Cuuama Afidhino Tiro Huwata

1. Cuuama xinta ikkinohu Qullaawu Maxaafi rosi wido ikkitinota leellishannori maati?

HAARUUDDU cuuantanno woyte lowo geeshsha hagiidhineemmo! Umi xibbi diro heeꞌrino Kiristaanino 33 M.D. Phenxeqosxete ayyaanira gamba yiino manni cuuamanna laiti lowo geeshsha hagiidhino. Hakko gambooshshiwa manna cuuꞌnoonni; hattono cuuama xinta ikkinohu Qullaawu Maxaafi rosi wido ikkitinota xawinse kulloonni. (Soq. 2:38, 40, 41) Soqqamaasinchu Phaawuloosi “Kiristoosi daafira ronsoommohu umi rosi” giddo mittu “addi addi cuuama” ikkitinota borreessino. (Ibi. 6:1, 2) Cuuamate daafira kulanno rosi xinta ikkinohu Qullaawu Maxaafi rosi wido ikkirono seekkine huwata hasiissannonke. Mayra?

2. Cuuamate daafira kulanno roso seekkine huwata hasiissannonkehu mayraati?

² Mittu mini kaajje uurrannohu xintu seyrooti; hatteente gede cuuamate daafira kulanno roso seekkine huwatanke ammananke kaajjishshanno. Cuuamate qixxaambanni heeꞌnoommorino ikko cuuammummonkunni lowo diro ikkinonkeri konne roso seekkine huwata hasiissannonke. Hakko daafira konni birxichira aante noo xaꞌmuwara dawaro qollanni: Cuuama afidhino tiro maati? Kiristaanu cuuamannohu ma garinniiti? Annu, Beettunna qullaawu ayyaani suꞌminni cuuammeemmohu mayraati?

CUUAMA AFIDHINO TIRO

3. Cuuamakki maa leellishshanno?

³ Mannu albaanni cuuamakki, Maganu Yihowanna Kiristoosi Yesuusi daafira kulanno halaale ammanoottota, cubbikkira maaro eoottota, Yihowara soqqamate heeshshokki biddi assiꞌroottota, Maganu manna gatisannohu Yesuusi widoonni ikkinota huwatoottotanna dirijjitesi ledo halante Maganu fajjo assa lowo geeshsha hasiꞌrattota isira huuccattotenni kuloottota leellishshanno. Konne qaale eittohu woy heeshshokki Yihowara sayisse uyte cuuamittohu gedensaanni, hegere heeshshowa massitanno doogora haꞌra hanafatto.

4. Way giddo woꞌmunni woꞌma linxe fula maa leellishshanno? (Misileno lai.)

⁴ Cuuamatto woyte way giddo woꞌmunni woꞌma lixxe fulatto;a tini waamante kaꞌꞌate gedeeti. (Qolaasiyaasi 2:12 ledo heewisiisi.) Cuuamakki heeshshokki maalale ikkanno garinni biddi assiꞌroottota leellishshanno. Hiittoonni? Way giddo lixakki alba heeꞌratto heeshsho aguroottota leellishshanno. Way giddonni fulakki kayinni Maganu fajjo assate haaro heeshsho heeꞌra hanafoottota leellishshanno.

5. Cuuamate qixxaawate assattore Nohi markaawe seekkate assinori ledo heewisiisa dandiinannihu hiittoonniiti? (1 Pheexiroosi 3:18-21)

⁵ Umi Pheexiroosi 3:18-21 nabbawi. Cuuamate qixxaawate assattore Nohi markaawe seekkate assinori ledo heewisiisa dandiineemmo. Yihowa daafira rosa hanafoottoha ikkiro cuuamate ikkado ikkate assattori wolqakkira aleenni ikkinoha lawahera dandaanno; isinni Nohira markaawe seekka ayirritusihu gede lowo geeshsha ayirrahera dandaanno. Isi addinta kageeshshi geeshsha sharrama hasiissannohe? Ee. Hatto yineemmohu mayraati? Hanni Nohi lawishsha laꞌno. Markaawete akeeka fushshinohu Maganoho; Baote Wayinni gatate qole Nohi Maganu uyno biddissa seekke haꞌrunsa hasiissannosi. Nohi Ammana noosihuranna Maganu kaaꞌlinosi daafira hajajamino hattono markaawe seekkino. Nohi gede atino “Maganu hajajinore baala” assa dandaatto—Kal. 6:22.

6. Cuuama gatissannonkehu ma garinniiti?

⁶ Soqqamaasinchu Pheexiroosi kiiro 21 cuuama “gatissanni nooꞌne” yiino. Hige way giddo linxe cuuama calla digatissanno hattono cubbonke dihayishshitanno. Cubbinkenni keereensitannonketi Yesuusi mundee callate. (1 Yo. 1:7) Ikkirono Maganu hajajo baala wonshatenna ‘danchu tiiꞌꞌi heeꞌrannonke’ gede iso huucciꞌrate cuuamano lowo geeshsha hasiissannote. Yihowa huucciꞌnoommore hagiirrunni aannonke. Hakko daafira cuuama ‘gatissanni noonke’ woy hegere heeshshowa massitanni noonke yaa dandiinanni.

KIRISTAANU CUUAMANNOHU MA GARINNIITI?

7. Manna cuuꞌnanni woyte maa maa assa hasiissanno?

⁷ Qullaawu Maxaafi way giddo linxe cuuama hasiissannota kulannota agurranna cuuamate daafira mitto mittonkare tittire dikulanno. Ikkirono maa maa assa hasiissannonkero anfeemmo gede kaaꞌlannonke. Lawishshaho Qullaawu Maxaafihu xintu seeri cuuantannori hiittoo uddano uddiꞌra hasiissannonsaronna gamba yiino manni hiittoo amanyoote leellisha hasiissannonsaro afate kaaꞌlannonke. (1 Qo. 14:40; 1 Xi. 2:9) Xaa yannara duucha woyte cuuꞌannori songote cimeeyyeeti; togoo qoosso noonsare jaja qoropha hasiissannonke. (1 Qo. 1:14, 15) Mittu manchi lowo manni woy shiimu manni noowano ikkiro cuuama dandaanno.—Soq. 8:36.

8. Cuuamate qixxaabbinore xaꞌminanni xaꞌmuwa hiikkuriiti? Mayra? (Soqqamaasinete Looso 2:38-42) (Misileno lai.)

⁸ Qullaawu Maxaafi ‘gatate ammananke faajjete farciꞌra’ hasiissannonketa kulanno. (Rom. 10:9, 10) Cuuammeemmo woyte gatate lowo geeshsha hasiissanno qaafo adhinanni heeꞌnoommo daafira tenne assanke maltinote! Konnira cuuamate qixxaabbinore lame xaꞌmo xaꞌminanni. Umiti togo yitannote: “Cubbi​ꞌnera maaro eꞌinenna ki​ꞌneneeto Yihowara sayissine uyitine Yihowa Yesuusi Kiristoosi widoonni qixxeessinota gatote qixxaawo maahoyye yitine adhitinoonni?” Tini xaꞌmo cuuantannori tennera qixxaawate adhitino qaafo leellishshannote; hattono Pheexiroosi Phenxeqosxete ayyaanira gamba yiino manna amaalino amaale ledo mittu garite. Layinkiti togo yitannote: “Cuuamaꞌne Yihowa dirijjite giddo noori Yihowa Farciꞌraasine widira kiirantinanni gede assitannoꞌneta huwattinoonni?” Tini xaꞌmo umi xibbi diri Kiristaani gede Yihowa dirijjite uytannonke biddissira hajajamatenna ammanate roduuwinke ledo Maganoho soqqamate eꞌnoommo qaali garinni heeꞌra hasiissannonketa qaagiissitannonke. (Soqqamaasinete Looso 2:38-42 nabbawi.) Kuri xaꞌmuwara dawaro woꞌma giddonni ee yite qoltannori cuuamate ikkadda ikkitanno.

9. Magano hagiirsiisate baalunku maa assa hasiissannonke?

⁹ Halaale rosa hanafattora albaanni nafa danchu amanyooti noohehanna jawa cubbo horo loosse egennoottokkiha ikkara dandaanno. Woy halaalu mine lophoottohanna annikkinna amakki Yihowa baxatto gede kaaꞌlitinoheha ikkara dandaanno. Ikkina Magano hagiirsiisate cubbikkira maaro eꞌe cuuama hasiissannohe? Eewana! Lophinoommo gari ikkihano ikkiro baalunku Maganuwiinni xeertisannonke cubbo ragiꞌnoommota huwata hasiissannonke. (Fa. 51:5) Yihowa daafira ronsummo kiiro kayinni uminke hasatto ikkikkinni isi fajjo balaxisiinseemmo. Tenne assinummohu gedensaanni alba loonsoommo cubbira maaro eꞌneemmo hattono iimi Annanke hagiirsiissanno heeshsho heeꞌra hananfeemmo. Hakkiinni cuuama dandiineemmo.—Soq. 3:19.

10. Bashsho wole ammaꞌno giddo cuuamoottoha ikkiro maa assa hasiissannohe?

¹⁰ Bashsho wole ammaꞌno giddo cuuamoottoha ikkiro nafa, Yihowa Farciꞌraasincho ikkate xaano cuuama hasiissannohe. Mayra? Korkaatuno hakka woyte cuuamoottohu Maganu Yihowanna Yesuusi daafira kulanno halaale gari geeshsha huwatittokkiinniiti. Qoleno huuccattotenni heeshshokki Maganoho sayisse oottoha ikkiro nafa konne qaale eoottohu Maganu fajjo seekkite huwatte diꞌꞌikkino. Soqqamaasinchu Phaawuloosi Efessooni alba Yesuusi daafira kulanno halaale huwatikkinni cuuamino manninni xaadi woyte, kuni manni wirro cuuamanno gede assino.b (Soq. 19:1-5) Xaa yannarano Yihowa mittu manchi fajjosi seekke huwate cuuamara hasiꞌranno.

“ANNU, BEETTUNNA QULLAAWU AYYAANI SUꞌMINNI”

11. “Annu, Beettunna qullaawu ayyaani suꞌminni” cuuamate yaa mayyaate? (Maatewoosi 28:18-20)

¹¹ Yesuusi rosaanosi ikkitannori “Annu, Beettunna qullaawu ayyaani suꞌminni” cuuantanno gede hajajino. (Maatewoosi 28:18-20 nabbawi.) Isi hatto yiinohu mayyaateeti? Qullaawu Maxaafi giddo “suꞌma” yaanno qaali mito woyte mittu manchira noosi baycho woy biilloonye leellishara dandaanno. Hakko daafira mittu manchi woy mittu coy suꞌminni mittore assineemmo woyte, hakko suꞌma afiꞌrino manchira noosi biilloonye huwantoommo yaate. (Maatewoosi 10:41 ledo heewisiisi.) Hanni Annahonna Beettoho noonsa wolqanna biilloonye hattono Maganunnihu qullaawu ayyaani assannore laꞌno.

12. Annu suꞌminni cuuama dandiineemmohu hiittoonniiti? (Ajuuja 4:11) (Misileno lai.)

¹² Annu suꞌminni. Yihowa heeshsho uynonkeha iimi Annanke ikkinota ammanneemmo. Isi baalanka coye kalaqinoho woꞌmanka dandaanno Maganooti. (Ajuuja 4:11 nabbawi.) Isi huuccatto macciishshannoha ikkinota anfoommo hattono huuccatto assiꞌneemmo woyte woy isi daafira wolootaho kulleemmo woyte, suꞌmasi ayirrinyunninna huxuxxi yinummokkinni woshshineemmo. (Fa. 65:2) Ikkirono Annu suꞌminni cuuamate wolereno afa hasiissanno. Phenxeqosxete barra Pheexiroosi yaannore macciishshanni noo manni wonanni Yihowa daafira afinoho; ikkirono insa Yihowa baxillunni kae Yesuusi Kiristoosi widoonni hegere heeshsho aannoha ikkinotano afa hasiissannonsa.—Rom. 5:8.

13. Beettu suꞌminni cuuama dandiineemmohu hiittoonniiti? (Misileno lai.)

¹³ Beettu suꞌminni. Yesuusi Maganunniha mitto Beetto ikkinota ammanneemmo. Yesuusi “doogote”; Yihowa ledo dancha jaalooma kalaqiꞌra dandiineemmohu isi widoonni callaati. (Yoh. 14:6) Qoleno Yesuusi ninke heeshsho afiꞌneemmo gede reye woxxinonkeho. Tenne afanke cuuammeemmo woyte calla ikkikkinni barru baala lawishshasi haꞌrunsineemmo gede kakkayissannonke. (1 Yo. 2:6) Hakko daafira isi gede diinaggaambe sabbankeemmo; aye coyno sabbankeemmota hoolankera diwodhineemmo. (Luq. 4:43) Maganoho ammanamme soqqammeemmo daafira dartu iillinkero nafa dandiine saꞌneemmo. (2 Xi. 3:12) “Songote umo” ikkinoha Yesuusa ayirrinseemmo; hakko daafira haꞌrunsaanosi massaggannonna towaattanno gede shoominorira maahoyye yine galleemmo.—Efe. 4:8, 11, 12; 5:23.

14. (a) Qullaawu ayyaani suꞌminni cuuama dandiineemmohu hiittoonniiti? (Misileno lai.) (b) Buurantinori cuuantannoti wole addi addi cuuama hiittenneeti? (“Buurantinori Cuuantannota Addi Addi Cuuama” yitanno saaxineno lai.)

¹⁴ Qullaawu ayyaani suꞌminni. Qullaawu Maxaafi qullaawu ayyaani daafira kulanno halaale ammanneemmo. Qullaawu ayyaani biso afiꞌrinoha woy Sillaase wido ikkikkinni Maganu wolqaati. Qullaawu ayyaani, masaalaanonna Qullaawa Maxaafa borreessitinore massaginota anfoommo; konnira Qullaawa Maxaafa ganyine nabbambeemmo hattono rosiisannore loosu aana hosiinseemmo. (2 Ph. 1:20, 21) Qoleno jawa cubbo loosa qorophineemmo; korkaatuno togoo assooti ninke calla ikkikkinni songo nafa Maganu ayyaana hoogganno gede assara dandaanno.—Efe. 4:30.

15. Maa assate murciꞌra hasiissannonke?

¹⁵ Ati cuuamootto Kiristaanchootiro, “addi addi cuuama”c daafira kulanno roso huwatatenna heeshshokki Yihowara sayisse uyte cuuamitto woyte eootto qaali garinni heeꞌrate murciꞌri. Kayinni xaa geeshsha cuuamoottokkihalla ikki? Cuuamattokki gede guficho ikkinoheri no? Aananno birxichira cuuamate ikkado ikkate maa assa dandaattoro ronseemmo.