Finqille Qarra Ditirtanno

Xaa yannara duuchu manni afuu xaada giwiro woy qarru kalaqamiro, finqila woy wolqatenni qaafo adha qarra tirtanno yee hedanno. Ikkollana Yesuusi hatto yee dirosiisino, woy isi umisi hattoore diassino. Hanni isi maynoronna maa assinoro haransine laꞌno.

Yesuusi yiinore

Yesuusi Ejedhete Ilaalira heeꞌre rosiisi yannara, hanqu, wolqate qaafo adhanna finqille qarra tirtannokkita rosiisino. Hanni mito mito lawishsha laꞌno.

• “Mannu kiꞌnera assaꞌnera hasidhinannire baala kiꞌneno insara assensa.” (Maatewoosi 7:12; Luqaasi 6:31) Tini amanyootu wodho,a manna ninke amandankera hasiꞌneemmo garinni amada hasiissannonketa kultanno. Aye manchino ninke gane gawajjankera hasiꞌneemmokkiha ikkina, ninkeno sumuu yinoommokki woyte nafa manna ayirrisanna shaqqillunni amada dihasiissannonke?

• “Qiniiticho baqqaalla qawaadannohehura guracho baqqaalla qolisi.” (Maatewoosi 5:38, 39; Luqaasi 6:29) Yesuusi mannu baxita assiꞌrankera wodha hasiissannonke yaanni nooha diꞌꞌikkino. Hatteentenni, isi hatto yiinohu ganinoha gane qoꞌla hasiissanno yitannota soꞌrote hedo taashshateeti; hakkawaro mite ammaꞌnote massagaano hatto yite rosiissannoha ikkikkinni digatino. Yesuusi kayinni haꞌrunsaanosi rabbisiꞌra hasiissannonsakkita hatteentenni mannu hanqisinsaro joongille leellishate sharrama hasiissannonsata rosiisanni no.b

• “Baarigaarraꞌne baxxe.” (Maatewoosi 5:43, 44; Luqaasi 6:27) Yesuusi gibbannonkerira woy miiccannonkerira danchuulle ikka hasiissannonketa rosiisino. Hige insa assitanno bunshera sumuu yineemmo yaa diꞌꞌikkino.c Ikkollana, giwannonke mannira shaqqille leellinsheemmoha ikkiro, hanqonsa qiissinammora wole agurina insano danchuulle ikkitanno gede kaaꞌlinammonsara dandiineemmo.

Yesuusi assinorenna albillitte assannore

Yesuusi finqille qarra tirtannokkita rosiisino; qoleno rosiisino rosi garinni heeꞌrino. Yesuusa amandi hashsha, rosaanosi giddonni mittu isira haꞌle wolqate qaafo adhino; Yesuusi kay togo yiinosi: “Bise fushshidhannori baalu bisetenni gooffannona, bisekki bayichose qoli.” (Maatewoosi 26:52) Yesuusi beebba assidhusirira gatona yaatenni baarigaarrasi baxannota leellishino; wole agurina insara huuccatto nafa assino!—Luqaasi 23:33, 34; 1 Pheexiroosi 2:23.

Qullaawu Maxaafi kulanno hexxo garinni, Keeru Roorricha ikkinohu Mootichu Yesuusi, muli yannara finqille baala hunanno. (Isayaasi 9:6, 7) Hattee baxissanno yanna daafira ledde afate, “Olunna Kipho Uurritanno Gara” yaanno birxicho nabbawi.