Yesuusi Mannaho Maa Assineemmo Gede Rosiisino?

Qullaawu Maxaafi mayyaanno?

Yesuusi ilaalu aana rosiisanni heeꞌre togo yiino: “Mannu kiꞌnera assaꞌnera hasidhinannire baala kiꞌneno insara assensa.”—Maatewoosi 7:12; Luqaasi 6:31.

• Yesuusi hatto yaasi mayyaate?

• Yesuusi yiinore assa kaaꞌlitannonkehu hiittoonniiti?

• Tenne hajajo wonshineemmohu uminke qiniitira yineeti?

• Yesuusi yiinore assa dandiineemmohu hiittoonniiti?

Yesuusi hatto yaasi mayyaate?

Yesuusi mannaho ninkera assinankera hasiꞌneemmore assineemmo gede amaalinonke. Lawishshaho, duuchu manni ayirrinsanninsata, hattono shaqqillenna baxille leellinshanninsata baxanno. Konnira ninkeno wolu mannira togoore assa hasiissannonke.—Luqaasi 6:31.

Yesuusi yiinore assa kaaꞌlitannonkehu hiittoonniiti?

Yesuusi uynoti tini hajajo heeshshonkera duuchu garinni kaaꞌlitannonke. Lawishshaho, tini hajajo . . .

• adhanna adhama kaajjishshanno.—Efessooni 5:28, 33.

• ooso danchu garinni lossiꞌnanni gede kaaꞌlitanno.—Efessooni 6:4.

• jaallate mereero, qachinke manni ledonna loosu miillanke ledo dancha aante heedhannonke gede assitanno.—Lawishsha 3:27, 28; Qolaasiyaasi 3:13.

Tenne Yesuusi uyno hajajora noo hedo Albi Gondooro yinanni maxaaffa giddono noote. “Seeruno [umiti onte Qullaawu Maxaafi maxaaffano] Masaalaanono [masaalaanote maxaaffano] yitannohu” tenne hajajora nooreeti. (Maatewoosi 7:12) Wole yaattonni, tini Yesuusi hajajo Albi Gondoorira noota qara sokka xaphi assite amaddino; hattino: olliichokki baxi yitannote.—Rooma 13:8-10.

Tenne hajajo wonshineemmohu uminke qiniitira yineeti?

Deeꞌni. Tini hajajo illachishshannohu aate aanaati. Yesuusi tenne hajajo uy woyte manna baalaho wole agurina baarigaarinkera nafa maa assa hasiissannonkero rosiisanni no. (Luqaasi 6:27-31, 35) Konnira tini hajajo baalunku mannira danchare assineemmo gede jawaachishshannote.

Yesuusi yiinore assa dandiineemmohu hiittoonniiti?

1. 1. Xiinxalla ikki. Qooxeessikkira noo manna ille worte lai. Lawishshaho, ayirranno coye duqqe shelleggamanni noo mancho laꞌꞌattora, qachiꞌnera mannu xiwaminota macciishshattora, woy loosu miilikki dadillaawinota wodanchattora dandaatto. ‘Woleho woyyannore hedattoha’ ikkiro, manna kaaꞌlannore coyiꞌratto woy assatto injo afiꞌrattora dandaatto.—Filiphisiyusi 2:4.

2. 2. Mararattoha ikki. Mannu qarra umikkihu gede assite hedi. Hakku qarri atera iilloommehero hiitto ikkattoha lawaahe? (Rooma 12:15) Mannu qarri leellannohe gede sharramattoha ikkiro, insa kaaꞌlate kakkaꞌꞌattora dandaatto.

3. 3. Manna gari garinsanni kaaꞌli. Mannu baalu mitto ikkinokkita qaagi. Wolootu assinansara hasidhannori ati assinahera hasiꞌratto coywiinni baxxara dandaanno. Hakko daafira, wolootaho assa dandaatto coy giddo, insa roore baxxannore doorte assinsa.—1 Qorontoosi 10:24.