Yihowa Farciꞌraasine Ammaꞌnonsa Giddonni Fulino Manna Ma Garinni Laꞌanno?
Mannu baalunkura baxille, ayirrinyenna shaqqille leellishate dandiinummore baala assineemmo. Mittu Yihowa Farciꞌraasinchi ayyaanaamittetenni daafuriro, woy Yihowa magansiꞌra facci asse aguriro, shinqe hasaawinseemmosi,a banxeemmosita kulleemmosi, hattono ayyaanaamittetenni galagale jawaatanno gede kaaꞌlate sharrammeemmo.—Luqaasi 15:4-7.
Mito woyte, mittu manchi songotenni fushshinannisi gede assanno cubbo loosara dandaanno. (1 Qorontoosi 5:13) Ikkollana, ammanate rodoonke lubbora banxeemmo daafira, songotenni fushshinannisikki gede balanxe kaaꞌlinammosira woꞌnaalleemmo. Kayinni songotenni fuliro nafa, Qullaawu Maxaafi amaalannonke garinni banxeemmosi hattono ayirrinseemmosi.—Maarqoosi 12:31; 1 Pheexiroosi 2:17.
Mitto mancho songotenni fushshinanni gede assannori maati?
Mittu manchi jawa cubbo loose kae biddi yaa giwannoha ikkiro, songotenni fushsha hasiissannota Qullaawu Maxaafi xawise kulanno.b (1 Qorontoosi 5:11-13) Mitto mancho songotenni fushshinanni gede assara dandaannohu jawu cubbi hiikkoyetiro Qullaawu Maxaafi giddo xawinse kulloonni. Kuri giddo gamu: soorrote, dimbate, lubbo shaate, mini manna gawajjate, hattono mooraho.—1 Qorontoosi 6:9, 10; Galaatiya 5:19-21; 1 Ximootewoosi 1:9, 10.
Ikkollana, mittu manchi jawa cubbo loosino daafira calla darganko songotenni difushshineemmo. Songote cimeeyyec balaxxe konne mancho biddi yaanno gede kaaꞌlate woꞌnaaltanno. (Rooma 2:4) Insa iso awu afiinni, shaqqillunninna joongillunni kaaꞌlate sharrantanno. (Galaatiya 6:1) Konni garinni hasaawisansa, kuni manchi soꞌrosi leelteennasi maaro eanno gede kakkayissasira dandiitanno. (2 Ximootewoosi 2:24-26) Kuni manchi kaaꞌlinasira duucha hinge woꞌnaallanni heeꞌneennanni Qullaawu Maxaafi wodho diiga agura giwironna maaro ea hoogiro, songotenni fushsha hasiissanno. Togoo woyte, cimeeyye kuni manchi xaate Yihowa Farciꞌraasincho ikkinokkita songote egensiissanno.
Cimeeyye cubbo loosino manchi biddi yaanno gede kaaꞌlate shaqqillunni, awu afiinninna joongillunni hasaawissannosi
Cubbo loosa rosicho assiꞌrino manna songotenni fushsha may guma abbitino? Umihunni, songo Maganu fushshinoha amanyootu seera agadhite qullaambetenni heeꞌra dandiitanno; qoleno hakko manchihu bushu akatinni didaafantanno. (1 Qorontoosi 5:6; 15:33; 1 Pheexiroosi 1:16) Hatteeno agurranna, cubbo loosino manchi busha assootesi aguratenna biddi yaate kakkaꞌꞌara dandaanno.—Ibiraawoota 12:11.
Yihowa Farciꞌraasine songotenni fushshinoonnire ma garinni laꞌanno?
Qullaawu Maxaafi, Kiristaanu songotenni fushshinoonni manchiwa ‘aana aguranno’ gede, hattono isi ledo ‘sagale nafa itannokki gede’ amaalanno. (1 Qorontoosi 5:11) Konni daafira songotenni fushshinoonni manchiwa diaanneemmo. Ikkollana, konni manchira horo fiile hoꞌlineemmo yaa diꞌꞌikkino. Hatteentenni, ayirrinseemmosi. Kuni manchi ammaꞌnote gambooshshenke daa dandaanno; qoleno hakko Yihowa Farciꞌraasine keere haadhasira dandiitanno.d Hakkiinni saeno, songo higanno gede kaaꞌlitasira cimeeyye xaꞌmiꞌra dandaanno.
Songotenni fushshinoonniri gambooshshenke daa dandiitanno
Mitto mancho songotenni fushshinoonniha ikkirono, galtesinna oososi Yihowa Farciꞌraasinella ikkitu? Maatesi ledo noosihu ayyaanaamittete fiixoomi xaate uurrinoha ikkirono, maalu fiixoomittesi kayinni suffanno. Mitto mine heeꞌrannore ikkino daafira, galtesinna oososi ledo noosi aante noo gedeenni suffanno; qoleno baalunku mimmitoho baxille leellisha hasiissannonsa.
Songotenni fushshinoonni manchi hasaawissannosi gede cimeeyye woshshiꞌra dandaanno; insano Qullaawa Maxaafa horoonsidhe baxillunni amaaltannosi; hattono Maganunniwa higanno gede shaqqillunni jawaachishshannosi. (Zakkaariyaasi 1:3) Kuni manchi bushare assa agurironna addinta Qullaawu Maxaafi wodho garinni heeꞌra hasiꞌrannota heeshshosinni leellishiro, galagale songote miila ikka dandaanno. Biꞌree waro Qorontoosi songo cubbo loose maaro eino manchira assitunte gede, ninkeno konni manchira ‘shaqqillunni gatona yineemmosi hattono sheshifachinsheemmosi.’—2 Qorontoosi 2:6-8.
Alba songotenni fushshinoonniri mayitino?
Alba songotenni fushshinihu gedensaanni galagalte Maganunniwa higa doodhitinori mite Yihowa Farciꞌraasine yitinore wodanchi.
“Songo higate hedumma yannara, cimeeyye songotenni fule keeshshumma dirra giddo assoommare baalare xaꞌmitannoe yee yaadoomma. Insa kay, ‘Sainore agurte alba higge qaafattara hasiꞌneemmo’ yitinoe. Hatto yitueta wodanu hirikki yiinoe.”—Maariya, Ameerika.
“Higoommo daafira songo lowo geeshsha hagiidhitino. ‘Ada ani waagu nooeho!’ yee hedummo. Songote roduuwiꞌya, Yihowano insano gatona yitinoeta huwateemmo gede assitinoe. Tini qolte sainore agure albillitte qaafeemmo gede kaaꞌlitinoe. Cimeeyye ayyaanaamittetenni jawaateemmo gede kaaꞌlate woꞌmanka woyte qixxaabbinoreeti. Insa sheshifachishshinoe, hattono Yihowa xaano baxannoetanna isi albaanni waagu nooeta huwateemmo gede kaaꞌltinoe.”—Malkoomi, Seraa Liyoni.
“Yihowa mannasi baxanno daafira songo xuru nookkita ikkitanno gede assasi hagiirsiissinoe. Gobbaanni noo mannira kakkachimma labburono, hasiissannotenna baxillu qixxaawooti. Gordu Anninke shaqqadonna maaranno Magano ikkino daafira galaxxeemmasi.”—Sandii, Ameerika.
a Labbaaha hendanni borreessinoonniha ikkirono, konni birxichira noo hedo meyaterano loossannote.
b Alba cubbo loosse maaro eꞌannokkire songotenni bonkanni yineemmo. Xa kayinni Qullaawu Maxaafi giddo noo qaali garinni, togoo manna songotenni fushshinanni yineemmo.
c Cimeeyye Maganu Qaale rosiissannoreetinna Yihowa manna kaaꞌlitanninna jawaachishshanni allaaltanno gikki yitino labballooti. Insara loosinsara woxe dibaantanni.—1 Pheexiroosi 5:1-3.
d Mito woyte, mittu manchi horo quwa saꞌꞌaranna songotenni fula calla ikkikkinni, songo gawajjannore assate qodhe kaꞌꞌara woy busha amanyoote halashshara dandaanno. Kuni ikkanno woyte, togoo manna ‘keere haadhinoonte’ yitannota Qullaawu Maxaafi hajajo haꞌrunsineemmo.—2 Yohaannisi 9-11.