Qullaawoota Huucciꞌra Hasiissannoe?

Qullaawu Maxaafi mayyaanno?

Dihasiissannohe. Qullaawu Maxaafi, Yesuusi suꞌminni Magano calla huucciꞌra hasiissannonketa kulanno. Yesuusi rosaanosi togo yiino: “Kunnira kiꞌne, ‘Annanke Gordoho heeꞌrattohu, suꞌmikki qullaawa ikko’ [yitine huuccidhe].” (Maatewoosi 6:9) Yesuusi rosaanosi Magano agurranna qullaawoota manna, sokkaasine, woy wole ayeno huuccidhara dirosiisino.

Qoleno Yesuusi harunsaanosira togo yiino: “Doogono, halaaluno, heeshshono aneeti. Ane widoonni ikka hoogiro, ayino Anniꞌyawa daannohu dino.” (Yohaannisi 14:6) Ninke Maganu ledo xaadisanno gede Maganu shoominohu Yesuusa callaati.—Ibiraawoota 7:25.

Maganono huucciꞌranni heeꞌrenni qullaawoota huucciꞌrummorona?

Maganu Tonne Hajajo uyi woyite mittete giddo, “Ani hinaasaancho Maganooti” yiino. (Fulo 20:5) Maganu “hinaasaancho” ikkinohu ma doogonniiti? Niwu Ameerikaan Bayibili yinanni tirora lekkaalliidi qaagiishshira noo hedo, Maganu “iso calla magansiꞌnara hasiꞌrannota” kultanno. Maganu magaꞌno baalanta (tenne giddo mitte huuccattote) isira calla shiqinshara hasiꞌranno.—Isayaasi 48:11.

Iso agurre qullaawoota woy qullaawa sokkaasine huucciꞌneemmoha ikkiro Maganu koffi yaanno. Soqqamaasinchu Yohaannisi sokkaasincho magansiꞌrara kai woyite, sokkaasinchu togo yee giwino: “Qorophi togo ikkitooti! Anino atenna Yesuusi uyino halaale amaddinori roduuwikki ledo soqqamaanchootina, Magano magansiꞌri!”—Yohaannisi Ajuuja 19:10.