Mannu Seerimale Ikkannohu Mayiraati?—⁠Qullaawu Maxaafi Mayyaanno?

Xaa yannara duuchu manni seerimale gede ikkanno. Dhiwame xagisiꞌrara marannohu akimoota xonanno; hoteelete sagale itara marannohu soqqantannore russanno; doogo hadhara horophilla gidditannori hakko soqqantannore siꞌanno; seejjo baꞌino ooso rosiisaanonsa arrassitanno, waajjishiishshanno, hattono gawajjitanno; mitu poletiku mannooti mancaꞌꞌa coye assitanno, mitootu kayinni insaneeto jajjanno.

Qullaawu Maxaafi dancha amanyooteeti yinannihu hiittoohoro xawise kulanno. Qoleno xaa yannara rooru manni seerimale gede ikkannohu mayiraatiro kulanno.

Mannu seerimale gede ikkannohu mayiraati?

Xaa yannara alamete aana mannu seerimale gede ikkanni nooti goꞌlino coye diꞌꞌikkitino; rooru mannira danchunna baxisanno amanyooti dinonsa.

• Muli yannara assinoonni xiinxallo leellishshanno garinni, Ameeriku daga, hakko heeꞌranno manni saihu 22 diri giddo xaa gede ikke seera bae diegennino yite heddanno.

• Qoleno 28 gobbara 32,000 ale ikkanno manni aana assinoonni xiinxallo leellishshanno garinni, 65 anga ikkanno manni, mannu xaa gede ikke seera bae diegennino yiino.

Qullaawu Maxaafi giddo, xaa yannara nooha mannu akata balanxe masaalloonni.

• “Goofimarchu barra qarrissanno yanna daggannota afi. Mannu umosi baxannoha, woxe baxannoha, naaxxaleessa, boonaleessa, xonamaancho, iltinonsarira hajajamannokkiha, galata afiꞌrinokkiha, . . . baxillu nookkiha, . . . mararro afiꞌrinokkiha [ikkanno].”—2 Ximootewoosi 3:1-3.

Tini masaalo woꞌmitanni noo gara ledde afate, “Yannankera Noo Manni Ikkitonna Akati Daafira Qullaawu Maxaafi Giddo Masaalloonnini?” yaanno birxicho nabbawi.

Danchu amanyooti heeꞌrannonke gede kaaꞌlannonkere

Rooru manni seerimale gede ikkannote tenne alamera, lowo miliyoone ikkanno manni danchu amanyooti heeꞌrannonke gede kaaꞌlannohu kaajju uduunnichi Qullaawa Maxaafa ikkinota huwatino. Qullaawu Maxaafi amaalanno amaale “hegerera disoorrantannote.” (Faarso 111:8) Hanni mito lawishsha laꞌno:

• Qullaawu Maxaafi yaannore: “Mannu kiꞌnera assaꞌnera hasidhinannire baala kiꞌneno insara assensa.”—Maatewoosi 7:12.

  Tiro: Mannu ninkera assankera hasiꞌneemmonte gede, ninkeno wolu mannira shaqqaddanna ayirrinseemmore ikka hasiissannonke.

• Qullaawu Maxaafi yaannore: “Kapho fushshitine tugge. . . . Mimmitinkera halaale coyiꞌno.”​—Efesooni Sokka 4:25.

  Tiro: Coyiꞌneemmo coyinnino ikko assineemmorinni ammanammoommore ikka hasiissannonke.

Tenne hajo daafira ledde afate, aante noo borro nabbawi:

• “Danchare Doodhate Kaaꞌlannonkeri Maati?” yitannota Agarooshshu Shae ittime.

• “Qullaawu Maxaafi Mimmito Dandee Heeꞌrate Kaaꞌlanno—Hiittoonni?” yaanno birxicho.