ikkitankera dandiitanno. Konni birxichira qarru tuncu yaannonke woyte jaaloominke baꞌꞌannokki gede assiꞌrate Yesuusi lawishshi kaaꞌlannonke gara laꞌneemmo. Hanni balanxe Maganu baxanno akatta lossiꞌra jaaloominke baꞌꞌannokki gede kaaꞌlitannonke gara laꞌno.

MAGANU BAXANNO AKATTA LOSSIꞌRA JAALOOMINKE BAꞌꞌANNOKKI GEDE KAAꞌLITANNONKE

4. Jaaloomanke kaajjishiꞌra dandiineemmohu hiittoonniiti?

⁴ Roduuwinke ledo noonke jaalooma kaajjishiꞌrate dancha akattansa illachisha hasiissannonke. Insa ledo yanna sayisa dancha akattansa qaangeemmo gede assitannonke. Soqqamaasinchu Phaawuloosi ammanate roduuwisi ledo yanna saysate lowonta quqquxamino. Isi Teselonqe Kiristaanira borreessino sokkara, “Kiꞌnenni xaadate lowo geeshsha sharrammoommo” yiino. (1 Te. 2:17) Batinyu manni jaalooma kaajjishiꞌrate xaande hasaawate geeshsha ikkannori nookkita huwatino. Soqqanshonniwa, songotenna jajjabbu gambooshshiwa roduuwinke ledo xaande hasaawate faro afiꞌneemmo. Kayinni konni garinni xaada calla roduuwinke ledo noonke jaalooma woyyeessiꞌrate kaaꞌla hooggankera dandiitanno.

5. Roduuwinke ledo noonke jaalooma hunannori tuncu yaannonke woyte kaaꞌlannonkeri maati? Lawishsha kuli. (Qolaasiyaasi 3:12)

⁵ Maganu baxanno akatta lossiꞌra roduuwinke ledo noonke jaalooma hunannore hooꞌlate kaaꞌlitannonke. (Qolaasiyaasi 3:12 nabbawi.) Umo heeshshi assineemmore, cincineemmore, mararreemmorenna shaqqadda ikkinummoro Jaaloomanke hunannore qeela dandiineemmo. Makeenu zayte motore garunni loossanno gede assitannonte gede, Maganu baxanno akatta jaaloomanke hunannore ajishate kaaꞌlitannonke. Hanni xa ammanate roduuwinke ledo noonke jaalooma hunara dandaannoha sase coye laꞌno. Qoleno, Yesuusi gede umo heeshshi assa, cinca, shaqqaddanna jooguulle ikka wolootaho addu jaalla ikkine heeꞌneemmo gede kaaꞌlitannonke gara laꞌneemmo.

JAALINKE LEDO SUMUU YAA HOONGEEMMO WOYTE

6. Sumuu yaa hooga jaaloomanke huntara dandiitannohu hiittoonniiti?

⁶ Qarra ikkannore. Lamu manchi sumuu yitannokkihu, mittu mittunku umisi hedo garaho yee hedannohura ikkara dandaanno. Hanni lamu roduuwi soqqanshote gaamonsa dancha gede qineessa lainohunni sumuu yaa hooggino yine hendo. Insa mittu mittunku ani yoommori woyyanno yite heddino. Kuni shiimu coyi roore sumuu yitannokki gede assansaranna jaaloomansa hunara dandaannota huwatootto? Jaaloomansa huntanni nooti naaxxa ikkitara dandiitanno. Insa coye hasaabbe tira hoogguro mimmitoho koma amaddara dandiitanno. Insa yanna saꞌanni hadhu kiiro konni shiimu coyinni kainohunni mimmito fiile hooltaranna jaaloomansa agurtara dandiitanno.

7. Yesuusi rosaanosira umo heeshshi assa kawa kaꞌaa higino coye tirate kaaꞌlitannota rosiisinohu hiittoonniiti?

⁷ Yesuusi gede umo heeshshi assitinannire ikke. Isi rosaanosira kawa kaꞌaa higino coye tirate qaru coy umo heeshshi assa ikkitinota rosiisinonsa. Rosaanosi mito woyte ninke giddo roorannohu ayeti yite heewisantanno. Yesuusi insa konne adhite lophitino akata qeeꞌlitanno gede kaaꞌlate woloota insanni roortannohu gede assite laꞌara rosiisinonsa. (Mat. 20:25-28) Isi, insa umo heeshshi assitanno gede rosiisanni noonsa. Yesuusi reyara albaanni noo hashsha nafa umosi heeshshi asse borojjichu loosanno looso loose yaano lekkansa hayishshe ‘lawishsha ikkinonsa.’ (Yoh. 13:3-5, 12-16) Isi konni garinni jaaloominsa baꞌꞌannokki gede assiꞌra dandiitanno gara leellishinonsa. Insa, wolootu insanni roortannohu gede assite heddannoha ikkiro, kawa kaꞌaanni higino coye tira qarra diꞌꞌikkitannonsa. Wolootu hedo insatewiinni baxxitannoha ikkiro nafa jaaloominsa baꞌꞌannokki gede assiꞌra shota ikkitannonsa.

8. Umo heeshshi assa coy kawa kaꞌaa higanno woyte jaaloominke baꞌꞌannokki gedel kaaꞌlitannohehu hiittoonniiti? (Qolaasiyaasi 3:13) (Misillano lai.)

⁸ Jaaloomikki baꞌꞌannokki gede assiꞌra dandaattohu hiittoonniiti? Umo heeshshi assa sumuu yaattokkiha shiimmaadda coye agurte woloota mulla gatona yaatto gede kaaꞌlitannohe. (Qolaasiyaasi 3:13 nabbawi.) Kuni akati coy kawa kaꞌaa higanno woyte wolootu ledo noohe jaalooma hunannore assattokki gede kaaꞌlannohe. (Fa. 4:4) Wolootu gara ikkinokkire coydhuhero ninke baalunku gedensoonni gaabbisannonkere coyiꞌneemmo woyti noota qaagi. (Ros. 7:21, 22) Ateneeto togo yite xaꞌmi: ‘Garaho yee cuꞌmiꞌre giwanni noommo coy wolootu ledo nooe jaalooma rooranno?’ Wolootu coydhino hedora sumuu yite saꞌꞌa doodha dandaatto. Sumuu yoottokki coye heda aguri hattono galagalte kayissooti.

9. Kawa kaꞌaa higino coye tira qarra ikkitanno woyte umo heeshshi assa kaaꞌlitannohehu hiittoonniiti? (Lawishsha 17:9)

⁹ Umo heeshshi assa kawa kaꞌaa higino coye tira qarra ikkitanno woyteno kaaꞌlitannohe. Ate hedo gara ikkitinota leellishate heewisantooti. (Lawishsha 17:9 nabbawi; 1 Qo. 6:7) Jaaloomikki baꞌꞌannokki gede assiꞌra hasiꞌrattota qaagi. Batinye roduuwa kalaqamino qarra tirate woloota shaqqillunni hasaawisa kaaꞌlitinonsa. (Fa. 34:14) Togo yaa dandaatto: ‘Atinna ani jaallate, kalaqamino coy daafira hasaamboni ballo?’ Atino hunoottori nootanna jaalikki xissiisiꞌrinota ammante adhate hattono maaro xaꞌmiꞌrate qixxaawi. Isi maaro xaꞌmiriro umokki heeshshi assite gatona yiisi. (Luq. 17:3, 4) Mixokki bushu ayetiro leellisha ikkitukkinni kawa kaꞌaa higino coye tirte jaaloomiꞌne baꞌꞌannokki gede assiꞌra ikkitinota qaagi.—Law. 18:24.

AKATINKE BABBAXXANNO WOYTE

10. Wolootu ledo jaalla ikkine heeꞌra qarra ikkitannonke gede assara dandaannori maati?

¹⁰ Qarra ikkannore. Ninkehunni baxxino akati noonsa roduuwi ledo muli jaalooma kalaqiꞌra qarra ikkitankera dandiitanno. Mitootu akati caacceessannonkeha ikkara dandaanno. Mitoota alba miincoonninsa daafira woy lophitino gari giddonsata fushshite coyiꞌrate huxuxxi yitanno gede assannonsa daafira ikkitonsa wosiꞌnitankera dandiitanno. Woy akatinke babbaxxinohu ninke mannunniwa aana hasiꞌneemmohura wolootu kayinni aana hasidhannokki daafira calla ikkara dandaanno.

11. Yesuusi isihunni baxxino akati noonsari ledo noosi jaaloomi baꞌꞌannokki gede assiꞌra dandiinohu hiittoonniiti?

¹¹ Yesuusi gede cincitinannire ikke. Yesuusi isihunni baxxino akati noonsari ledo noosi jaaloomi baꞌꞌannokki gede assiꞌrino. Lawishshaho Yaaqoobinna Yohaannisi Gashshootisira silxaane aannonsa gede xaꞌmidhu yannara silxaanete wojji yitannore ikkansa leellishshino. (Maq. 10:35-37) Yesuusi kayinni umosi heeshshi asse uullara daate iima noosi silxaanenna qoosso agurino. (Fil. 2:5-8) Hanni insa akati mageeshshi geeshsha baxxinohoro hedi! Ikkirono Yesuusi Yaaqoobinna Yohaannisi hattono woloota cince kaaꞌlinonsa.

12. Yesuusi jaallasi cince kaaꞌlanno gede assinosiri maati?

¹² Yesuusi jaallasi woꞌmanka woyte gara ikkinore calla assitanno yee diagadhino. Isi batinye rosaano insa insanaawa heewisamansa Yaaqoobinna Yohaannisinte gede silxaane hasidhannore ikkansa leellishannota afino. (Maq. 9:34) Insante gede Yesuusino lophinohu hakko budi giddooti. Hakko budira maccaha ikkanna silxaane lowori gede assine laꞌnanni daafira isi rosaanosi heddanno gara afino. Hakko daafira Yesuusi cince kaaꞌlinonsa hattono adhite lophitinoha booꞌnatenna silxaane hasiꞌrate akata qeeꞌlitanno gede yanna uynonsa.—Maq. 10:42-45.

13. Cinca jaaloominke baꞌꞌannokki gede kaaꞌlitannonkehu hiittoonniiti? (Efessooni 4:2)

¹³ Jaaloomikki baꞌꞌannokki gede assiꞌra dandaattohu hiittoonniiti? Caacceessannoheha wolootu akata dandiite saꞌꞌate sharrante cincate akata lossiꞌri. (Law. 14:29) Ninke baalunkura uminke akatta noonke; kuri akatta giddo batinye ayimmanke leellishshannote ikkinnina busha diꞌꞌikkitino. Hakko daafira wolootu akatanke gibbannokkita leellishshanno woyte tashshi yaannonke. (Efessooni 4:2 nabbawi.) Ninkeno wolootaho hattoore ikka hasiissannonke. Qoleno sammiimunna manna ille qase laꞌꞌa waajjanno manchi mannu ledo yanna saysatenna hasaawate mageeshsha sharrama hasiissannosiro hendo. Hattono mannu ledo hosanna lowore hasaawa baxanno mancho cinca hasiissannonke. Baalunkura muli jaalla ikkineemmo yine dihendeemmo; kayinni babbaxxitino akatta noonsa roduuwi Yihowara mitteenni dancha gede soqqama dandiitannota dea dihasiissannonke.

14. Cincineemmore ikka maa illachinsheemmo gede kaaꞌlitannonke?

¹⁴ Cinca ammanate roduuwinketa dancha akatta illachinsheemmo gede kaaꞌlitannonke. Hatto assineemmoha ikkiro, akatinke babbaxxinoha ikkasi jaaloomanke huntanno yine dihendeemmo. Lawishshaho Yaaqoobinna Yohaannisi umonsa calla baxxannohura Maganu gashshootira silxaane uyinansara xaꞌmidhino; ikkirono akatinsa Maganu Gashshooti xawe leellinonsatano leellishanno. Yesuusi ammanansa afino hattono galatinonsa. Ammanate roduuwinketa dancha akatta illachinsheemmo woyte Yesuusinna Yihowa lawishsha haꞌrunsinanni heeꞌnoommo.

15. Ninkehunni baxxino akati noonsari ledo noonke jaaloomi baꞌꞌannokki gede kaaꞌlannonkeri maati?

¹⁵ Ninkehunni baxxino akati noonsari ledo noonke jaaloomi baꞌꞌannokki gede kaaꞌlankera baalunkunni coyinni roorsine Yihowa huucciꞌra dandiineemmo. Caaccaawatto gede assannoheri maatiro balaxxe hedi hattono wodanaaꞌmatto gede kaaꞌlahera Yihowa huucciꞌri. Yihowa Kalaqaanchonke ikkino daafira ninke mittu mittunku babbaxxinoommore ikkinoommota afinota deꞌooti. Hakko daafira huucciꞌratto woyte Yihowa hasiisannohere asse kaaꞌlannoheta addaxxa dandaatto. Cincakki fonqolantanni noota huwatittoro Yihowa qullaawa ayyaanasi oye ateneeto eemadhatto gede kaaꞌlahera huucciꞌri.—Luq. 11:13; Gal. 5:22, 23.

AMMANATE RODUUWINKERA QARRU IILLANNONSA WOYTE

16. Ammanate roduuwinkera mitu qarri iillannonsa woyte hiittoo coy tuncu yaankera dandaanno?

¹⁶ Qarra ikkannore. Ammanate roduuwinke dhiwantanno woyte woy yaachishannori iillannonsa woyte hanqineemmo woy caaccaambeemmo gede assannore coydhara woy assitara dandiitanno. Lawishshaho insa mannunniwa gambo gibbara, caaccaabbara woy hendoommokkire nafa assitara dandiitanno. Qoleno xissiisannonkere coydhara woy assitara dandiitanno. (Iyo. 6:2, 3) Ammanate roduuwinkera iillanni noonsare huwantoommokki daafira insawiinni lowore agadhineemmoha ikkara dandaanno.

17. Yesuusi ille ballino manchi Berxemewoosira assinorinni maa ronseemmo?

¹⁷ Yesuusi shaqqillinna mararronni rosa. Yesuusi konni albaanni xaade egenninokkire ikkituro nafa qarrantinorira shaqqillenna mararro leellishino. Hanni isi ille ballino manchira Berxemewoosira assinore laꞌno. Berxemewoosi Yesuusi mulesiinni hige saꞌꞌanni noota afiti Yesuusi laꞌꞌasira yee lowo geeshsha cance coyiꞌrino. Mitu manni Berxemewoosi sammi yaanno gede kulinosi. Kayinni isi Yesuusi hursasira lowo geeshsha hasiꞌrino daafira wonanni roorse cance huucciꞌri. Isi cancanni noo gari mito manna caacceessino ikka? Ikkara dandaanno. Ikkirono Yesuusi “lowo geeshsha marare” shaqqillunni hasaawisinosi. (Mat. 20:34; Maq. 10:46-52) Qoleno ammanasira Berxemewoosi galatinosi. Hattono maalaletenni illesi fanino.

18. Qarru iillanni noonsa jaallakki kaaꞌla hasiissannohehu hiittoonniiti? (1 Teselonqe 5:14)

¹⁸ Jaaloomikki baꞌꞌannokki gede assiꞌra dandaattohu hiittoonniiti? Wolootaho danchummanna shaqqille leellishi. Kuni akati dhiwantinore woy yaaddo amaddinonsare ammanate roduuwakki ‘sheshifachishatto’ gede kaaꞌlannohe. (1 Teselonqe 5:14 nabbawi.) Addu jaali roorenkanni “qarru barra” kaaꞌlate qixxaawinoha ikkinota qaagi. (Law. 17:17) Togoo jaali qarru iillanni noonsare marare calla agurannoha ikkikkinni jawaachishannore coyiꞌre sheshifachishanno hattono mitore asse kaaꞌlanno.

19. Danchummanna shaqqille leellisha dandiineemmohu hiittoonniiti? (Misillano lai.)

¹⁹ Danchummanna shaqqille leellinsheemmoti mite doogga hiikkuriiti? Hige ammanate rodiinke xisso hursa didandiineemmo. Kayinni macciishshamannosirenna iillanni noosire huwatate sharrama dandiineemmo. (Mat. 7:12; 1 Ph. 3:8) Iillanni noosire hasaaphanno woyte seekkite macciishshi. Dandaamannoha ikkiro sheshifachishannosire coyiꞌrate woꞌnaali. (Law. 12:25) Kayinni iillanni noosire baala afoottohu gede assite hedattokki gede qorophi. (Law. 18:13) Cincate woꞌnaali hattono isiwiinni lowore agadhitooti.—Efe. 4:32.

20. Hiittoo jaala ikka hasiꞌratto?

²⁰ Ninke baalunku ammanate roduuwinke ledo noonke jaalooma lowori gede assine laꞌneemmo. Baalunku guuntete xeꞌne noonkere ikkinoommotanna mito woyte assa hasiꞌneemmokkire assineemmota qaaga hasiissannonke. Mito woyte woloota xissiisannore coyiꞌneemmohu woy assineemmohu iseraati. Hakko daafira umonsa heeshshi assite cinca, danchummanna shaqqille leellishshe ninke ledo noonsa jaaloomi baꞌꞌannokki gede assidhinore ammanate roduuwanke lowo geeshsha naandeemmo. Ninkeno togoo jaalla ikkate dandiinummore baala assino.