Huuccatto Yesuusi Suꞌminni Assiꞌra Hasiissannohu Mayiraati?

Qullaawu Maxaafi mayyaanno?

Magano Yesuusi suꞌminni huucciꞌra hasiissannonkehu, Maganu isi widoonni calla huucciꞌnammora hasiꞌranno daafiraati. Yesuusi togo yiino: “Doogono, halaaluno, heeshshono aneeti. Ane widoonni ikka hoogiro, ayino Anniꞌyawa daannohu dino.” (Yohaannisi 14:6) Qoleno Yesuusi ammanantino soqqamaasinesira togo yiino: “Halaale kuleemmoꞌnena, ane suꞌminni huuccidhinannire baala Anniꞌya aannoꞌne.”—Yohaannisi 16:23.

Yesuusi suꞌminni huucciꞌneemmoha wole korkaata

• Yesuusanna Annasi Magano Yihowa ayirrinseemmota leellishate.—Filiphisiyusi Sokka 2:9-11.

• Maganu, Yesuusi reyonni ninke gatisate qixxeessino qixxaawo naandeemmota leellishate.—Maatewoosi 20:28; Soqqamaasinete Looso 4:12.

• Yesuusi mereeroho heeꞌre Maganonna manna araarsannoha (woy ninke daafira huuccannoha) ikkinota huwantoommota leellishate.—Ibiraawoota 7:25.

• Magano hagiirsiinseemmore ikkineemmo gede Yesuusi Kakkalaanote Biilo ikke loosanno looso naandeemmota leellishate.—Ibiraawoota 4:14-16.