WEDELLOOTU XAꞌMITANNO XAꞌMO
Jaaliꞌya Hanqisiero Ma Asso?
Afa hasiissannohere
Jaallate mereero qarru kalaqama noontella. Danchu jaalikki wole agurina muli jaalikki nafa guuta ikkinokki daafira, xissiisannohere assara woy coyiꞌrara dandaanno. Atino hige guuta ikkoottoni? Hakko daafira, atino manna koffi assootto woy hanqisootto yanna nooti qulli yitahera dandiitanno.—Yaiqoobi 3:2.
Interneete roore qarru kalaqamanno gede assitara dandiitanno. Lawishshaho, Deevidi yinanni wedellichi togo yiino: “Interneete faꞌnite heedhe jaalikki jilunniwa wolootu ledo kaino foto laꞌꞌatto woyite, ‘Konni jilira ane woshshinoonniekkihu mayiraati?’ yite hedatto. Hakkiinni jaaliꞌya dibaxannoe yite dadillatto.”
Kalaqamino qarra tira dandaatto.
Assa dandaattore
Ateneeto layiꞌri. Qullaawu Maxaafi, “Koma amada gowwimma ikkitino daafira, ati hanqoho muddantooti” yaanno.—Rosiisaancho 7:9.
“Mito woyite, hanqisinohe coyi gariha ikkinokkiti gedensaanni higge leeltannohe.”—Aliisa.
Hanni tenne hedi: Duucha woyite shiimurira koffi yaatto? Wolootu xeꞌne roore cincite saꞌꞌattoha ikkatto gede woyyeessiꞌrattori heeꞌrakka?—Rosiisaancho 7:21, 22.
Gatona yaa kaaꞌlitanno gara hedi. Qullaawu Maxaafi, “Koma amada agura ayirrinyeho” yaanno.—Lawishsha 19:11.
“Coyi addinta koffi assinoheha ikkiro nafa, mulla gatona yaa danchate; hatto yaa qole, jaalikki assino sao wirro kayisa hoogate; qoleno hatti hajo kaꞌu kiiro maarie yaahera agadha hoogate. Mitte higge gatona yiittoro, hakkoye coye galagalte kayissooti.”—Malerii.
Hanni tenne hedi: Coyi hakkeya lowoha ikkino? Keere kalaqate yite maarte saꞌꞌa dandaattokka?—Qolaasiyaasi 3:13.
Jaallate mereero kalaqamanno qarra marro marro kayisa, xaa xaa waalcho fanne iibbino minira qiidu eanno gede assate gedeeti
Jaalikkire hedi. Qullaawu Maxaafi, “Mittu mittunku woleho woyyannore hedo ikkinnina, umisira woyyannore calla laoonke” yaanno.—Filiphisiyusi 2:4.
“Atenna jaalikki mereero baxillunna ayirrisama nooha ikkiro, kalaqamino qarra rakke tiratto gede kakkayisannohehu gari korkaati noohe; korkaatuno jaaloomiꞌne kaajjanno gede atino lowore assootto. Jaaloomiꞌne kaajjara assoottori mullawa gatara hasiꞌrattokkiti egennantinote.”—Nikooli.
Hanni tenne hedi: Jaalikki tenne assinohu korkaatu heeꞌreennasiitikka?—Filiphisiyusi 2:3.
Qara hedo: Mannu koffi assannonke woyite coye amandanni gara afa, albillitteno jawa ikkittohu gedensaannino kaaꞌlitannohe dandooti. Tenne dandoo mayira xaanni dilossiꞌratto?