Ammananke Fonqolannori Iillannonke Woyte Ammanamme Heeꞌra Dandiineemmo Gara

1-2. Yesuusi Qifirinaahoomi rosiisanni heeꞌreenna ikkinori maati?

MITTO barra Yesuusi Qifirinaahoomi rosiisanni heeꞌre mannaho togo yii: “Manchi Beetti maala ita hoogginironna mundeesi aga hoogginiro heeshsho dinoꞌne. Maalaꞌya itannohuranna mundeeꞌya agannohura baalaho hegere heeshsho noosi; anino goofimarchu barra reyotenni kayiseemmosi.” (Yoh. 6:53, 54) Roore Yesuusi rosaano isi yiinore dibaxxino. Hakko daafira togo yitu: “Kuni biso shorodhi assanno coyeti; ayi dandee macciishshanno?”—Yoh. 6:60.

² Yesuusi coyiꞌrinorinni gufidhino rosaano iso haꞌrunsa agurtino. Insa agurtinohu Yesuusa horonta ammantannokki daafiraati? Kuni coy ikkara albaanni mitu manninna gama Yesuusi rosaano isi assinore laꞌe maalaꞌlite togo yitino: “Alame daanno yini Masaalaanchi addinta isooti.” (Yoh. 6:14) Hakko daafira insa iso ammantannoti dihuluullissannote. Ikkirono insa ammanansa fonqolanno coy tuncu yiinsata isira ammanantukki gattino.

3. Yesuusi coyiꞌrinorira soqqamaasine mayte qoltu? Hatto yite qoltinohu mayraati? (Misileno lai.)

³ Soqqamaasinesi kayinni Yesuusira ammanantino. Yesuusi insano agurte haꞌra hasidhannoronna teꞌee xaꞌmita, Pheexiroosi togo yee qolino: “Mooticha, ayenkewa haꞌneemmo? Atera hegere heeshsho qaali noohe. Ati Qullaawa Maganu Soqqamaancho ikkoottota ammannoommo; qoleno anfoommo.” (Yoh. 6:68, 69) Pheexiroosi, isino ikko wole soqqamaasine, Yesuusi maalasi itanna mundeesi aga hasiissannonsata coyiꞌri woyte hatto yaasi mayyaatero woꞌmunni woꞌma huwattino yiinokkita wodanchi. Hatte yannara insa wodanchitino coy ikkihano ikkiro Yesuusira ammanante heeꞌra doodhitino. Mayra? Korkaatuno insa Yesuusi ‘Maganu Buurino Moote’ ikkinota affino.—Luq. 9:20, 35.

4. Hiittoo fonqoli iillankera dandaanno?

⁴ Yihowara noonke ammana fonqolara dandaannohu batinyu coy no. Lawishshaho Yihowa dirijjite mitto qummeeshsha konni albaanni huwantoommo gara woy dancha duduwo sabbankeemmo gara soorritanno woyte maa assineemmo? Woy iillinonke qarri lowo geeshsha gawajjinkeronna Yihowa kuni qarri iillankera fajjinohu mayraatiro leella hooginkero maa assineemmo? Shinqeemmohu ammanate jaalinke xissiisannonke woyte woy mittu ayirrinseemmo manchi gara ikkinokkire assinonkeha lawannonke woyteno ammananke fonqolantara dandiitanno.

5. Ammananke kaajjado safo aana xintiꞌra hasiissannonkehu mayraatiro leellishanno lawishsha kuli. (Qolaasiyaasi 1:23)

⁵ Ammananke kaajjado safo aana xintiꞌra hasiissannonkehu mayraatiro lawishshunni kulate, baattote huxano kaꞌannowa minnoonniha mitto hintsa hedi. Togoo mini baattote huxano dandee saꞌꞌanno gede safosi kaajjado ikka hasiissanno. Hatteente gede aliidi gufora kulli gedeeha ammanate fonqolo dandiine saꞌꞌate ammananke kaajjado safo aana xintiꞌra hasiissannonke. Woꞌmanka woyte ammananke safo kaajjishiꞌneemmoha ikkiro, fonqolu iillinkerono kaajjine uurrine ammanammoommore Yihowa soqqamaano ikkine heeꞌneemmo.—1 Qo. 15:58; Qolaasiyaasi 1:23 nabbawi.

6. Soqqamaasine Yesuusira ammanante heedhanno gede kaaꞌlinonsari maati?

⁶ Batinyu manni agure haꞌrita soqqamaasine Yesuusira ammanante heedhanno gede kaaꞌlinonsari maati? Soqqamaasine baalankare kalaqino daafira Yihowa magansiꞌra hasiissannonsata, Yesuusi Yihowa Beetto ikkinota, Yesuusira hajajanturo hegere heeshsho afidhannotanna Yihowa Yesuusi assannorinni hagiidhannota affino. Hanni xa ammananke fonqolara dandaanno coye agurre, iillannonke fonqoli ikkihano ikkiro ammanatenni kaajjine uurrineemmo gede kaaꞌlannonkeha sase halaale laꞌno. Kuni sasu halaali aane nooho: (1) Baalankare kalaqinohu Yihowaati. (2) Qullaawa Maxaafa borreessiisinohu Yihowaati. (3) Xaa yannara Yihowa mannasi kaaꞌlanni no. Konne sasenka halaale seekkine ammannummoro ammananke fonqolanno coy iillannonke woyte ammanamme heeꞌneemmo.

YIHOWA KALAQAANCHOHO

7. Ajuuja 4:11 maa qaagiissitannonke? Ammananke fonqolannori tuncu yaannonke woyte ma ikkinammora dandiineemmo?

⁷ Ajuuja 4:11 nabbawi. Kuni qummeeshshi baalankare kalaqinohu Yihowa ikkinota qaagiissannonke. Kuni halaali umisi magansiꞌra hasiissannonkehu Yihowa ikkinota leellishanno. Dhagge ikkitanno wolqasi hiincineemmo woyte Yihowa iillannonke fonqoli baalunkunni gatisankera dandaannota addaxxineemmo. Ikkirono Sheexaanu alamete aana, mannu Maganu nooha ikkasi huluullamanno gede assanno totao wonshino. Mitu egennantinori sayinsete fullahaano nafa kalqete alame mulla hedeweelcho dagginote yitanno. Yihowa kalaqaancho ikkinotanna baxannonketa woꞌmunni woꞌma ammanneemmokkiha ikkiro ammananke fonqolannori tuncu yaannonke woyte Isi nooha ikkasinna kaaꞌlannonketa huluullama hananfammora dandiineemmo.—Ibi. 11:6.

8-9. Yihowa Kalaqaancho ikkinota huluullama hanafittoro maa assa hasiissannohe? (Misileno lai.)

⁸ Yihowa Kalaqaancho ikkinota huluullama hanafittoro rakke qaafo adhi. Baalankare kalaqinohu Yihowa ikkinota seekkite buuxate tenne daafira kultanno borruwanke seekkite xiinxalli. Heeshsho Dagginohu Kalaqanteeti? hattono Heeshshote Kaima—Dawaronsa Afa Hasiissannota Onte Xaꞌmuwa (Amaaru Afoo) yitanno birosherubba giddo ammana kaajjishshannota batinye taje afiꞌratto. Tenne daafira ledote taje kulannohu jw.org aana aante aantete fulannohu “Kalaqinohu No?” yaanno birxichino no. Yunayitidi Isteetisete heedhannoti Jesika yinanniti wedellitte rodoo togo yitino: “Heeshsho Dagginohu Kalaqanteeti? yitanno biroshere nabbawummahu gedensaanni hedate dandoo noosi Kalaqaanchi noota albinni roore ammanoomma. Kalaqaanchu noota albanni afoomma; kayinni tenne biroshere lede nabbawummahu gedensaanni roore buuxoomma.” Qoleno lowo manna Hegerera Hagiidhitanni Heeꞌra Dandaatto! yaanno maxaafa roso 6nna 7 nabbawa kaaꞌlitinonsa. Konne maxaafa nabbawoottoha ikkara dandaanno. Ikkirono lede nabbawa danchate.

⁹ Aantannota hojju xiinxallo assiꞌratto woyte Maganu noota buuxissanno taje xiinxalla dandaatto. Konni garinni xiinxallakki Yihowa nooha ikkasi albinni roore ammanatto gede calla ikkikkinni akattasino ledde buuxatto gede kaaꞌlitannohe. (Rom. 1:20) Qoleno rosoottore Maganu nooha ikkasi huluullantannore kaaꞌlate horoonsiꞌra dandaatto. Yihowa Kalaqaanchonke ikkinota buuxissannota batinye taje uynonke.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

QULLAAWA MAXAAFA BORREESSIISINOHU YIHOWAATI

10. Qullaawu Maxaafi geeshsha ikkannonkeri dino yineemmohu mayraati? (2 Ximootewoosi 3:16, 17)

¹⁰ Layinki Ximootewoosi 3:16, 17 nabbawi. Qullaawu Maxaafi Yihowa mannu oosora soyno sokkaati. Kuni maxaafi heeshshote daafira xaꞌminannite lowo geeshsha hasiissanno xaꞌmuwara dawaro qolanno; hattono Yihowa fajjo maatironna isi assinammora hasiꞌrannore kulannonke. Qullaawa Maxaafa borreessiisinohu Yihowa ikkinota ammanneemmo; Qullaawu Maxaafi geeshsha ikkannonkeri dino yineemmohu iseraati. Isi Qaale huwantoommotanna loosu aana hosiisate dandiinummore baala assinanni heeꞌnoommota buuxiꞌra hasiꞌneemmo.

11. Qullaawa Maxaafa borreessiisinohu Magano ikkinota ammanatto gede assinoheri maati?

¹¹ Qullaawa Maxaafa borreessiisinohu Yihowa ikkinota ammaneemmohu mayraati? Batinye korkaata kula dandiinanni. Qullaawu Maxaafi kulanno xagge halaaleho. (Luq. 3:1, 2) Qoleno kalaqamu daafira kulannori halaaleho. (Iyo. 26:7) Sheexaanu hunate lowo geeshsha sharramirono Qullaawu Maxaafi geeshsha duuchu afiinni lowo mannira tuqinohu wolu maxaafi dino. Qullaawa Maxaafa mito 40 ikkannohu addi addi manni borreessino; borreessine gundoonnihu 1,600 saꞌꞌanno diri giddooti; ikkirono giddosi noo sokka ise iseneewa sumuu yitannote. Borreessininku lowo yanna saꞌinoha ikkirono giddosi noo amaale lowo miliyoone ikkanno manna kaaꞌlitanni no. (Law. 13:20; 15:21; Mat. 7:12) Qoleno giddosi nooti batinye masaalo woꞌmitino; tinino Qullaawu Maxaafi addaxxinanniha ikkinota leellishshannote. (Iya. 23:14) Eewa, Qullaawa Maxaafa borreessiisinohu Yihowaati!

12. Qullaawa Maxaafa borreessiisinohu Magano ikkinota huluullama hananfummoro maa assa hasiissannonke?

¹² Qullaawa Maxaafa borreessiisinohu Magano ikkinota huluullama hananfummoro maa assa hasiissannonke? Tenne daafira huuccatto assiꞌranna huuccattonke ledo sumuu yaannore assa hasiissannonke. Halaalu mine lophinohu Jordaani yinanni wedellichi togo yiino: “Kulloonniere baala baychonko diammaneemmo. Ammaneemmo coy halaale ikkasi buuxate seekke heda hasiissannoe. Mito woyte macciishshoommore woy nabbawoommore ammana qarra ikkitannoe. Togoo woyte borruwanke xiinxalle xaꞌmuwaꞌyara dawaro afiꞌratenna huluullo qeeꞌlate danduummore baala asseemmo.” Qullaawa Maxaafa borreessiisinohu Yihowa ikkasi albinni roore ammannummo kiiro ammananke safo kaajjado ikkitanno.—1 Qo. 3:12, 13.

YIHOWA XAA YANNARA MANNASI KAAꞌLANNI NO

13. Xaa yannara Yihowa massaganni noo dirijjite hiittenneetiro huluullama hananfummoro ma assa hasiissannonke?

¹³ Xaa yannara Maganu massaganni noori Yihowa Farciꞌraasine ikkitinota huluullama hananfummoro ranke qaafo adha hasiissannonke. Lawishshaho aante noo xaꞌmuwara dawaro afiꞌra hasiissannonke: ‘Xaa yannara Qullaawu Maxaafi biddishshi garinni heeꞌrate dandaaminsare baala assitanni noori ayeooti? Ammaꞌnonsa woꞌmunni woꞌma Qullaawu Maxaafi aana xintantino dirijjite hiittenneeti? (2 Xi. 4:3, 4) Xaa yannara Yihowa fajjo assitanni noori ayeooti?’—Mat. 7:20, 21.

14. Yihowa Maatewoosi 24:14 kulloonnire wonshate Farciꞌraasinesi horoonsiꞌranni noohu hiittoonniiti?

¹⁴ Xaa yannara Maganu fajjo assa lainohunni ninkeneeto togo yine xaꞌma dandiineemmo: ‘Yesuusi balaxe kulino garinni tenne goofimarchu yannara sabbakate looso loossanni noori ayeooti?’ (Mat. 24:14) Tenne xaꞌmo dawaro digoꞌlitinote. Maganu sabbakate looso loosiisate mannasi yaano Yihowa Farciꞌraasine horoonsiꞌranni no. Maganu Gashshootiha dancha duduwo 240 saꞌanno gobbuwara sabbankanni heeꞌnoommori ninke callaati. Maganu Gashshooti massagannanke konne looso 100 saꞌꞌanno diro loonsanni keeshshinoommo. Ee, Maganu mannira sabbakatenna rosiisate looso roorannonsari dino.—Mat. 28:19, 20.

15. Xaa yannara Yihowa Farciꞌraasine Maganu suꞌmi qullaawanno gede assitanni noohu hiittoonniiti? (Maatewoosi 6:9; Isayaasi 43:10)

¹⁵ Maatewoosi 6:9 nna Isayaasi 43:10 nabbawi. Mannu ninke bade afannonkehu Yihowa suꞌminni woshshammeemmore ikkankenniiti; Yihowa Farciꞌraasine yaamamme woshshama ninkera lowo ayirrinyeeti. Alamete aana noohu rooru manni konne suꞌma lashshi asse agurinote tenne yannara ninke konne suꞌma Qullaawu Maxaafi giddo malino baychosi qolloommo. Maganu suꞌmi Qullaawa Borrote Haaro Alame Tiro giddo 7000 saꞌꞌanno baycho no.

16. Yihowa Farciꞌraasine Yohaannisi 13:34, 35 noo hajajo wonshitanni no yineemmohu mayraati? (Misileno lai.)

¹⁶ Yohaannisi 13:34, 35 nabbawi. Mannu manna mulla kae giwannotenna babbadooshshu batiꞌrinote tenne alamera ammanate roduuwinke mereero noo baxillinna mittimma maalalete yaa dandiinanni. Gobbanke, budinkenna lophinoommo gari babbaxinoha ikkirono mereeronke keerunna baxillu heeꞌranno gede dandiinummore baala assineemmo. Wolu qooxeessira noo songo hadhe egennoottoha ikkara dandaanno. Hatto ikkiro ammanate roduuwinke heedhannowi ikkiwano ikkiro mereeronsa noo baxillenna mittimma huwatoottoha ikkara dandaanno. Tini Yihowa yannankera fajjosi wonshate Farciꞌraasinesi horoonsiꞌranni noota leellishshannote. Tenne qaaganke iillannonkehu ammanate fonqoli ikkihano ikkiro Yihowara ammanamme heeꞌneemmo gede kaaꞌlitannonke.

HORONTA YIHOWA AGUDHITOOTI

17-18. Qarrisannohu hiittoo coy tuncu yaankera dandaanno? Ikkollana woꞌma giddonni mayyaa dandiineemmo?

¹⁷ Kuni dandee heeꞌrate qarrisannohu goofimarchu diri ninke baalanka waadannonke. (2 Xi. 3:1, 13) Wolu gari qarrino iillankera dandaanno. Lawishshaho Yihowa dirijjite murtino coy woꞌmunni woꞌma leella hoogankera dandaanno. Woy mittu ammanate rodiinke assootisinni gawajjinonkeha ikkara dandaanno. Hattono qarrinkera mala afiꞌnoommokkiha woy qarru iillanni noonkehu mayraatiro anfoommokkiha ikkara dandaanno.

¹⁸ Togoo coy abbannohu buutote qarri iillinkerono Yihowa kalaqaancho ikkinota, Qullaawu Maxaafi isi Qaale ikkinotanna Yihowa Farciꞌraasine isi daga ikkitinota ammanneemmoha ikkiro, woꞌmanka woyte Yihowara ammanamme heeꞌra dandiineemmo. Pheexiroosi Yesuusira yinonte gede Ninkeno Yihowa, “Ayenkewa haꞌneemmo? Atera hegere heeshsho qaali noohe” yaa dandiineemmo.