Mannu Poletikunni Togo Bebbeehaminohu Mayiraati?—Qullaawu Maxaafi Mayyaanno?

Alamete aana lowo daga poletikunni bebbeehantinote. Mittu xiinxallote mereershi 2022nni fushshino rippoorte garinni, “xiinxallo assinoonnite 19 gobbara heeꞌrannohu xibbunni 65 anga ikkannohu gikki yiino manni, gobbansara addi addita poletiku paarte kaaꞌlanno manni mereero lowo babbadooshshi noota woy kuni manni horo sumuu yaannokkita coyiꞌrino.”

Kiꞌne qooxeessirano mannu poletikunni albinni roore bebbeehamino? Kuni ikkinohu mayiraati? Malu maatiyya? Hanni Qullaawu Maxaafi yaannore laꞌno.

Babbadooshshe kalaqqanno akatta

Qullaawu Maxaafi, tenne heeꞌnoommote ‘goofimarchu barruwara’ batinyu manni akati mittimma hunannoha ikkannota kulanno.

• “Goofimarchu barra qarrissanno yanna daggannota afi. Mannu umosi baxannoha, . . . araara giwannoha [ikkanno].”—2 Ximootewoosi 3:1-3.

Batinyu manni gashshootu hedinori woꞌmanno gede assate sharramirono, diqiniinonsa. Babbaxxitinoti poletiku lao noonsa mannira qarra tirate mitteenni loosa gooddo ikkitinonsa; woy horonta didandiino. Hakko daafira, Qullaawu Maxaafi lowo dirira albaanni yiinori halaale ikkinoti leeltanni no.

• “Mittu woloota kade gashshanno wolqa afiꞌranno.”—Rosiisaancho 8:9.

Ikkollana, Qullaawu Maxaafi malu maatiro kulanno; hakkuno: yannankera mannu ooso huwanni noo qarra gudise huna dandaanno gashshooti no.

Mannu qarra afannoha guuta gashshaancho

Qullaawu Maxaafi mannu ooso qarra tirate hasiissanno akatta noosihu baxxino gashshaanchi noota kulanno; hakkuno Yesuusi Kiristoosiiti. Yesuusira mannu oosora mittimmanna keere abbate wolqa, silxaanenna hasatto noosi.

• “Isi gashshooti yannara keeraano qawaaxxidho.”—Faarso 72:7.

• “Daga baalanti gashshantosi.”—Faarso 72:11.

Yesuusi baxxino gashshaanchooti; mayira yiniro, isira mannu qarri leellannosi, qoleno manna hakko iso miicantinore kaaꞌlate hasatto noosi.

• “Qarraataamo woshshiꞌrannosi woyite gatisannosi; buxichonna gadadaamo kaaꞌlanno. Buxanenna wolqiweeloota mararanno; qarraataamma reyotenni gatisanno. Insa heeshsho isi albaanni ayirrado ikkitino daafira, gadadaamma shettotewiinni fushshannonsa.”—Faarso 72:12-14.

Maganu Mangiste yaano Yesuusi anga noohu gordu gashshooti daafira ledde afate woꞌnaali. Qoleno kuni gashshooti abbanno atoote afiꞌranna konni gashshootira halama dandaatto gara rosi.

• Maganu Mangiste Maati? yitanno viidiyo lai.

• “Maganu Mangiste—Mussinnu Nookki Gashshoote” yaanno birxicho nabbawi.