Mannu Manna Mulla Kae Giwannokki Yanna Daggakka?—Qullaawu Maxaafi Mayyaanno?

Mannu manna mulla kae giwatenni loosanno jaddo halaꞌlitanni daggino. Manna sirchinsanni, ammaꞌnonsanni, gaꞌrensanni, koo-teensanni woy wolu korkaatinni kainohunni beebba assiꞌnanninsa. Togoo assooti mannu masillaawanni heeꞌranno gede assino; konninni kainohunni batinyu mannira surrensano ikko mannimmansa baasa gawajjantino; heeshshonsa hoogino mannino no.

Qullaawu Maxaafi yannankera mannu “kaajjado, danchare baxannokkihanna” “kalaqamu baxilli nookkiha” ikkannota himanino. (2 Ximootewoosi 3:1-5) Ikkina mannu mannaho godowa kaajja aguranno yanna daggakka? Qullaawu Maxaafi mayyaanno?

Jaddo uurritanno gara

Qullaawu Maxaafi Maganu jaddo huna dandaannotanna hatto assannota kulanno.

• “Bunshe assitannori murantanno . . . Shaqqaddu kayinni baatto ragidhanno; atootenna keere afidhe hagiidhitanno.” (Faarso 37:9-11) Maganu finqilu manni woloota gawajjanni heeꞌrara wore dilaꞌꞌanno.

• “Hindiiddo baala illensanni feyanno; konni kaꞌa reyo diheedhanno; dadillu woy raare woy shetto xaate diheedhanno.” (Ajuuja 21:4) Maganu mannu oosora gobbayditano ikko giddiidi madansa hursanno.

• ‘Reytinori kaꞌanno.’ (Looso 24:15) Maganu jaddotenni xoqolantino beebbaataammano ikko wole lowo miliyoone ikkanno manna reyotenni kaysanno.

Gibbonna giwanshotewiinni xooqi

Qullaawu Maxaafi hexxo aannotano agurranna yannankera gibbonna giwansho qeela dandiinanni garano kulanno. Aante noo xaꞌmuwara Qullaawu Maxaafinni dawaro afiꞌrate xiinxallatto gede koyinsoommohe:

• Xaa yannara jaddonniwa massitanno giwansho gargadhate maa assa dandiineemmo? Tenne daafira Maganu Qaali rosiisannore ledde afate, “Manna Giwa Agura Dandiinannihu Hiittoonniiti?” yaanno birxichinni fultinota Agarooshshu Shae metseete nabbawi.

• Maganu qarru batiꞌrara fajjinohu mayraati? Qullaawu Maxaafi tenne xaꞌmora qolanno dawaro afate, “Maganu Qarru Heeꞌrara Fajjinohu Mayiraati?” yitanno viidiyo lai.