Mannu Loosino Huwanyooti Atootehonso Baashete?—Qullaawu Maxaafi Mayyaanno?

Alamete gashshaasine, sayinsete egennaamminna tekinoolojete ogeeyye mannu loosino huwanyooti (artificial intelligence - AI) daafira tenne lame lowore yitay no.a Insa tini tekinooloje lowore kaaꞌlitannota ammantinoha ikkirono, mannu ise doogimale horoonsiꞌrakka yite yaaddannotano xawissino.

• “Mannu loosino huwanyooti (AI) yannankera maltino tekinooloje ikkinoti dikaandannite; mannu heeshshono lowo geeshsha woyyeessara dandaanno. . . Hakkoyeno ikkiro, tini tekinooloje yaachishannoreno afidhino; mannu hobbaate huntara, mannootu qoosso riiccara woy dagoomu gashshootu dimokiraasenniha ikkasi huluullamanno gede assitara dandiitanno.”—Kamaala Hariisi, Ameerikunniti Lekkisaancho Pirezidaantitte, Onkoleessa 4, 2023.

• “Mannu loosino huwanyooti (AI) fayyimmate agarooshshira yaguma dancha ikkinoti leeltay no; ikkirono wolu garinni fayyimmankenna hobbaatenke gawajjara dandaanno.”—BMJ Global Health yinanni metseetera Onkoleessa 9, 2023 fultino borro; Dokter Firediriiki Federspeeli massaginoti alamete doyichoti akimootu gaamo borreessitinore.b

• “Mannu, AI tekinooloje widoonni xa nafa kaphu mashalaqqe tareessanni no. Muli yannara lowo manni looso hooganno gedeno assitara dandiitanno. Tekinoolojete ogeeyye, tini tekinooloje martuwa marte manna nafa huntara dandiitanno yite baasa yaaddino.”—Ze Niwu Yoork Tayms, Onkoleessa 1, 2023.

Mannu loosino huwanyooti tekinooloje mageeshshi geeshsha kaaꞌlitannoro woy gawajjitannoro galle honsay anfannita ikkitanno. Ikkina Qullaawu Maxaafi tennera mayyaanno?

Isi mannu loosannori yaaddo anga haaꞌre daannohu mayiraati?

Mannu ooso tekinoolojensa danchurira calla horoonsiꞌnanni gede assa dandiitannokkihu mayiraatiro Qullaawu Maxaafi xawise kulanno.

1. 1. Mannu mittore loosannohu danchare hede ikkiro nafa, loosinsa abbara dandaanno gawajjo balaxe afa hoogara dandaanno.

   • “Mannaho dancha labbannoti mitte doogo no; goofimarchoho kayinni reyote tugganno.”—Lawishsha 14:12.

2. 2. Mittu tekinoolojete ogeessi, wolootu isi loosinore danchurira horoonsidhannoronna bunshete horoonsidhannoro illaallisa didandaanno.

   • “Jiroꞌya [loosoꞌya] baala ane gedensaanni daannohura agure haꞌreemmo. . . . Ane darga amadannohu egennaamohorono gowwahoro bande dianfoonni. Ikkollana ani egennoꞌyanni daafure gamba assoommohura anna ikkanno.”—Rosiisaancho 2:18, 19.

Mannu egennonni assinanniri baalu togoo yaaddo afiꞌrinoha ikkino daafira, Kalaqaanchu aanno biddishshi hasiisannonke.

Aye addaxxa dandiineemmo?

Kalaqaanchinke, mannu ooso woy insa abbitino tekinooloje mannu sircho woy baatto huntara horo fajjannokkita coyiꞌrino.

• ‘Kalqe [baatto] noowa heedhanno.’—Rosiisaancho 1:4.

• “Keeraano baatto ragidhanno; ise aanano hegerera heedhanno.”—Faarso 37:29.

Kalaqaanchinke Qullaawu Maxaafi widoonni albillitte keerunni teense heeꞌneemmo gede kaaꞌlannonke biddishsha aannonke. Qullaawu Maxaafi tenne daafira mayyaannoro ledde afate, “Albillitte Teense Heeꞌneemmo Gede Kaaꞌlannonkeri Maati?” yaannohanna “Woyyitino Yanna Dagganno Yine Hexxa Dandiineemmo?” yaanno birxicho nabbawi.