Cuuamate Kaaꞌlitannohe Qaafo Adhi

1. (a) Cuuammummoro afiꞌneemmoti mite horo hiikkuriiti? (b) Konni birxichira maa xiinxallineemmo?

HEESHSHOKKI Yihowara sayisse uyte cuuamootto? Hatto ikkiro, keeraancho tiia afiꞌrate Magano huucciꞌrootto yaate. (1 Ph. 3:21) Hatto assakkinni songote giddo noori cuuantinokki wedellootiranna haaruuddeho dancha lawishsha ikkootto. Hakko daafira dancha doorsha doodhootto! Ikkina xaa geeshsha cuuamoottokkihalla ikki? Yihowa baxattotinna fajjosi assa hasiꞌrattoti dihuluullissannote. Cubbikkira maaro afiꞌratenna Yihowa hagiirsiisate cuuama hasiissannoheta afootto. (Soq. 2:38-40) Ikkollana cuuamate hobbi ruxxi yitanni noottoha ikkara dandaanno. Hatto ikkiro may kaaꞌlahera dandaanno? Konni birxichira, (1) mitootu cuuamate hobbi ruxxi yitannohu mayraatiro, (2) goofimarchu gambisinota qaaga hasiissannonkehu mayraatironna (3) keeshshinummokkinni cuuamate qaafo adha kaaꞌlitannonkehu hiittoonniitiro ronseemmo.

MITOOTU HOBBI RUXXI YITANNOHU MAYRAATI?

2. Mitootu cuuamate hobbi ruxxi yitannohu mayraati?

² Mitootu cuuamate hobbi ruxxi yitannohu waajjitanno daafiraati. Lawishshaho insa Yihowara soqqama hasidhannoha ikkirono, ‘Iso hagiirsiisa horo didandeemmo’ yite heddanno. Atino hatto yite hedattoha ikkiro, Yihowa guutoota ikke yaannonkekkitanna iso magansiꞌrate dandiinummore baala assinummoro hagiidhannota buuxissanno qummeeshshuwa nabbawi. (Fa. 103:13, 14; Qol. 3:23) Mannu giwannoe yite waajjattoha ikkiro, faarsaanchu gede worba ikkatto gede kaaꞌlahera Yihowa huucciꞌri; faarsaanchu togo yiino: “Kaaliiqi ledoꞌya heeꞌre kaaꞌlannoe daafira, diwaajjeemmo; mannu assannoeri dino.”—Fa. 118:6.

3. Mitootu cuuamate hobbi ruxxi yitannohu mayte heddannohuraati? (Misileno lai.)

³ Mitootu Yihowa baxxannoha ikkirono, cuuamate hobbi ruxxi yitannohu gari egenno dinonke yite heddannohuraati. Kayinni cuuamate lowo egenno hasiissanno? Hanni Qullaawu Maxaafi lawishsha laꞌno. Soqqamaasinchu Phaawuloosinna Silaasi usurante noohu usuru mini baatto huxidheenna shafamihu gedensaanni, usuru mini agaraanchiranna minisi mannira farcidhino. Kuni manchinna minisi manni maalaꞌlisannori ikkinota huwatikkinni digattino. Qoleno insa hakko hashsha Yihowanna Yesuusi daafira mito hasiisanno roso rossino. Tini, insa ‘hakkawoyintenni cuuantanno’ gede kakkayissinonsa. (Soq. 16:25-33) Yihowa afoottohanna iso woꞌmu wodanikkinni baxattoha, xinta ikkitinota Qullaawu Maxaafi egenno afiꞌroottoha, cubbikkira maaro eoottohanna Yihowa biddissi garinni heeꞌrate murciꞌroottoha ikkiro cuuamate qixxaawootto.—Maq. 12:30.

4. Mitootu cuuamate hobbi ruxxi yitanno gede assannonsari woluri maati? (Misileno lai.)

⁴ Mitootu Magano hagiirsiisa hasidhannoha ikkirono, iso hagiirsiisate yite agurtannore illachishshanno. Hige doodhineemmo doorshi abbanno guma heda hayyote. (Luq. 14:27-30) Ikkirono mitootu Maganoho soqqamate yite agura hasiissannonsa coy daafira quwa saꞌe yaaddanno. Anje heedhe halaale rossinota Kandeesi togoori yaachishinose. Ise lophituhu gedensaanni Qullaawa Maxaafa xiinxallitanno gede koyinsoonnise. Ise togo yitino: “Heeꞌranni noomma heeshsho Yihowa hagiirsiissannokkita afoomma; kayinni tenne heeshsho baxeemma daafira, agura dihasiꞌroomma. Heeshshoꞌya biddi assiꞌra shota ikkitannoekkita afoomma.” Wolootu kayinni, cuuantinori agadha hasiissannonsa biddissa agadha didandiineemmo yite yaaddanno. Insa ‘Cuuammummohu gedensaanni jawa cubbo loonseenna songotennilla fushshininke?’ yite yaaddanno. Togoo yaaddo ateno hobbi ruxxi yaatto gede assitinoheha ikkiro, maa assa dandaatto?

5. Cuuamate hobbi ruxxi yineemmoha ikkiro, maa illachisha hasiissannonke? (Maatewoosi 13:44-46)

⁵ Mitto uduunnicho hidha hasiꞌnummoro, fushshineemmo woxe calla ikkikkinni hakku uduunnichi kaaꞌlannonke garano hendeemmo. Hakku uduunnichi afiꞌrino horo iso hidhate fushshineemmo woxe roortannoha ikkiro, baychonkonni hidhineemmoti egennantinote. Hatteente gede cuuamate hobbi ruxxi yineemmoha ikkiro, biddi assiꞌra hasiissannonkere calla ikkikkinni Yihowa ledo kalaqiꞌneemmo jaaloomi hakkonne coye mageeshshi geeshsha roorannoro heda hasiissannonke. Yesuusi tenne hedo xawisate lame lawishsha horoonsiꞌrino. (Maatewoosi 13:44-46 nabbawi.) Lamunku lawishshira kulli mannooti afidhinoha lowo waaga afiꞌrino coye hidhate noonsare baala hirtino. Atino lowo waaga afiꞌrino coye afiꞌrootto yaano Maganu Gashshooti daafira kulanno halaale rosootto. Rosootto halaali garinni heeꞌra gaabbissannota labbuhero Yesuusi coyiꞌrino lawishsha seekkite hedi. Ateneeto togo yite xaꞌma dandaatto: ‘Maganu Gashshooti daafira kulanno halaali lowo waaga afiꞌrinota ammaneemmo? Yihowa ledo nooe jaalooma, isi uynoe hexxonna mimmito baxannoha roduuwu maamara addinta naadeemmo?’ Kuri xaꞌmuwara qolatto dawaro halaale albinni roore naadatto gedenna cuuamattokki gede guficho ikkinohere badde afatto gede kaaꞌlitannohe.

6. Danchu wodani heeꞌrannonke gede assiꞌra dandiineemmohu hiittoonniiti?

⁶ Yesuusi wixa wixanno manchi daafira kulino lawishshira, mittu manchi wodani ayyaanaamittetenni lophannokki gede guficho ikkasira dandaannota xawisino. Ikkirono Yesuusi mitu manni Maganu Gashshooti sokka “danchunna faayyu wodaninni” macciishshe adhannotano coyiꞌrino. (Luq. 8:5-15) Aterano wodanikki bebbeehaminoha lawihero hexxo mudhitooti. Maganu kaaꞌlonni atino biddissisira hajajamannoha “haaro wodana” kalaqiꞌra dandaatto. Rosoottore baxattonna loosu aana hosiisatto gede kaaꞌlahera Yihowa huucciꞌri.—Hiz. 18:31; 36:26.

7-8. Mitu wedelli cuuantannokki gede guficho ikkannonsari maati? (Misileno lai.)

⁷ Mitu wedelli Yihowa baxxannoha ikkirono, ayyaanaamittetenni lophite cuuantannokki gede wolootu guficho ikkitannonsa. Lawishshaho mite rosiisaano rosaanote Maganu biddissa diiga qara afidhinokkihu gede assite rosiissannoha ikkara dandaanno. Ikkollana togoo amaale qarru giddo tugganno. (Fa. 1:1, 2; Law. 7:1-5) Faarsaanchu lawishsha haꞌrunsite togoo qarrinni gata dandaatto; isi togo yiino: “Hajajokki marro hige hedatenni, rosiisaanoꞌya baalantenni roore wodancha afiꞌroommo.”—Fa. 119:99.

⁸ Mitu Yihowa Farciꞌraasine ikkitino annuwinna amuuwi oosonsa cuuantannota hooltannoha ikkara dandaanno. Insa oosonsa rosonna looso quwa saꞌe illachishshanno gede assitanno; hattono ayyaanaamittete mixo fushshidhanno gede kaaꞌlitannonsakkiha ikkara dandaanno. Annikkinna amakki ayyaanaamittetenni lophatto gede roore kaaꞌlitahera hasiꞌratto? Hatto ikkiro, tenne hajo daafira insa ledo hasaawa dandaatto. Dirikki ikkihano ikkiro Yihowa ledo muli jaalooma kalaqiꞌra dandaatto.—Law. 20:11.

9. Mitootu cuuantukkinni keeshshitannohu mayra ikkara dandaanno?

⁹ Mitootu cuuamate guunte wonshitinoha ikkirono, cuuantukkinni keeshshitannohu jaalinsa woy wolu baxxanno manchi ledo cuuama hasidhannohura ikkara dandaanno. Hige baxatto manni ledo mitteenni cuuama qarra diafidhino. Kayinni tini cuuamittokkinni keeshshatto gede assitahera wodha hasiissannohe? Heeshshokki Maganoho sayisse aattohu wole manna laꞌe ikkinokkita qaagi. Cuuamattohu wolu manchi cuuaminohura ikka dihasiissanno.—Rom. 14:12.

GOOFIMARCHU GAMBISINOTA QAAGA HASIISSANNONKEHU MAYRAATI?

10. Mitootu ayyaanaamittetenni rakke lophitannokkihu mayra ikkara dandaanno?

¹⁰ Aleenni kulli korkaatano agurranna mitootu ayyaanaamittetenni rakke lophitannokkihu goofimarchu dirahino yite heddannohuraati. Kayinni hatto yee heda garaho? Yesuusi rosaanosi togo yee qorophisiisino: “Manchi Beetti daanno yitine heddinoonnikki saatera daanno daafira qixxaabbine agadhe.”—Luq. 12:40.

11. Faarso 119:60 kultanno garinni Yihowa anfanni haꞌnummo kiiro ma assate kaꞌneemmo? Mayra?

¹¹ Heeshshonke Yihowara sayinse uyneemmohu iso banxeemmo daafiraati. Baxillaancho Maganonke anfanni haꞌnummo kiiro, hajajosi albinni roore baxatenna baychonkonni hajajamate kaꞌneemmo. (Faarso 119:60 nabbawi.) Rosaanchu Yaaqoobi Yihowa hajajora baychonkonni hajajammeemmo gede assannonkeha wole hasiisanno korkaata luphi assino. Ninke giddo gaꞌa may ikkannoro afinohu dino. “Gara ikkino coye” assineemmohu wolu barri hoogankera dandaanno; hakko daafira assa hasiissannonketa anfoommo coye techonni assino.—Yaq. 4:13-17.

12. Yesuusi woynete irshi daafira coyiꞌrino lawishshinni maa ronseemmo?

¹² Hanni Yesuusi woynete irshi daafira coyiꞌrino lawishsha hedi. Yesuusi mite loosaasine mitte saate calla loossinoha ikkirono, barra woꞌma loossinori ledo taalo baantoonninsata coyiꞌrino. Mitte saate calla loossu loosaasine looso yannanni hanaffinokkihu mayraati? Insa, “Loosiisiꞌrannonkeha hoongeeti” yitino. Insa looso barra woꞌma loossinokkihu ceeꞌmite ikkikkinni loosiisiꞌrannonsaha hooggeetilla. Insa loossanno gede woshshininsata baychonkonni loosoho hadhino. (Mat. 20:1-16) Xaa yannara Yesuusi ninkeno rosaanosi ikkineemmo gedenna Maganu Gashshooti looso loonseemmo gede woshshinonke. Ninkeno Yesuusi kulinonkere baychonkonni assa hasiissannonke.

13. Looxi minaama xaggenni maa ronseemmo?

¹³ Mitootu qaafo adhitukkinni keeshshitannohu goofimarchu gambise dayro Yihowara soqqammeemmona yite heddannohura ikkara dandaanno; kayinni coy insa heddu gede diꞌꞌikkanno. Yesuusi tenne afinohura rosaanosi “Looxi minaama qaagge” yee qorophisiisino. (Luq. 17:31-35) Ise Maganu yiino garinni Soddoomunna Gomooru mulenni baꞌꞌasi gattannokkita seekkite affino; ikkirono isera agurte daggino coye heda agura qarra ikkitinose. (Kal. 19:23-26) Ise xagge gatote qixxaawino waalchi faꞌnamino gedee heeꞌrannokkita qaagiissitannonke. Maganu yannasira konne waalcho hegerera cufanno.—Luq. 13:24, 25.

14. Qullaawu Maxaafi masaalo illachisha hasiissannohehu mayraati?

¹⁴ Alamete aana barru baala ikkanni noori Qullaawu Maxaafi masaalo woꞌmitanni noota leellishanno. Tenne ikkito giddo mite ate gawajjitinohekkiha ikkiro nafa addi addi qooxeessira ikkanni noore laꞌꞌakki, dandaami deerrinni baychonkonni cuuamate qaafo adhatto gede kakkayissannohe. Hanni umi xibbi diri lawishsha laꞌno. Soqqamaasinchu Pheexiroosi Kiristaana, “Baalunku coyi goofimarchi gambisino. Hakko daafira . . . baqqi yitinoonnire ikke” yee amaalino. (1 Ph. 4:7) ‘Goofimarcho’ yaanno qaali Yerusaalamenna qullaawu mini baꞌꞌanno yanna leellishannoti egennantinote. Pheexiroosi sokka borreessi Kiristaani Yerusaalametenni xeertiꞌre heeꞌranno; hakko daafira tini bao insa xaaddote gawajjitannonsakkiha ikkara dandaanno. (1 Ph. 1:1) Ikkirono tini masaalo woꞌmitanna laꞌꞌansa, Yihowa einoha wole qaale baalano wonshannota albinni roore addaxxitanno gede assitannonsa. Hatteente gede atino goofimarchu daafira kultanno masaalo woꞌmitanni noo gara illachishakki, cuuamate kaaꞌlitannohe qaafo adhatto gede kakkayissannohe.

15. Yihowa barrira qixxaawa dandiineemmohu hiittoonniiti? (2 Pheexiroosi 3:10-13)

¹⁵ Pheexiroosi qullaawu ayyaaninni borreessinote layinki sokkara, Yihowa barrira qixxaawa dandiineemmo gara xawisino. Pheexiroosi hattee sokka borreessi woyte, Yihowa barri daate lowo yanna gatte nooha ikkirono, hakkawari Kiristaani konne barra ‘surrensanni shiqqi asse hedanno’ gede woy ‘quqquxamanno’ gede kulinonsa. (2 Pheexiroosi 3:10-13 nabbawi; lekkaallo.) Ninkeno qixxaambenna quqquxamme agadhatenni hakkonne barra surrenkenni shiqqi assine heda dandiineemmo. ‘Qullaawa amanyoote haꞌrunsinenna Maganoho galloommore ikkinoommota leellishannore assine’ quqquxamme agadhineemmota leellinsheemmo. Hanni ‘Maganoho galloommore ikkinoommota leellishannore assinanna’ laꞌꞌanno woyte, Yihowa mageeshshi geeshsha hagiidhannoro hedi! Yihowa heeshshokki isira sayisse uyte cuuantanna laꞌꞌanno woyte lowo geeshsha hagiidhanno.

KEESHSHINIKKINNI QAAFO ADHA KAAꞌLITANNO GARA

16. Cuuamate kaaꞌlitanno qaafo adhate maltino yanna hiittenneeti? (2 Qorontoosi 6:1, 2) (Misillano lai.)

¹⁶ Cuuamate kaaꞌlitanno qaafo adhate maltino yanna xaati. (2 Qorontoosi 6:1, 2 nabbawi.) Filiphoosi ledo xaadinohu Itiyophiyunnihu mureessu manchi rahe qaafo adha hasiissannosita huwatino. Isi dancha duduwo rositinna cuuamanno faro afiꞌriti togo yee dihedino: ‘Balaxe dancha duduwo lede rosummoro danchaho. Haꞌnanni marreemmo woyte wolu way heeꞌrasi digattanno.’ Hatteentenni isi Filiphoosi, “Cuuama hoolannoeri nooni?” yee xaꞌmino. (Soq. 8:26, 27, 35-39) Kaajja lawishsha ikkinonke! Itiyophiyunnihu mureessu manchi cuuamihu gedensaanni “lowo geeshsha hagiidhanni doogosi haꞌri.”

17. Maa addaxxa dandiineemmo?

¹⁷ Cuuamate hobbi ruxxi yitanni noottoha ikkiro, Yihowa isi ledo dancha jaalooma kalaqiꞌratto gede kaaꞌlahera qixxaawe noota addaxxa dandaatto. (Rom. 2:4) Isi cuuamattokki gede ataawe ikkitinohe waajja, huluullo woy mannu guficho ikkannoheta qeelte saꞌꞌatto gede kaaꞌlannohe. Cuuante Maganu albaanni dancha tiia afiꞌrittoro, ‘badhekkiinni noori’ xaate guficho ikkannohekkita huwatatto. (Fil. 3:8, 13) Hakkiinni ‘albakkiinni noo coye’ yaano Yihowa heeshshonsa isira sayisse uyte cuuantinorira eino qaale wonshanno yanna quqquxante agadha dandaatto.—Soq. 3:19.