Cuuamittohu Gedensaanni Iillahera Dandaanno Fonqolira Qixxaawootto?

1-2. Halaalu mine iillankera dandaanno fonqolira qixxaawate maa maa assa dandiineemmo? Lawishsha kuli.

TENNE Sheexaanu gashshe noo alamera qarru iillannonketa anfoommo. Yesuusi haꞌrunsaanosi, “Guficho ikkannori daasi digattannote” yee qorophisiisino. (Mat. 18:7) Konne qorophishsha wodanaho wodhine, iillannonke fonqolira qixxaawa hasiissannonke; konni fonqoli giddo mitu halaalu mine iillannonkeha ikkara dandaanno.

² Hanni mitto lawishsha laꞌno. Yihowa manni kalaqamu dano kalaqantanno woytira qixxaawanno gede woꞌmanka woyte kullanninsa. Togoo woytira qixxaawa dandiineemmohu hiittoonniiti? Balanxe, qooxeessinkera hiittoo dano kalaqantara dandiitannoro bande afa hasiissannonke. Heeꞌnoommo qooxeessi ninkera haaro ikkiro, tenne assa roorenkanni hasiissannote. Kalaqantara dandiitanno dano bande anfummohu gedensaanni, dano kalaqantanno woytira qixxaawate maa assa dandiineemmoro balanxe heda hasiissannonke. (Law. 21:5) Hatteente gede, cuuammummohu gedensaanni halaalu mine iillankera dandaanno fonqolo bande afanke, togoo fonqoli iillannonke woytira qixxaambeemmo gede kaaꞌlitannonke. Konni garinni balanxe qixxaambummoro, iillannonke fonqolo dandiine saꞌꞌanna Yihowawa gamba yine heeꞌra dandiineemmo. (Fa. 17:5) Hakko daafira hanni iillankera dandaannoha sase fonqolonna mittu mittunku fonqolira qixxaawa dandiineemmohu hiittoonniitiro laꞌno.a

AMMANATE RODIIKKI KOFFI ASSANNOHE WOYTE

3. Songote giddo hiittoo fonqoli tuncu yaankera dandaanno?

³ Mite yite gambooshshe hadhe Yihowa manni mereero noo baxille laitto woyte hiitto ikkoottoro qaagatto? Hatte yannara halaale afiꞌroommo yite hedootto? (Yoh. 13:35; Qol. 3:12) Bilaankab yinanni rodoo hatto yite heddino. Ikkirono cuuantuhu gedensaanni heddinokkiri tuncu yiinose. Ise togo yitino: “Mitte rodoo ayirrinye xeinore assitinoe. Qoleno ise wolootu daafira gara ikkinokkire coydhannota wodanchoomma. Yihowa Farciꞌraasine keere kalaqatenna baxille leellishate sharrantannota rosoomma daafira, togoori ikkanno yee horo dihedoomma.” Hige ammanate roduuwinke dancha akatta lossiꞌrate sharrantanno; ikkirono insa guuntete xeꞌne noonsareeti. (Efe. 4:23, 24; 1 Yo. 1:8) Hakko daafira mittu rodii xissiisannonkere coyiꞌrara woy assara dandaanno. (Yaq. 3:8) Hige ma assinanni, togoo coy mitootu Yihowara soqqama agurtanno gede assinonsa.

4. Mittu ammanate rodiikki koffi assannohe woytira qixxaawate may kaaꞌlahera dandaanno? (Efessooni 4:32)

⁴ Mittu ammanate rodiikki xissiisannohe woy koffi assannohe woytira qixxaawate xaanni ma assa dandaatto? Efessooni 4:32 noo amaale woꞌmanka woyte loosu aana hosiisi. (Qummeeshsha nabbawi.) Shaqqille leellishatenna woloota mararate dandiittore baala assattoha ikkiro, wolootu ledo kanca diyaatto. Wolootu soꞌro loossuro insa mulla gatona yaate qixxaawi. Tennera kaaꞌlannoheri maati? Yihowa gatona yaannohe gede meꞌꞌe higge huucciꞌroottoronna isino mulla meꞌꞌe hige gatona yiinohero hedi. (Mat. 6:12) Yihowa meꞌꞌe hige gatona yiinohero hiincakki, woloota gatona yaa qarra ikkitannohekki gede kaaꞌlitannohe.

5. Mittu manchi koffi assannonke woyte kaaꞌlannonkehu Qullaawu Maxaafihu xintu seeri hiikkonneeti? (Lawishsha 19:11) (Misillano lai.)

⁵ Lawishsha 19:11 nabbawi. Qullaawu Maxaafi hayyoota ikkinummoronna woloota seekkine egenninummoro insa koffi assitannonke woyte cinca dandiineemmota kulanno. Kuni xintu seeri boodu diri albaanni cuuantinota Rima yinanni rodoo kaaꞌlinose. Ise togo yitino: “Roduuwu koffi assannore woy xissiisannore assitanna laeemma woyte umo Lawishsha 19:11 qaageemma. Insa alba heedhino heeshshonna togoore assitannohu mayraatiro hedate woꞌnaaleemma. Qoleno insa ledo soqqansho fulate woꞌnaaleemma. Togo assaꞌya insa albinni roore egenneemma gede kaaꞌlitannoe.” Tini kaajja hedooti. Ammanate roduuwakki xaanni seekkite egenna dandaatto. Insa albinni roore seekkite egennakki xissiisannohere assitanno woyte gatona yaa shota ikkitannohe gede assitanno.

6. Songote giddo noo roduuwi ledo dancha aante heedhannonke gede kaaꞌlannonkeri maati?

⁶ Songote giddo noo roduuwi ledo dancha aante heedhannohe gede maa assa dandaatto? Ammanate roduuwakki seekkite egennittoro dancha akattansa illachishatto. (Lawishsha 10:12 ledo heewisiisi; Rom. 12:10; Fil. 2:2, 3) Hanni tenne assasi haarote cuuaminoha Maarki yinanni rodoo kaaꞌlitinosi gara laꞌno. Isi songosira noo roduuwi ledo albinni roore yanna saysa hanafiti laanfensa wodanchino. Maarki insa soꞌronni gufiꞌrannokki gede kaaꞌlinosiri maati? Isi togo yiino: “Shiimmaadda soꞌro illachishanni noommota wodanchoommo; insa loossanno soꞌro alamete noohu batinyu manni loosanno soꞌro hendiro shiimate. Ammanate roduuwiꞌyata laanfensa calla illachisha hasiissannoekkita huwatoommo. Hakko daafira dancha akattansa illachisha hanafoommo.” Atino hatto assittoro ammanate roduuwikki ledo dancha aante heedhannohe.

ALBA AGUROOTTORE HALCHA HANAFATTO WOYTE

7. Alba agurroommore halchineemmo gede assankera dandaannori maati?

⁷ Umo halaale rositto woyte Sheexaanunnita busha alame facci assite agurootto daafira fooliishsho afiꞌroottoti dihuluullissannote. ‘Aye manchino galagale hakkira higa dihasiꞌranno’ yite hedoottoha ikkara dandaanno. Ikkirono buutote qarri iillannohe woyte, Yihowara soqqama hanafitto yannara aguroottoha mito coye qaagattoha wole agurina halcha hanafattoha ikkara dandaanno. (Kiiro 11:4-6 ledo heewisiisi.) Lawishshaho, mitu roduuwi yannansa gudannoha kayinni mannu lowo geeshsha ayirrisannonsa gede assanno looso agurtinoha ikkara dandaanno. Woloota kayinni Qullaawa Maxaafa xiinxalla hanaffuta muli jaallansa agurtinonsaha ikkara dandaanno. Mitootu qolte mito geeshsha hagiirsiissannonsata ikkiturono batteessitannota mite araado agurtinoha ikkara dandaanno. Mittu Kiristaanchi alba agurino coy Yihowawiinni xeertisasira wodhiro, tini lowo geeshsha dadillissannote! Dayrino dayro alba agurootto coywa higattokki gede xa maa assa dandaatto?

8. Abirihaaminna Saara lawishshinni maa ronseemmo?

⁸ Qullaawu Maxaafi giddo, hasiꞌroommero agurino coye halchara dandaannohu Yihowara ammaname soqqaminohu lowo manni lawishshi no. Lawishshaho Abirihaaminna Saara Yihowara hajajame kaajjado huxxa afiꞌrinohu Uuri quchuminni fule dunkaanaho heeꞌrino. (Ibi. 11:8, 9) Insa Uuri qawaaxxidhe heedhino heeshsho saꞌe saꞌe qaagginoha ikkara dandaanno. Ikkollana “agurte daggino base xaa xaa heddannoha ikkoommero” woy bashsho heedhino heeshsho halchitoommero galagalte higate fonqolantara dandiitanno. Kayinni insa albillitte afidhanno atoote illachishshino.—Ibi. 11:15, 16.

9. Soqqamaasinchu Phaawuloosi agurino coye ma garinni laꞌꞌanno? (Filiphisiyusi 3:7, 8, 13)

⁹ Soqqamaasinchu Phaawuloosi Yihowara soqqamate yee heeshshosi biddi assiꞌrino. Isi Kiristaancho ikkara albaanni lowo geeshsha egennaminohu Seeru rosiisaanchi Gamaaliyaali lekka mule ofolle rosino. (Soq. 22:3) Hakko daafira Phaawuloosi egennaminoha Ayhudete ammaꞌno massagaancho ikka dandaanno. (Gal. 1:13, 14) Ikkirono isi dancha duduwo macciishshiti konne baalanka coye facci asse agurino. Isi Kiristaancho ikkihu gedensaanni baalunku coy shota diꞌꞌikkinosi. Iso gannoonnisi, usurroonnisi hattono Ayhudete manni giwinosi. (2 Qo. 11:23-26) Isi iillinosi qarra calla illachishoommeronna xaa heeshshosi albite ledo heewisiisoommero albi heeshsho woyyitannosihu gede asse hedara dandaanno. Kayinni Phaawuloosi, Kiristoosi Yesuusira soqqamate afiꞌrinota kaajja qoossonna albillitte afiꞌrannoha dhagge ikkanno atoote illachishino. Phaawuloosi, afiꞌrino atooti agurinoha aye coyeno koꞌo hune roorannota ammanino!—Filiphisiyusi 3:7, 8, 13 nabbawi.

10. Woꞌmanka woyte maa hiinca hasiissannonke? (Maarqoosi 10:29, 30) (Misillano lai.)

¹⁰ Maa ronseemmo? Kiristaancho ikkate yite agurootto coye heda hanafittoro hakko coye aguroottohu mayraatirono qaagi. (Ros. 7:10) Agurootto coye halaalu mine afiꞌrootto atooti ledo heewisiisi. Kalqete alamehu Aliidi Mootichi ledo muli jaalooma kalaqiꞌrootto. (Law. 3:32) Baxxannoheri batinyu ayyaanaamittete roduuwi noohe. (Maarqoosi 10:29, 30 nabbawi.) Qoleno albillitte dhagge ikkanno atoote afiꞌratto! (Isa. 65:21-23) Yihowara soqqante afiꞌratto atoote woꞌmanka woyte hiincattoha ikkiro, agurte dayotto coye dihalchatto.

11. Roozimeri woꞌnaalshinni maa rosootto?

¹¹ Roozimeri yinanni rodoo cuuantu woyte 50 diri balla ikkannose. Hanni ise agurtino coye halchitannokki gede kaaꞌlinoseri maatiro laꞌno. Ise togo yitino: “Maateꞌya ledo mitteenni hagiidheemma yanna ikkitino daafira, umi qara Ganna ayirrinsanni yanna halchoomma. Tenne yannara baxeemma mannira mitore aa hagiirsiissannoe. Qaaqquullu Gannu haqqicho mule ofolte oommansare hagiidhite fantanna laeemma woyte lowo geeshsha hagiidheemma.” Ise kaaꞌlinoseri maati? Roozimeri togo yitino: “Gannu yannara asseemma coye wole yannara assa rosoomma. Diru kiiro wole yannara maateꞌya gamba asse mitore eemmansa hattono baxeemmansahu mayraatiro kuleemmansa.” Roozimerira fonqolo ikkannohu wolu coyno iillinose. Ise togo yitino: “Halaale rosummata albi jaallaꞌya gambo gibbinoe. Mito woyte insa qalli assitannoe hattono callatoomma.”c Ise kaaꞌlinoseri maatiyya? Ise addi addi roduuwi ledo soqqamate pirogiraame fushshidhino. Togo yitino: “Tenne assaꞌya baxeemmarenna ayirriseemmare haaro jaalla kalaqiꞌreemma gede kaaꞌlitinoe.” Ise lawishshinni maa rosa dandaatto? Halaale rosattora albaanni assattoha hagiirsiisannoheha mito coye halchattoha ikkara dandaanno; kayinni hakko coy baycho hagiirsiisannoheha wole coye assa dandaatto. (Fil. 4:8, 9) Qoleno Yihowa woꞌmanka woyte isira yite agurootto coye roorinore aannoheta qaagi.

WOLOOTU YIHOWARA SOQQAMA AGURTANNO WOYTE

12. Songote giddo roorenkanni fonqolo ikkannoheri may kalaqamara dandaanno?

¹² Yihowa Farciꞌraasincho ikkitto woyte, tenne busha alame wido ikka agurte ayyaanaamittensanna amanyootensa agadhate sharramanno manniwa daakkinni baasa hagiidhoottoha ikkara dandaanno. (Isa. 65:14) Ikkirono mito woyte songote giddo noohu mittu manchi jawa cubbo loosinota macciishshattora dandaatto. Cubbo loosino manchi maaro ea hoogiro songotenni fushshinara nafa dandiinanni. (1 Qo. 5:13) Hanni togoo coy Samaari yinanni rodoo xissiisinose gara laꞌno. Ise togo yitino: “Cuuamummahunni shiima yanna gedensaanni mittu cimeessi jawa cubbo looseenna songotenni fushshinoonni. Songote cimeessi Yihowanna songo dadillisannore assanno yee hedoommakki daafira, lowo geeshsha masoomma.” Hige ammanate roduuwinke Yihowa baxxannotanna isi ledo quraanyante heeꞌra hasidhannota dihuluullammeemmo. (1 Qo. 13:4, 7) Ikkirono diru kiiro, cubbo loosse maaro eꞌannokkire songotenni fushshinannita qaaga hasiissannonke. Roorenkanni muli jaalikki woy lowo geeshsha ayirrisatto manchi jawa cubbo looseenna songotenni fushshiniro, tenne ammane adha qarra ikkitahera dandiitanno.

13. Muli jaalinke Yihowara soqqama aguriro gufiꞌneemmokki gede xaanni ma assa dandiineemmo?

¹³ Muli jaalikki Yihowara soqqama agureenna gufiꞌrattokki gede xaanni qixxaawa dandaattohu hiittoonniiti? Woꞌmanka woyte Yihowa ledo noohe jaalooma kaajjishiꞌri. (Yaq. 4:8) Yihowa ledo jaalooma kalaqiꞌra hasiissannosihu mitto mittonka mancho ikkinota qaagi. Lawishshaho maatetenna songote deerrinni Yihowa mitteenni magansiꞌneemmoha ikkirono, annu annu deerrinni ganyine huuccatto assiꞌranna Qullaawa Maxaafa xiinxallano hasiissannonke.—Fa. 1:2; 62:8.

14. Soqqamaasinchu Pheexiroosi lawishshinni maa ronseemmo? (Yohaannisi 6:66-68)

¹⁴ Batinye Yesuusi haꞌrunsaano iso haꞌrunsa agurtu woyte soqqamaasinchu Pheexiroosi assinorinnino ronseemmori no. Hatte yannara Pheexiroosi umisi mito geeshsha gurchaawinoha ikkara dandaanno. Kayinni isi Yohaannisi 6:66-68 maynoro wodanchi. (Qummeeshsha nabbawi.) Pheexiroosi wolootu assitinore illachishantenni Yesuusi rosiisino halaale illachishino. Hakko daafira isi digufiꞌrino. Hatteente gede xaa yannara wolootu assooti Yihowa dirijjite rosiissinonke halaali afiꞌrino waaga disoorranno. Konne halaale seekkite cuꞌmiꞌri! Aleenni qummi assiniti Samaari togo yitino: “Mittu manchi soꞌro loosino yaa songote giddo noori baalu soꞌro loossino yaa woy Yihowa dirijjite rosiissannori soꞌrote yaa ikkinokkita woꞌmanka woyte qaageemma. Qoleno mannunnihu bushu assooti Yihowa hagiirsiisannokkita qaageemma.”

15. Emili woꞌnaalshinni maa rosootto?

¹⁵ Hanni Emili yinanni rodoo woꞌnaalsha laꞌno. Ise cuuantuhunni mitte lamala gedensaanni amase songotenni fushshinoonni hattono insa agurte hadhino. Emili togo yitino: “Togoori ikkanno yee horo hede diegennoomma. Horo togoo fonqoli iille diegenninoe; amaꞌyano lowo geeshsha qalli assitinoe.” Emili kaaꞌlinoseri maati? Ise togo yitino: “Anniꞌyanna songote giddo noo roduuwi kaaꞌlitinoe daafira dicallatoomma; insa anera maateꞌya gede ikkitinoe. Baalunkura qarru iillanno. Mimmitunniwa gamba yine heeꞌranna mimmito jawaachisha hasiissannonkehu iseraati.” (1 Ph. 5:9) Ammanate roduuwikki ledo noohe jaalooma kaajjishiꞌrate qarru iillahe geeshsha agara dihasiissannohe. Xaanni tenne assate woꞌnaali. Hatto assattoha ikkiro, qarru amadannohe woyte ammanate roduuwikki kaaꞌlitannohe hattono sheshifachishshannohe.

16. Maa qaaga hasiissannonke? (Misileno lai.)

¹⁶ Yihowa baxannore seejjannotano qaango. (Ibi. 12:6) Isi songotenni fushshinoonniri baalu higgara hasiꞌranno. (2 Ph. 3:9) Hakko daafira muli jaalakki songotenni fushshinoonniha ikkiro, cimeeyye isi Yihowawa higanno gede kaaꞌlate dandiiture baala assitannota addaxxa dandaatto.—2 Xi. 2:24, 25.

17. Huluullammeemmokki coy maati?

¹⁷ Konni birxichira cuuamittohu gedensaanni iillahera dandaanno fonqoli giddo gamalla laꞌnoommo. Hige mitu qarri dadillatto gede assahera dandaanno; kayinni waajjishannoheri dino. Fonqolu iillannohe woytira qixxaawate lowore assa dandaatto. Qoleno taalle nookki Magani Yihowa kaaꞌlannoheta habbooti. Isi kageeshsha kaaꞌlinohe qoleno hegereha kaaꞌlahera hasiꞌranno! (1 Ph. 5:10) Isi woꞌmanka woyte iillannohe fonqolo baala dandiite saꞌꞌate hasiissanno jawaante aannohe. Woꞌmanka woyte Yihowa kaaꞌlo maahoyye yite adhittoro, aye fonqolino isiwiinni dixeertisannohe!—Fa. 119:165; Rom. 8:38, 39.