Thomas Jackson/Stone via Getty Images
DEANTINOONTE!
2024nni Hexxo Afiꞌra—Qullaawu Maxaafi Mayyaanno?
Batinyu manni, 2024nni alame qalxe amadanno qarrira malu dino yee hedanno. Ikkirono, hexxo afiꞌra dandiineemmo. Hiikkiinni?
Qullaawu Maxaafi hexxo aanno
Qullaawu Maxaafi, heeshshonke hexxo nookkita labbanno gede assino qarra baala Maganu hoolannota kulanno. Muli yannara, Maganu “hindiiddo baala [illenkenni] feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Yohaannisi Ajuuja 21:4.
Qullaawu Maxaafi konni kaꞌira aannonke hexxo daafira ledde afate, “Woyyitino Yanna Dagganno Yine Hexxa Dandiineemmo?” yaanno birxicho nabbawi.
Qullaawu Maxaafi xaa yannara kaaꞌlannohe gara
Qullaawu Maxaafi aannonke hexxo, dancha danchare hendeemmo gedenna dadillaamma ikkineemmokki gede kaaꞌlitannonke. (Roomu Sokka 15:13) Qoleno Qullaawu Maxaafi aanno amaale, xaa yannara iillannohe qarra lawishshaho buxima, miiconna dhibba cincite woy qeelte saꞌꞌatto gede kaaꞌlitannohe.
Qullaawu Maxaafi aanno hexxo, gadadaaꞌme lophinohu mittu manchi keerenna hagiirre afiꞌranno gede kaaꞌlitinosihu hiittoonniitiro wodanchi. Huwan Paabilo Sirmeeniyo: Yihowa Heeshshoꞌya Gumu Noota Assinoe yitanno viidiyo lai.
Qullaawu Maxaafi meessaneeto bushiishate hedo, dadille, yaaddonna xisso dandiite heeꞌratto gede kaaꞌlannohe gara huwati. “Qullaawa Maxaafa Nabbawummoro Sheshifachishannore Afiꞌreemmo?” yaanno birxicho nabbawi.
Alba olantote giddo eꞌe loossinoti mitte mancho, hakkawaro “mannu waajjannotanna godowa kaajjado” ikkitinota coyidhino. Qullaawu Maxaafi yaannore rossuti kayinni hexxo afidhino. Olu Bagadoꞌya Hunoomma yitanno viidiyo lai.
Albankeenni noohu 2024 aterano maatekkirano dancha diro ikkahera dandaanno. Qullaawu Maxaafi kaaꞌlannohe gara ledde rosi. Mannaho woxe baaxxikkinni Qullaawa Maxaafa mulla xiinxallinseemmo; tenne xiinxallono woꞌnaalte lai. Maganu xaa yannara ‘keere’ aannohe gara hattono “hexxonna albillittete” seekkino heeshsho aannohe gara rosatto.—Ermiyaasi 29:11.