Woyyitino Yanna Dagganno Yine Hexxa Dandiineemmo?
Albillitte woyyitino yanna daggannoha lawannohe? Alame buutote qarri amadinoha ikkirono, batinyu manni woyyitino yanna dagganno yee hexxanno. Ikkina, addinta coyi woyyaawanni haꞌranno yine hexxa dandiineemmo? Ee dandiineemmo! Qullaawu Maxaafi, albillitte woyyitino yanna daggannota kule huluullammannikki hexxo aannonke.
Qullaawu Maxaafi kulanno hexxo hiitteeti?
Qullaawu Maxaafi, mannu ooso lowo qarri amadannota kulanno. Ikkollana, kuni qarri noo gedeenni heeꞌrannoha ikkinokkitano kulanno. Hanni tennera mito lawishsha laꞌno.
Qarra: Mine hooga
Qullaawu Maxaafi yaannore: “Manniꞌya, mine miꞌne heeꞌranno.”—Isayaasi 65:21.
Hatto yaa mayyaate? Albillitte mannu uminsa minira heeꞌranno.
Qarra: Loosu hoongenna buxima
Qullaawu Maxaafi yaannore: “Manniꞌya . . . [loosiꞌrinorinni] seeda diro hagiidhanni heeꞌranno.”—Isayaasi 65:22.
Hatto yaa mayyaate? Albillitte mannu baalunku hagiirsiisannohanna kassi assanno looso afiꞌranno.
Qarra: Taashshote xeꞌne
Qullaawu Maxaafi yaannore: “Taashshe gashshanno moote daannoti yanna iillitino; ledosi gashshaanono halaalu yoo yitanno.”—Isayaasi 32:1.
Hatto yaa mayyaate? Albillitte manna sirchunni woy dagoomu giddo noonsa bayichinni kainohunni dimiincanni; qoleno buxinoha mittono dianfanni. Mannu baalunku taashsho afiꞌranno.
Qarra: Taaltino sagale anjenna hude
Qullaawu Maxaafi yaannore: “Baatto gide laashshito; ilaallate aana jajju woꞌmo.”—Faarso 72:16.
Hatto yaa mayyaate? Albillitte baalunku manni kiꞌannota falakkino sagale afiꞌranno. Itikki galannohu woy taaltino sagale hooge qarramannohu diheeꞌranno.
Qarra: Jaddonna finqille
Qullaawu Maxaafi yaannore: “Mannu annu annunkunni kaasiꞌrino balasenna woyinete caali hunda, harshammi yite fooliishshidhanno; masisannonsari diheeꞌranno.”—Mikiyaasi 4:4.
Hatto yaa mayyaate? Albillitte bushu manni heeꞌrannokkihuranna “keeraano baatto ragidhanno” daafira, mannu baalunku waajjikkinni teese heeꞌranno.—Faarso 37:10, 29.
Qarra: Ola
Qullaawu Maxaafi yaannore: “Gashshootu gashshootu aana ola dikayisanno; hakkunni gedensaanni olaho qixxaawannohu diheeꞌranno.”—Isayaasi 2:4.
Hatto yaa mayyaate? Albillitte baattote aana woꞌmankawa keeru woꞌmanno. (Faarso 72:7) Baxanno manna olu sheenna dadillannohu woy ola xooqe qaesinni daramannohu diheeꞌranno.
Qarra: Dhibbanna xisso
Qullaawu Maxaafi yaannore: “Tsiyooni heeꞌranno manni giddo, ‘Dhiwamoommo’ yaannoha dianfanni.”—Isayaasi 33:24.
Hatto yaa mayyaate? Albillitte bisu xeꞌne noosiha woy dhiwamanno mancho dianfanni. (Isayaasi 35:5, 6) Isinni Qullaawu Maxaafi “reyo [nafa] kunni kaꞌa diheedhanno” yaanno.—Yohaannisi Ajuuja 21:4.
Qarra: Qarqaru daafama
Qullaawu Maxaafi yaannore: “Molo baatto hagiidhitanno; halalli baattorano daraaro fultanno.”—Isayaasi 35:1.
Hatto yaa mayyaate? Maganu hunda hedino garinni, uulla gudisante mannu heeꞌranno gannate ikkitanno.—Kalaqama 2:15; Isayaasi 45:18.
Qullaawu Maxaafi kulanno hexxo haaqeete halchooti?
Miteekkite ati hatto yite hedattoha ikkara dandaanno. Ikkirono, Qullaawu Maxaafi albillittete yanna daafira kulannore ledde xiinxallatto gede jawaachinsheemmohe. Mayira? Qullaawu Maxaafi kulanno hexxo mannu coyiꞌranno hexxonna himaniwiinni baxxitinote. Qullaawu Maxaafi giddo noo hexxo uyinohu Maganoho. Isi uyino hexxo addaxxa dandiineemmohu mayiraatiro hanni laꞌno:
Maganu ammanaminoho. Qullaawu Maxaafi, Maganu “kapha” dandaannokkita kulanno. (Tiito 1:2) Qoleno, albillittete yanna daafira kula dandaannohu Magano callaho. (Isayaasi 46:10) Qullaawu Maxaafi, Maganu coyiꞌrinori woꞌmikkinni gatannokkita leellishannoha batinye lawishsha kulanno. Ledde afate, Qullaawu Maxaafi Halaale Ikkinota Mayinni Anfeemmo? yitanno viidiyo lai.
Maganoho qarranke tiranno wolqa noosi. Qullaawu Maxaafi Maganoho “hasiꞌrinore assanno” wolqa noosita kulanno. (Faarso 135:5, 6) Wole yaattonni, Maganu uyino hexxo wonshannota hoolasira dandaannori mitturino dino. Hakkiinni saeno, Maganu baxannonke daafira kaaꞌlankera hasiꞌranno.—Yohaannisi 3:16.
Miteekkite, ‘Maganu kaaꞌlankera hasiꞌrannohanna wolqa noosiha ikkina, qarru togo batiꞌrinohu mayiraatiyya?’ yite hedattoha ikkara dandaanno. Tenne xaꞌmora dawaro afiꞌrate, Maganu Qarru Heeꞌrara Fajjinohu Mayiraati? yitanno viidiyo lai.
Tini hexxo woꞌmitannohu hiittoonniiti?
Maganu uyinonke hexxo wonshannohu Mangistesi yaano gordoho noo gashshootisi widoonniiti. Maganu Yesuusa Mangistesira Gashshaancho asse shoomino; qoleno baattonna aanase heeꞌranno manna towatanno gede roorre uyinosi. Yesuusi uullate aana noo waro, dhiwantinore hursino, hudidhinore itisino, bubbe hajajino, wole agurina reyitinore nafa kayisino. (Maarqoosi 4:39; 6:41-44; Luqaasi 4:40; Yohaannisi 11:43, 44) Konni garinni, Maganu Mangiste Moote ikkanno woyite maa assannoro leellishino.
Maganu Mangiste kaaꞌlitannohehu hiittoonniitiro ledde afate, Maganu Mangiste Maati? yitanno viidiyo lai.
Tini hexxo woꞌmitannohu mamarooti?
Muli yannara woꞌmitanno! Tenne mayinni anfeemmo? Qullaawu Maxaafi, Maganu Mangiste uulla gashshitara kaꞌanno woyite ikkannore balaxe kulino. (Luqaasi 21:10, 11) Qullaawu Maxaafi yiinori xa ikkanna laꞌnanni heeꞌnoommo.
Ledde afate, “Maganu Mangiste Uulla Gashshitannohu Mamarooti?” yaanno birxicho nabbawi.
Qullaawu Maxaafi kulanno hexxo xaa yannara kaaꞌlitannohehu hiittoonniiti?
Mittu Qullaawu Maxaafi borreessaanchi, Maganu Qaali giddo noo hexxo “heeshshonkera . . . addaxxinanni mokkollichi gede” ikkitinota coyiꞌrino. (Ibiraawoota 6:19) Markaawete mokkollichi dambalu kaꞌꞌanno woyite markaawe hembeelantannokki gede assannonte gede, Qullaawu Maxaafi albillittete yanna daafira kulanno hexxono xa iillannonke qarra dandiine saꞌneemmo gede kaaꞌlitannonke. Hexxo wodanaaꞌmineemmonna hagiirraamma ikkineemmo gede, garunni hendeemmo gede, wole agurina ordu fayyimma heedhannonke gede kaaꞌlitannonke.—1 Teselonqe 5:8.