Alamete Boowe Godoꞌle Addinta Manna Mitto Assitanno?—Qullaawu Maxaafi Mayyaanno?

Bocaasa 20 kayise Sadaasa 18, 2022 geeshsha keeshshitinota alamete boowe (waancu) godoꞌle onte biliyoone meddi yaanno manni laino yine hendanni. Mitootu ‘Togoo ispoorte mannu mittooꞌmanno gede calla ikkikkinni hakkiinni sainore assitanno’ yite heddanno.

• “Ispoorte alame soorrate wolqa afidhino. Manna loosoho kakkayissanno. Baxxino garinni manna mitto assate wolqa afidhino.”—Nelsen Mandeella, albihu Wodiidi Afiriki pirezidaantichi.

• “Lekkate kaase mannaho hexxo uyitanno daafira, hagiirre uyitanno daafira, baalunku manni diinagge ikkitino daafira, hattono baxille halashshitanno daafira manna mitto assitanno.”—Jaani Infantino, FIFA pirezidaantichi.a

Ikkina Alamete Boowe woy wole togoo godoꞌle konni garinni manna mitto assa dandiitanno? Keerenna mittimma afiꞌnanni yanna dagga ikka?

Addinta manna mitto assitanno?

Tayixeti Alamete Boowe godoꞌle mannu kaase calla ikkikkinni wolere duuchare hedanno gede assitino. Tayixe godoꞌle mannu dagoomunna poletiku hajo daafira, lawishshaho mannu qoosso daafira, hattono sircho bade giwatenna miinju babbadooshshi daafira yekkeeramanno gede assitino.

Ikkirono batinyu manni alamete deerrinni qixxeessinanni godoꞌle lawishshaho Alamete Boowe godoꞌle laꞌꞌa baxanno. Ikkollana togoo qixxaawo abbitanno mittimma mannu halchi gede geedonnita diꞌꞌikkitanno. Hatteentenni togoo godoꞌle duucha woyite, Qullaawu Maxaafi “goofimarchu barra” ikkanno yiinonte gede, mannu mereero babbadooshshe kalaqino akatinna assooti roore reqecci yee leellanno gedella assitanno.—2 Ximootewoosi 3:1-5.

Addu mittimma abbanno coye

Qullaawu Maxaafi alame woꞌmate aana addu mittimma heedhanno yanna daggannota kulanno. Qullaawu Maxaafi kulanno garinni, baattote aana noo manni baalunku gordoho noohu “Maganu gashshooti” hunda mitto ikkanno.—Luqaasi 4:43; Maatewoosi 6:10.

Hattee Mangiste Moote Yesuusi Kiristoosi alame woꞌmate aana keeru heeꞌranno gede assanno. Qullaawu Maxaafi togo yaanno:

• “Isi gashshooti yannara keeraano qawaaxxidho; aganu baꞌꞌa geeshsha jiro [“keeru,” Haaro Alame Tiro] batidho.”—Faarso 72:7.

• “Qarraataamo woshshiꞌrannosi woyite gatisannosi; . . . gadadaamma shettotewiinni fushshannonsa.”—Faarso 72:12, 14.

Yesuusi rosiisino rosi xaa yannara nafa 239 gobbara heeꞌrannohu lowo miliyoone ikkanno manni mitto ikkanno gede assino. Kuni manni rosino rosi manna giwa aguranno gede kaaꞌlinonsa. Tenne hajo daafira ledde afate, “Manna Giwa Agura Dandiinanni!” yaanno umi hunda fultino birxichuwa nabbawi.