Yihowa Farciꞌraasincho Ikkate Maa Assa Hasiissannoe?
Yesuusi, mittu manchi Yihowa Farciꞌraasincho ikka dandaanno gara xawise kulino; isi yiinore Maatewoosi 28:19, 20 aana nabbawa dandaatto. Kuni qummeeshshi mittu manchi Kiristoosi rosaancho ikkate maa assa hasiissannosiro kulanno; kuri giddo mittu Yihowa daafira coyiꞌrate woy isira naqaashshe ikkate.
Umihunni, Qullaawu Maxaafi yaannore rosi. Yesuusi rosaanosi manna ‘rosiissanni rosaanosi assitanno’ gede hajajinonsa. (Maatewoosi 28:19, 20) Qullaawu Maxaafi, hakko iso Yesuusi Kiristoosi rosiisino rosi hagiirrunna harshammo noo heeshsho heeꞌrate kaaꞌlannohe. (2 Ximootewoosi 3:16, 17) Mannaho Qullaawa Maxaafa woxe baaxxikki xiinxallinseemmo daafira, Qullaawu Maxaafi mayyaannoro hagiirrunni rosiinseemmohe.—Maatewoosi 10:7, 8; 1 Teselonqe 2:13.
Layinkihunni, Rosootto rosi garinni heeꞌri. Yesuusi rosaanosi ikkitannori isi ‘hajajinore baala assa’ hasiissannonsata coyiꞌrino. (Maatewoosi 28:20) Hatto yaa, Qullaawa Maxaafa xiinxallattohu mulla egenno afiꞌrate geeshshira calla diꞌꞌikkino yaate; hatteentenni, hedokkinna akatakki soorrite biddi assiꞌra hasiissannohe. (Soqqamaasinete Looso 10:42; Efesooni Sokka 4:22-29; Ibiraawoota 10:24, 25) Yesuusi hajajo agadhanno manchi hakkiinni aanche, umisi fajjonni heeshshosi Maganu Yihowara aanno; konni garinni Yesuusa harunsate maahoyye yaanno.—Maatewoosi 16:24.
Sayikkihunni, cuuama hasiissannohe. (Maatewoosi 28:19) Qullaawu Maxaafi giddo, cuuama waamamate ledo heewisiinsoonni. (Roomu Sokka 6:2-4 ledo heewisiisi.) Cuuama albi heeshshonkera reyinoommotanna haaro heeshsho hananfoommota leellishanno malaateeti. Konni daafira cuuamakki, aleenni kulloonniha Yesuusi coyiꞌrinoha lame coye guutoottotanna keeraancho tiia afiꞌrate Magano huuccidhanni noottota mannu afanno gede assitanno.—Ibiraawoota 9:14; 1 Pheexiroosi 3:21.
Cuuamate qixxaawoommotanna teꞌee afeemmohu hiittoonniiti?
Songote cimeeyye hasaawisi. Insa Qullaawu Maxaafi roso huwatoottotanna teꞌee, rosootto rosi garinni heedhanni noottoronna teꞌee, hattono umikki fajjonni ateneeto Maganoho oottoronna teꞌee buuxate hasaawissannohe.—Soqqamaasinete Looso 20:28; 1 Pheexiroosi 5:1-3.
Yihowa Farciꞌraasine oosono konne baala assitanno?
Ee assitanno. Qullaawu Maxaafi hajajanno garinni, oosonke “Mootichu amaalenni [seejjinanni]” lossiꞌneemmo. (Efesooni Sokka 6:4) Ikkollana, oosonke lophitanni hadhanno woyite, cuuamate ikkadda ikkitara albaanni Qullaawu Maxaafi roso uminsa baxxe rosa, ammante adhanna rossino rosi garinni heeꞌra hasiissannonsa. (Roomu Sokka 12:2) Magano magansiꞌra lainohunni doodha hasiissannosihu mitto mittonka manchooti.—Roomu Sokka 14:12; Galatiyu Sokka 6:5.