Baote Barri Saate Hashshu Taalooti Widira Qolle Shiqqi Assini

Sayinsete egennaammi Arfaasa 27, 2026nni Baote Barri Saatea hashshu taalooti widira qolte shiqqi assitino. Hashshu taalooti mannu ooso alame woꞌmate aana abbitanno baora lawishshaho.

• “Sayinsetenna Gaꞌlabbote Borde techo Baote Barri Saate 85 sokonda hashshu taalooti widira qolte shiqqi assitino; alame baote widira togo shiqqe yite diegentino.”—Buleetini of ze Atomiki Sayintists.

• “Baote Barri Saate kultanni noonkeri goꞌlinore diꞌꞌikkino. Alame albinni roore waajjishshaawa daggino; qarra tirate kaaꞌlame loosano ajjanni daggino; coy horo angay fulay no. Alamete aana soorro hasiissanno; qoleno kuni dandaamannokkire diꞌꞌikkino. Ikkollana alame woꞌmate heeꞌranno dagoomi massagaanonsa rakke qaafo adhitanno gede xixxiiwa hasiissannonsa.”—Aleksaandira Beeli, Pirezidaantichunna Qaru Loosu Haꞌrisaanchi, Buleetini of ze Atomiki Sayintists.

Ikkina manchu sirchinna pilaaneetenke baꞌanno yanna gambissino? Albillitte ikkannore waajja hasiissannonke? Qullaawu Maxaafi tenne daafira mayyaanno?

Albillitte ikkannore

Qullaawu Maxaafi kulanno garinni, “kalqe (baatto) noowa heedhanno”; qoleno mannu ‘ise aana hegerera heeꞌranno.’ (Rosiisaancho 1:4; Faarso 37:29) Konni daafira mannu ooso baatto dihuntanno woy heeshshote kalaqami heeꞌra dandaannokkita diassitanno.

Ikkollana Qullaawu Maxaafi goofimarchu daannota kulanno. Lawishshaho, “Alame . . . saꞌanno” yaanno.—1 Yohaannisi 2:17.

• QullaawuMaxaafi alamete goofimarcho yaannohu maa kulateetiro afate, “Alame Baꞌaraati? Apokaaliypsi Maati?” yaanno birxicho nabbawi.

• Qullaawu Maxaafi alamete goofimarchi daanno yanna daafira mayyaannoro afate, “Alamete Goofimarchi Daannohu Mamooteeti?” yaanno birxicho nabbawi.

Albillittete yanna hexxotenni agadha

Xa alamete aana qarru batiꞌrinoha ikkirono, Qullaawu Maxaafi albillittete yanna hexxotenni agadhineemmo gede kaaꞌlannonke. Hiittoonni?

• Qullaawu Maxaafi heeshshonkera kaaꞌlitanno amaale aannonke. (2 Ximootewoosi 3:16, 17) Lawishshu gedera, Qullaawu Maxaafi qarru heeꞌreennanni dancha danchare hendeemmo gede kaaꞌlannonkehu hiittoonniitiro afate, “Yaaddo Gargadha Dandiinanni Gara” yaanno birxicho nabbawi.

• Qullaawu Maxaafi konni kaꞌira kaajja hexxo aannonke. (Roomu Sokka 15:4) Qullaawu Maxaafi yannankerano ikko albillitte may ikkannoro xawise kulannonke; tini qolte alamete aana baxiri ikkirono wodanaaꞌmineemmo gede assitannonke.

Qullaawu Maxaafi roore kaaꞌlannohe gede, woxe baaxxittokki ninke ledo techonni Qullaawu Maxaafi xiinxallo hanafi.