ROSO 57
Jawa Cubbo Loosittoro Maa Assa Hasiissannohe?
Yihowa lubbora baxattohanna iso dadillisannore assattokki gede sharramattoha ikkirono, mito woyite soꞌro loosakki digattanno. Ikkollana baalunku cubbi taalo diꞌꞌikkino; mitu cubbi jawaho. (1 Qorontoosi 6:9, 10) Jawa cubbo loosittoro, Yihowa ate baxa agurannokkita qaagi; qoleno isi gatona yaaheranna kaaꞌlahera hasiꞌranno.
1. Yihowa maarannonke gede maa assa hasiissannonke?
Yihowa baxxannori jawa cubbo loossinoti leeltannonsa woyite lowo geeshsha dadillitanno. Ikkirono Yihowa mannisira eino qaali sheshifachishannonsa; isi togo yiino: “Cubbiꞌne duumo xiille ikkirono ani hayishshe bullaame kaade gede asseemmoꞌne.” (Isayaasi 1:18) Addinta maaro eꞌnummoro woy aagintaambummoro, Yihowa cubbonke baalanka maarannonke. Maaro eꞌneemmohu hiittoonniiti? Cubbinkera godowinta gaabbine, bushare assa agurreemmo; hattono maarannonke gede Yihowa huucciꞌneemmo. Hakkiinni, cubbu widira qolte massitinonke hedonna gade hooꞌlate sharrammeemmo; hattono Yihowahu xalalu seeri garinni heeꞌrate dandiinummore baala assineemmo.—Isayaasi 55:6, 7 nabbawi.
2. Cubbo loonseemmo woyite Yihowa cimeeyyete widoonni kaaꞌlannonkehu hiittoonniiti?
Yihowa jawa cubbo loonsummoro ‘songote cimeeyye woshshiꞌnammora’ hasiꞌranno. (Yaiqoobi 5:14, 15 nabbawi.) Kuri shoomantino labballi Yihowano geꞌreewosino baxxannoreeti. Qoleno insa Yihowa ledo wirro danchu jaaloomi heeꞌrannonke gede kaaꞌlitannonke gara rosiinsoonninsareeti.—Galatiyu Sokka 6:1.
Jawa cubbo loonsummoro cimeeyye kaaꞌlitannonkehu hiittoonniiti? Lamu woy sasu cimeessi Qullaawa Maxaafa horoonsidhe, soꞌronke leeltannonke gede kaaꞌlitannonke. Qoleno wirro cubbo loonseemmokki gede kaaꞌlitannonke amaale uyitannonke. Songo gawajjantannokki gede, jawa cubbo loosse kaꞌe maaro eꞌannokkire cimeeyye songotenni fushshitanno.
LEDDE XIINXALLI
Jawa cubbo loosittoro Yihowa kaaꞌlannohe garanna ati tenne naadattota leellisha dandaatto gara ledde rosi.
3. Loonsoommo cubbo kula ayyaanaamittetenni hurre afiꞌneemmo gede kaaꞌlitannonke
Loonseemmo cubbi baalunku Yihowa dadillisanno. Hakko daafira cubbonke isira kula hasiissannonke. Faarso 32:1-5 nabbabbe; hakkiinni tenne xaꞌmo hasaabbe:
Loonsoommo cubbo maaxate woꞌnaalantenni, Yihowara kulanke kaaꞌlitannonkehu hiittoonniiti?
Cubbonke Yihowara kulleemmotano agurranna, kaaꞌlitannonke gede cimeeyyete kuꞌlinummoro giddiidi harshammo afiꞌneemmo. VIIDIYO laꞌe; hakkiinni aante noo xaꞌmo hasaabbe.
Viidiyote giddo, cimeeyye Kanooni Yihowawa higanno gede kaaꞌlitinosihu hiittoonniiti?
Cimeeyyete noore maanxummokki xawinse kula hasiissannonke; insa ninke kaaꞌla hasidhanno. Yaiqoobi 5:16 nabbabbe; hakkiinni tenne xaꞌmo hasaabbe:
Noore maanxummokki xawinse kulanke, cimeeyyete ninke kaaꞌlate coyi injaannonsa gede assitannohu hiittoonniiti?
Cubbokki Yihowara kuli, cimeeyye hasaawissannohe woyite noore maaxxooti, hattono Yihowa baxillunni kaaꞌlannohe kaaꞌlo maahoyye yite adhi
4. Yihowa cubbaataamma maaranno
Jawa cubbo loosino manchi Yihowa seera agadha giwiro, songotenni fushshinanni; hakkuyi gedensaanni isiwa diaanneemmo. Umi Qorontoosi 5:6, 11 nabbabbe; hakkiinni tenne xaꞌmo hasaabbe:
Irsho lixe fultanno gede assitannonte gede, cubbo loosse maaro eꞌannokkiriwa aana songo gawajjitannohu hiittoonniiti?
Cimeeyye guuntete xeˈne noonsa cubbaataamma maaranno Maganiha Yihowa lawishsha harunsite, songotenni fushshinoonnire hasse kaaˈlitanno. Batinyu togoo manni wirro songo higino. Mayira? Songotenni fulansa dadillissinonsaha ikkirono, wodaninsa raga higanno gede kaaꞌlitinonsa.—Faarso 141:5.
Yihowa cubbaataammaho assannori isi quwa saˈˈannokkiha, maarannohanna baxillaancho ikkinota leellishannohu hiittoonniiti?
5. Maaro eꞌnummoro Yihowa gatona yaannonke
Yesuusi mittu manchi maaro eanno woyite Yihowara mayi macciishshamannosiro huwanteemmo gede kaaꞌlannonke lawishsha coyiꞌrino. Luqaasi 15:1-7 nabbabbe; hakkiinni tenne xaꞌmo hasaabbe:
Konni lawishshinni Yihowa daafira maa rosootto?
Hiziqeeli 33:11 nabbabbe; hakkiinni tenne xaꞌmo hasaabbe:
Addinta maaro eꞌnoommota leellishate maa assa hasiissannonke?
Allaalaanchu gede Yihowa geꞌreewosi seekke towaatanno
MITU MANNI TOGO YAANNO: “Cubboꞌya cimeeyyete kulummoro songotenni fushshitannoe yee waajjoommo.”
Hatto yaannohe manchira mayyaatto?
XAPHISHSHA
Jawa cubbo loonsoommoha ikkirono godowinta gaabbineemmohanna busha coye assa agurreemmoha ikkiro, Yihowa gatona yaannonke.
Kageeshsha Rosoottore
Cubbonke Yihowara kula kaaꞌlitannonkehu hiittoonniiti?
Yihowa cubbonke gatona yaannonke gede maa assa hasiissannonke?
Jawa cubbo loonsoommoha ikkiro, kaaꞌlitannonke gede cimeeyyete kuꞌla hasiissannonkehu mayiraati?
EGENNO LEXXI
Yihowa mittu manchira Isayaasi 1:18 kulloonnite gedee maaro leellishinosihu hiittoonniiti?
Cimeeyye, jawa cubbo loossinore kaaˈlate woˈnaaltannohu hiittoonniiti?
“Cubbo Loossinorira Baxillenna Maaro Leellisha” (Agarooshshu Shae, Woxawaajje 2024)
Cubbo loosse maaro eˈannokkirira baxillenna maaro leellinshanni gara wodanchi.
“Songotenni Fushshinoonnire Kaaˈla Dandiinanni Gara” (Agarooshshu Shae, Woxawaajje 2024)
“Yihowawa Higa Hasiissinoe” yitannote heeshshote xagge giddo, halaalu mininni fule ballehinohu mittu manchi Yihowa wirro minisira qolinoe yiinohu mayiraatiro huwati.
“Qullaawu Maxaafi Heeshsho Biddi Assanno” (Agarooshshu Shae, Birra 1, 2012)