Alamete Doyichora Nooti Yihowa Farciꞌraasine Meꞌꞌete?

Yihowa Farciꞌraasine ikkino manna ma garinni kiirtinanni?

Yihowa Farciꞌraasineeti yine kiirranniri aganu kiiro Maganu Mangisteha dancha duduwo dudubbannore callaati. (Maatewoosi 24:14) Kiirrannihu, cuuante Yihowa Farciꞌraasine ikkitinoreno ikko cuuama hooggurono sabbakate ikkadda ikkitinoreeti.

Mittu manchi Yihowa Farciꞌraasine wido ikke kiiramate woxe fushsha hasiissannosini?

Dihasiissannosi. Mittu manchi woxe fushshasi calla, Yihowa Farciꞌraasine wido ikke kiiramanno gede, woy dirijjitete giddo mito looso woy mite qoosso afiꞌranno gede diassitanno. (Soqqamaasinete Looso 8:18-20) Isinni rooru manni woxe fushshannohu wolootu affukkinniiti. Mittu mittunku Yihowa Farciꞌraasinchi wolqasi assitu deerrinninna umisi fajjonni yannasi, wolqasinna woxesi oye alamete doyicho loosonke kaaꞌlanno.—2 Qorontoosi 9:7.

Sabbakkanni noori ayeootiro affinannihu hiittoonniiti?

Yihowa Farciꞌraasine sabbakkanni sayissino yanna aganu kiiro songonsara rippoorte assitanno. Insa rippoorte assitannohu uminsa fajjonniiti.

Songote rippoorte gamba assine sinu biiro sonkanni. Sinu biiro mitte mittente gobba woy qoqqowi rippoorte qara biiro sokkanno.

Mittu mittunku soqqanshote diria jeefora, mitte mittente gobbata hakko dirita luphi yitinota Yihowa Farciꞌraasine kiiro haaꞌnanni. Mitte mittente gobbara noota Yihowa Farciꞌraasine kiiro gamba assine, alamete doyichora mageeshshiti Yihowa Farciꞌraasine nooro afa dandiinanni. Mitte mittente gobbati loosinke daafira kultanno mashalaqqe webisayitenkera “Alamete Doyicho” yaannohu hunda fultanno. Umi xibbi diri Kiristaani roduuwinsa daafira macciishshinori jawaachishinonsante gede, togoo rippoorte ninke jawaachishshannonke.—Soqqamaasinete Looso 2:41; 4:4; 15:3.

Sabbakkannokkire kayi kiꞌne ledo gamba yitannore Yihowa Farciꞌraasine ikkitinohu gede assitine kiirtinanni?

Togoo manna Yihowa Farciꞌraasine gede assine kiirreemmokkiha ikkirono, gambooshshe dagganno woyite anga fanne haaꞌneemmonsa. Konni manni giddo rooru Kiristoosi reyo Qaagooshshi Ayyaana ayirrisate gamba yaanno; xaphoomunni gamba yiino manni kiiro aaninni Yihowa Farciꞌraasine kiiro hoolle, konni manni kiiro afa dandiinanni. Qaagooshshu Ayyaana ayirrisate 2024nni 21,119,442 manni gamba yiino.

Gambooshshe daannokkihu batinyu manni nafa, ninke ledo woxe baaxxikkinni Qullaawa Maxaafa xiinxalle horo afiꞌranni no. Konni garinni, 2024nni Qullaawa Maxaafa xiinxallinsoommo manni mereerimunni 7,480,146 ikkanno. Haammata manna mitteenni gamba assine xiinxallinseemmo yannano no.

Gashshootu fushshannoti Yihowa Farciꞌraasine kiiro kiꞌne fushshitinannitenni baxxitannohu mayiraati?

Gashshootu tenne kiiro fushshannohu, mannu hiitte ammaꞌno wido ikkinoro xaꞌme callaati. Lawishshaho, Ameerikunniti Manna Kiirtanno Biiro, mitte ammaꞌno harunsanno manni kiiro kageeshshaati yite kultannohu, mannu hiitte ammaꞌno wido hige dooannoro xaꞌmiteeti; tini rippoorte mannu laooti ikkinnina woꞌmunni woꞌma halaale diꞌꞌikkitino. Ninke kayinni Yihowa Farciꞌraasinchooti yine kiirreemmohu, sabbakannohonna tenne rippoorte assannoho ikkinnina ani Yihowa Farciꞌraasinchooti yaannoha baala diꞌꞌikkino.