Miincoonni Meento Kaaꞌlanno Birxicho
“ALAME woꞌmate, lowo miliyoone ikkanno meentonna seenne seyantanninsa woy beebba assiꞌnanninsa. Aterano togoori iillinohe? Hanni Maganu keere heeꞌrattara hasiꞌrannohu mayiraatironna meento miincannita hoolate maa assara hedinoro laꞌno.”
JW.ORG aana fulinohu “Meentu Keere—Qullaawu Maxaafi Yaannore” yaanno birxichi hanafannohu tenne hedo kuleeti. Konni birxichi hunda noo linke kisittaro attammanni PDF dirrisiꞌra dandaatta; konne birxicho attammihu gedensaanni shoole qoola afidhino tiraakte gede assine era dandiinanni. Yunayitidi Isteetisete heedhannoti Isteesi yinanni rodoo togo yitino: “Konne birxicho attamummahu gedensaanni mitte rodoo ledo songonke qoqqowira noohu miincoonni meento towaantanniwa haaꞌne haꞌnoommo.”
Hakko loossannoti mitte mancho hakko noo meentira uyitannota wole tiraakte ledde afiꞌra dandiitannoronna teꞌee xaꞌmitino. Hakko daafira roduuwu konni birxichi daafira kultannota 40 tiraaktenna 30 jw.org egensiissanno kaarde massitino. Roduuwu wole barra galagale xaꞌmate marita miincoonni meento towaantanniwa loosiissanno murritte hakko heeꞌranno meentira Qullaawa Maxaafa xiinxallinsanni gara leellinshansara hasidhannota kultu.
Isteesinna wole lame roduuwi miincoonni meento towaantannite wole baserano dancha guma afiꞌrino; insa onte tiraakte massino hattono hakko heeꞌranno meenti wole tiraakte lende massinanninsa gede xaꞌmiꞌrino. Hakko loossannoti mitte mancho “Tini borro kowiicho heeꞌranno meento kaaꞌlitanno” yitino. Ise ledde “Tini borro hasiissannonke” yitino. Gedensoonni roduuwu mare Qullaawa Maxaafa xiinxallinsanni gara leellishanna lowo meenti gamba yee laino; hattono insa giddonni lame mancho gambooshshe haꞌra hasiꞌrannota kulino.
Isteesi togo yitino: “Meentu konne baxisanno birxicho nabbawa hasiꞌrino gari dhagge ikkinonke. Tenne borro attamme erre konni baxxino meentira Maganu Gashshooti sokka konni garinni kula hagiirsiissannote. Kuni meenti sokkanke macciishshino gari lowo geeshsha hagiirsiisinonke; konni meentira agurrummokkinni dancha duduwo kulate sharrammeemmo woyite Yihowa maassiꞌrannonke gara laꞌꞌate quqquxammoommo.”