Tiriliyoonetenni Kiirranni Woxi Olaho Fulino—Olu Gawajjo Tenneetilla?

Olu abbanno gawajjo kulle digundayite.

• “Alamete deerrinni olaho fushshinoonni woxi 2.2 tiriliyoone doolaare ale ikkino; konni albaanni olaho kageeshshi woxi fule diegennino.”—Ze Waashingten Poost, Ammajje 13, 2024.

Olu abbanni noo gawajjo woxunni calla keennannita diꞌꞌikkitino. Hanni mitto lawishsha calla laꞌno: Yukireenete kaino ola.

• Bagadaasine. Mitu egennaammi yitanno garinni, lamu diri albaanni Yukireenete olu kaihunni kayise xaa geeshsha mito 500,000 ikkitanno bagadaasine reyitino woy madidhino.

• Keeraano qansoota. Buusantino Mangistubba yitanno gara ikkiro, konni olinni 28,000 saꞌꞌanno manni reyino woy madiꞌrino. Ikkollana, mittu haꞌnuru Buusantino Mangistubba gashshaanchi togo yiino: “Konni waajjishanno olinni kainohunni keeraano qansooti heeshsho mageeshshi geeshsha umo lekkicho baꞌinoro keena didandiinanni.”a

Alamete deerrinni olunna gaancu mannu heeshsho lowo geeshsha godoꞌlino.

• 114 miliyoone. Wocawaaro 2023 geeshsha, alamete deerrinni olu korinni qaensanni daramino manni kiiro.

• 783 miliyoone. Hude gadachitanni noo manni kiiro. “Xaano ikkiro, hude halaꞌlitanno gede assanni noohu qaru coyi olaho; alamete aana hude amaddino manni giddo xibbunni 70 anga ikkannohu olunna gaancu noo qooxeessira heeꞌrannoho.”—Kalqete Sagalete Pirogiraame.

Olu uurranno yanna daggakka? Keeru daanno yine hexxa dandiineemmo? Baattonke aana noota fakkana jiro hude hunatenna buxima hoolate horoonsiꞌnanni yanna daggakka? Qullaawu Maxaafi mayyaanno?

Olu diro

Qullaawu Maxaafi giddo alamete aana duuchawa olu heeꞌrannota balanxe himannoonni; tenne lawishshunni kulate mittu farashsho gulufinohu noota xawinsoonni.

• “Wolu duumu farashshino fuli. Farashsho gulufe noohura gobbate aaninni keere hunanno gedenna mannu mimmito gudanno gede assara roorre uyinisi; lowo biseno uyinisi.”—Yohaannisi Ajuuja 6:4.

Lawishshu tiro afiꞌrinohu konni farashshaanni hoode hadhannori wolu lamu gulufaasine no; insa, dhibbunninna wolu korinni daggannote base baalate noo huderanna reyora lawishshaho. (Yohaannisi Ajuuja 6:5-8) Konni Qullaawu Maxaafi himani daafira ledde afatenna kuni himani yannankera woꞌmanni no yineemmohu mayiraatiro huwatate, “Farado Guluffinori Shoolu Ayeooti?” yaanno birxicho nabbawi.

Albillitte afiꞌneemmo keere

Muli yannara, alamete jiro olaho horoonsiꞌra gattanno. Kayi kuni ikkannohu mannu sharronni diꞌꞌikkino. Qullaawu Maxaafi togo yaanno:

• Maganu “baattote qacce geeshsha nooha ola uurrisanno.”—Faarso 46:9.

• Maganu olu abbino gawajjo baala badhera qolanno. “[Isi] hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Yohaannisi Ajuuja 21:4.

• Maganu mannu baalu geedanno keere afiꞌranno gede assanno. “Maganu manni yaaddonna qarru nookkiha heeꞌranno; mininsa keerunnihanna hobbaatenniha ikkanno.”—Isayaasi 32:18.

Qullaawu Maxaafi giddo himannoonni garinni, yannankera batiꞌrino olinna wole ikkito hatti keeru yanna gambisse dagginota leellishshanno.

Maganu hattee keeru yanna abbannonkehu hiittoonniiti? Tenne assannohu gordoho noo Gashshootisi widoonniiti. (Maatewoosi 6:10) Maganu Gashshooti maatironna atera mayi atoote abbannohero afate, Maganu Mangiste Maati? yitannota harancho viidiyo lai.