Mannu Poletiku Mannoota Addaxxa Aguranni No—Qullaawu Maxaafi Mayyaanno?

Tayixe 2024nni alamete aana konni albaanni ikke egenninokki deerrinni batinye bayicho doorshu heeꞌranno. Ikkollana, lowo manni poletiku mannoota addaxxa aguranni no.

• Xiinxallo leellishshanno garinni, batinyu Ameeriku manni “rooru poletiku mannooti dooramate kaꞌinohu” manninsara danchare assate ikkikkinni “uminsa qiniitira yiteeti” yee hedanno.a—Pew Research Center, Wocawaaro 19, 2023.

Hattonni batinyu wedellootino poletiku mannoota diaddaxxitanno.

• “Wedellootu duucha woyite qarraho mala hasa baxxanno; ikkirono insa xiinxallote yannara coyidhino garinni, poletiku mannooti qarrinkera mala abbitanno yite diheddanno.”—The New York Times, Arfaasa 29, 2024.

• “Xiinxallo leellishshanno garinni, wedellootu poletiku mannootinni roore Yuutuubete viidiyubba fushshitannore addaxxitanno.”—The Korea Times, Arfaasa 22, 2024.

Poletiku mannooti woyyaabbino yanna abbitanno yine addaxxa dandiineemmo? Addaxxa dandiineemmo gashshaanchi no?

Addaxxineemmoha qorophine doodha

Mannu addaxxanno mancho qorophe doodhansa garankolla. Qullaawu Maxaafi yaanno garinni, “gowwu manchi yinire baala adda assiꞌranno; egennaamu kayinni layiꞌranni qaafanno.”—Lawishsha 14:15.

• Macciishshatto mashalaqqe adda ikkasenna hoogase keenate kaaꞌlitannohe amaale afiꞌrate, “Kaphu Mashalaqqenni Dogantooti” yitanno viidiyo lai.

Qoleno, mannansa kaaꞌlate dancha giddonni kaꞌanno gashshaasine nafa baalare assite diaffanno. Qullaawu Maxaafi togo yee qorophisiisannonkehu iseraati:

• “Mannu gatisara didandaannona, albisoota addaxxitinoonte.”—Faarso 146:3.

Addaxxa dandaatto gashshaancho

Qullaawu Maxaafi, Maganu woꞌmunni woꞌma ammaꞌninannihanna guuta gashshaancho shoominota kulanno. Isino Yesuusi Kiristoosiiti. (Luqaasi 1:32, 33) Yesuusi Maganu Gashshooti Mooteeti; kuni gashshooti gordoho heeꞌre baatto gashshannoho.—Maatewoosi 6:10.

• Yesuusa addaxxa dandaattohu mayiraatironna isi xaa yannara iillanni noonke qarra hoolate maa assannoro ledde rosi. “Maganu Mangiste Moote Ayeti?” yaannohanna “Maganu Mangiste Maa Maa Assitanno?” yaanno birxicho nabbawi.