4 GATONA YAA

HATTO YAA MAYYAATE?

Gatona yaa mannu koffi assannonke woyite, coye godowaho wodha agurre maare saꞌꞌate. Gatona yineemmo yaa miincanninke woyite lashshi assine saꞌneemmo woy horo miincoonninkekkihu gede ikkineemmo yaa diꞌꞌikkino.

QULLAAWU MAXAAFI BIDDISHSHA: “Kiꞌne kiꞌneneewa koffi yitinoonni coye baala cincatenni agurre.”—Qolasiyaasi Sokka 3:13.

“Mitto mancho baxattoha ikkiro, guuntete xeꞌnesi illachisha agurte hiittoo mancho ikkate sharramanni nooro hedatto.”—Aarooni.

HASIISSANNOHU MAYIRAATI?

Koma amaxxa adhamaꞌne gawajjitannotano agurranna manninateꞌnenna hedoꞌneno gawajjitara dandiitanno.

“Mitte hige minaanniꞌya lowo geeshsha koffi assinoe daafira maaro xaꞌmiꞌrie. Hakkawoyite isira gatona yaa qarra ikkitinoe. Gedensoonni gatona yoommasiha ikkirono, hakkawoyitenni gatona yaa hoogoommatera gaabboomma. Korkaatuno tini mimmitoho albi gede ikkineemmokki gede assitinonke.”—Juuliya.

MAA ASSA DANDAATTO?

ATENEETO LAYIꞌRI

Galteꞌne coyidhinori woy assitinori xissiisiꞌnero kiꞌneneeto togo yitine xaꞌme:

• ‘Shiimare coye batisanni noommo ikka?’

• ‘Koffi yoommo coyi galteꞌya maaro xaꞌmiꞌra hasiissannose geeshsha ikkinohonso, mulla lashshi asse agureemmo gedeereeti?’

AANTE NOO XAꞌMUWA GALTEꞌNE LEDO HASAABBE

• Duucha woyite, mimmitoho gatona yaate mageeshshi yanna keeshshineemmo?

• Coye godowaho amande keeshshineemmokki gede maa assa dandiineemmo?

KAAꞌLITANNO AMAALE

• Koffi yitinanni gede assannori tuncu yiiꞌnero, galteꞌne kiꞌne xissiisate affanni heedhenni assitinori gede assitine heddinoonte.

• “Ninke baalunku woꞌmanka woyite [soꞌneemmore]” ikkinoommota qaaggine galteꞌnera gatona yitine saꞌꞌate woꞌnaalle.—Yaiqoobi 3:2.

“Soꞌnoommori lamenka ikkinummoro mimmito gatona yaa diqarrissannonke; ane soꞌro diꞌꞌikkitino yine hendeemmo woyite kayi, gatona yaa roore qarra ikkitannonke. Maarie yiino mancho maare saꞌꞌate meessaneeto heeshshi assa hasiissanno.”—Kimberlii.

QULLAAWU MAXAAFI BIDDISHSHA: “Rakke araarami.”—Maatewoosi 5:25.