Guraanni: Yunayitidi Isteetisete Filooridaho, Hombobalatte Iyaani, Wocawaaro 2022 (Sean Rayford/Getty Images); mereeroho: Yukireenete Donestikira ama beettise ledo qaesenni darante fulte no, Maaja 2022 (Alex Chan Tsz Yuk/SOPA Images/LightRocket via Getty Images); qiniitenni: Chayinaho Beejingete lowo mannira mitteenni Koroona laꞌnanni heeꞌnoonni, Dotteessa 2022 (Kevin Frayer/Getty Images)
DEANTINOONTE!
2022 Kande Amandayiri Baino Dirooti—Qullaawu Maxaafi Mayyaanno?
2022nni olu, miinju qarri, hattono kalaqamu dano daafira odoote xaa xaa kullanna macciishshinoommo. Togoo coyi mayira ikkanni nooro xawise kulankera dandaannohu Qullaawa Maxaafa callaho.
2022nni ikkitino coyibba afidhino tiro
Sai diro alamete aana ikkitino coyibba, heeꞌnoommohu Qullaawu Maxaafi “goofimarchu barra” yaanno yanna giddo ikkinota roore xawisse leellishshannote. (2 Ximootewoosi 3:1) “Goofimarchu barra” yinanni yanna 1914nni hanaffino. Yannankera ikkanni noori Qullaawu Maxaafi masaalino coyi ledo mitto ikkino gara wodanchate woꞌnaali:
“Olu.”—Maatewoosi 24:6.
“2022, Olu Awuroppa Wirro Ganino Dirooti.”a
“Ruusiyu Yukireenete Gobba Horrino” yaanno birxicho lai.
“Hude.”—Maatewoosi 24:7.
“2022, Mannu Hudiꞌre Quuxxi Yiino Dirooti.”b
“Yukireenete Oli Alamete Aana Sagalete Anje Lexxitanno Gede Assino” yaanno birxicho lai.
“Dhibbu.”—Luqaasi 21:11.
“Pooliyote dhibbi wirro kaino, galadu fanxaaxxi buutote qarra qalino, hattono Koroonu fayya manna gawajja diagurtino. Tini baala, taraawanno dhibbi shaaꞌꞌa coye ikkinokkitanna mannu ooso qarru giddo noota leellishshanno.”c
“Koroonu Fayyanni 6 Miliyoone Manni Reyino” yaanno birxicho lai.
“Waajjishshannoti jajjabba malaatta.”—Luqaasi 21:11.
“Quwa saino iibbille, moolle, dubbu giiranna lolahe. Niro 2022nni arru woggara ayyare soorrante daaffinori horo dihambannireeti. Ayyarete gade soorrante lowore huntino, lowo kume ikkanno manna guddino, hattono alame woꞌmate lowo miliyoone ikkanno manni miniweelo gatanno gede assitino.”d
“Alame Woꞌmate Iibbillu Batiꞌrino” yaanno birxicho lai.
“Luulo.”—Luqaasi 21:9.
“Miinju qarrinni kainohunni lawishshaho hidhinanniri giira kaxxeenna mannu lowo geeshsha aaraawino daafira, 2022nni albinni roore lowo manni gashshootu aana finqilino.”e
“Alame Woꞌmate Hidhinanniri Giira Kaxxino” yaanno birxicho lai.
Daanno dirona mayi ikkakka?
Daanno diro 2023nni mayi ikkannoro bade afinohu dino. Ikkirono, muli yannara Maganu Mangiste woy gordu gashshooti uullate aana lowo coye soorre biddi assannota anfoommo. (Daanieeli 2:44) Hakku gashshooti qarrinkera kaima ikkinore baalankare hunanno, hattono Maganu fajjo baattote aana woꞌmitanno gede assanno.—Maatewoosi 6:9, 10.
Konnira Yesuusi amaalinonke amaale harunsite, alamete aana ikkanni noori Qullaawu Maxaafi masaalo woꞌmitanno gede assanni noohu hiittoonniitiro “jaatte” woy baqqi yite laꞌꞌatto gede jawaachinsheemmohe. (Maarqoosi 13:37) Qullaawu Maxaafi xaa heeshshokkira kaaꞌlannohe garanna albillittete aterano minikki mannirano dancha hexxo aannohe gara ledde afate hasaawisattonkera dandaatto.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.